દારૂને સજ્જનો નરકનુ બારું માને છે પરંતુ આજકાલ આ દારૂએ હરવા-ફરવા માટે અનેક બારુ શોધી કાઢયા છે. દારૂ પ્રતિબંધિત રાજ્ય ગુજરાતમાં સડકો પર નીતનવી સવારી પર બે-રોકટોક મુસાફરી કરી રહ્યો છે. કેટલાક બુટલેગરો પોલીસની આંખમાં ધૂળ નાખવા નીતનવા રસ્તાઓ અપનાવે છે.
સુરત જિલ્લા આર.આર સેલ દ્વારા 40 લાખથી વધુની કિંમતનો દારૂ ઝડપી પાડવામાં આવ્યો છે. હરિયાણાથી ટ્રકમાં ભરીને જિલ્લામાં ઘુસાડવામાં આવી રહેલા મોટી માત્રાના વિદેશી દારૂ પર પોલીસે દરોડા પાડ્યા હતા. પોલીસ દ્વારા માંડવીના લીમોદરા પાટિયા પાસેથી આ વિદેશી દારૂને ઝડપી પાડવામાં આવ્યો છે.
પોલીસે રૂપિયા 40 લાખના દારૂ સાથે કુલ 56 લાખ રૂપિયાથી વધુનો મુદ્દામાલ કબ્જે કરી ડ્રાયવરની અટકાયત કરી છે જોકે અન્ય ચાર વ્યકતી ફરાર થયા છે. આ પહેલા બનાસકાંઠા જિલ્લાના થરાદના ખોડા ચેકપોસ્ટ પરથી લકઝરી બસમાંથી વિદેશી દારૂનો જથ્થો ઝડપાયો હતો. 3 બેગમાંથી વિદેશી દારૂની 108 બોટલો ઝડપાઈ હતી. તો બીજી તરફ વલસાડ જિલ્લાના વાપીમાંથી ડીઝલ-પેટ્રોલના ટેન્કરમાંથી 7.20 લાખનો દારૂ ઝડપાયો હતો. ટેન્કરની અંદરથી ચોરખાના બનાવેલા હતાં. જેમાં મોટા પ્રમાણમાં વિદેશી દારૂ ભરવામાં આવ્યો હતો. ત્યારે એમ્બ્યુલન્સના ઓઠા હેઠળ દારૂની કરાતી આ હેરાફેરીએ પોલીને વિચારતા કરી દીધા છે.
તો આ તરફ અરવલ્લી જિલ્લાના શામળાજી નજીક આવેલા નામડા ગામ પાસેથી પસાર થઈ રહેલી એમ્બ્યૂલન્સ લખેલી એક બોલેરો ગાડીને પોલીસે રોકી હતી. એમ્બ્યુલન્સ લખેલી ગાડીની પોલીસ દ્વારા તપાસ કરતા તેમાંથી કોઈ દર્દી તો ન મળી આવ્યો પરંતુ વિદેશી દારૂની 750 નંગ બોટલો મળી આવી હતી.