એક્શન / સિંધુભવન રોડ પર સ્ટંટ કરનારાઓની ચકેડી ફરી! VTVના અહેવાલ બાદ પોલીસે કરી કડક કાર્યવાહી

• સિંધુભવન રોડ પર ફટાકડા ફોડી સ્ટંટ કરવાનો મામલો
• પોલીસે સ્ટંટ કરનાર 3 શખ્સોની કરી ધરપકડ
• જાહેર રોડ પર સ્ટન્ટ કરીને ફટાકડા ફોડી મચાવ્યો હતો આતંક 

અમદાવાદ શહેરના સિંધુભવન રોડ પર દિવાળીની રાત્રે કેટલાક યુવાનોએ જાણે કે રોડને બાનમાં લીધો હોય તેમ રોડ પર જ ફટાકડા ફોડ્યા હતા, એટલું નહીં તેઓએ ચાલુ ગાડીએ ગાડી પર ફટાકડા ફોડીને લોકોમાં એક ભયનું વાતાવરણ ઉભું કર્યું હતું. સાથે જ આ યુવકોએ એક બોમ્બ ફરેલા બોક્સમાં એક ફટાડકો નાખીને રોડ પર જ બોક્સ મૂકીને ધમાલ મચાવી હતી. જો કે, રાહદારીઓને જોખમમાં મુકનારા શખ્સોની કરતૂત VTV પર રજૂ કરાઇ હતી. VTV પર અહેવાલ રજૂ થતાં સરખેજ પોલીસ તાબડતોબ એકશનમાં આવી હતી.  

જોખમી રીતે ફટાકડા ફોડનારા 3 યુવકોની ધરપકડ
પોલીસનો ડર રાખ્યા વગર કાયદાની ઐસીતૈસી કરતા યુવાનોએ આખા સિંધુભવન વિસ્તારને બાનમાં લીધો હતો. સમગ્ર ઘટના VTV પર અહેવાલ રજૂ કરાતા પોલીસ સફાળી જાગી હતી. સરખેજ પોલીસે 5થી 6 લોકો વિરુદ્ધ કાર્યવાહી હાથ ધરી જાહેરનામા ભંગ અને ટ્રાફિકને અડચણરૂપ કલમ હેઠળ ગુનો નોંધ્યો હતો. હવે સિંધુભવન રોડ પર જોખમી રીતે ફટાકડા ફોડનારા 3 યુવકોની પોલીસે ધરપકડ કરી છે. 

કાર પર જોખમી રીતે બોમ્બ ફોડનારા સકંજામાં
મેદાનમાં કે ખુલ્લી જગ્યામાં ફટાકડા ફોડવાના બદલે આ યુવાનોએ સિંધુભવન રોડ પર જ ફોડવાનું શરૂ કર્યું હતું. હંમેશા લોકોથી ધમધમતા સિંધુભવન રોડ પર દિવાળીની રાત્રે મોટા મા-બાપના નબીરાઓએ પોલીસ કે કાયદાનો કોઇ ડર જ ના હોય તેમ ગાડીમાં સવાર થઇ ગયાં અને ગાડીની ઉપર ફટાકડાનું બોક્સ મૂકીને ફટાકડા ફોડ્યા હતા.

લોકોમાં ભયનો માહોલ કર્યો હતો ઉભો
આ લોકો આટલાથી ના અટકતા એક બોમ્બ ફરેલા બોક્સમાં એક ફટાડકો નાંખીને રોડ પર જ બોકસ મૂકીને ધમાલ મચાવી હતી. એટલું જ નહીં ગાડીની બહાર નીકળીને લોકોમાં એક ભયનો માહોલ ઉભો કર્યો હતો. જોકે, પોલીસે 24 કલાકની અંદર જ જોખમી રીતે ફટાકડા ફોડનારા 3 યુવકોની ધરપકડ છે. હાલ પોલીસે આ મામલે આગળની કાર્યવાહી હાથ ધરી છે. 

જુઓ આ વીડિયો