રાજકોટમાં વધુ એક ચોંકાવનારી ઘટના સામે આવી છે. થોડા દિવસ અગાઉ રાજકોટમાં ઉચ્ચ અભ્યાસ કરાયેલા 3 ભાઇ-બહેન 10 વર્ષથી એક જ રૂમમાં બંધ હતા. જેમને રાજકોટના એક સાથી સેવાભાવિ ગ્રુપ દ્વારા બારણુ તોડીને બહાર કઢાયા હતા. ત્યારે હવે શહેરમાં ફરી એક વખત સેવાભાવિ સંસ્થાએ માનવતાને મહેકાવતુ કાર્ય કર્યું છે. રાજકોટના સાધુ વાસવાણી રોડ પર આવેલ ઘરમાં છેલ્લા કેટલાક મહિનાઓથી રૂમમાં પુરાયેલી યુવતીને સાથી સેવા ગ્રુપે રેસ્ક્યૂ કરી છોડાવી હતી.
રાજકોટમાં ફરી એક વખત સાથી સેવા ગ્રુપે એક યુવતીને છોડાવી
6 મહિનાથી એક રૂમમાં પુરાયેલી યુવતીને સાથી સેવા ગ્રુપે છોડાવી
25 ઉંમર ધરાવતી આ યુવતીનું નામ અલ્પા અને C.A.નો અભ્યાસ કરતી હતી
સાથી સેવા ગ્રુપ પાસે યુવતીની સારવાર માટે તેની માતાએ મદદ માંગી હતી
રાજકોટના સાથી સેવા ગ્રુપા જલ્પાબેન પટેલ અને તેમની ટીમે શહેરના સાધુ વાસવાણી રોડ પર આવેલા એક ઘરમાંથી યુવતીનું રેસ્ક્યુ કર્યું છે. આ યુવતી ઘરના એક રૂમમાં છેલ્લા 6 મહિનાથી પુરાયેલી હોવાનું જાણવા મળી રહ્યું છે. 25 વર્ષીય અલ્પા નામની યુવતી MBA પાસ અને CAનો અભ્યાસ કરતી હતી. જોકે તે 6 મહિનાથી એક જ રૂમમાં પુરાઇ હતી. તેણે છેલ્લા 7-8 દિવસથી ખાધુ-પીધું ન હોવાથી કોમમાં સરી પડી હતી અને તેના મોઢામાં ફીણ આવી ગયેલી હાલતમાં મળી આવી હતી. ત્યારબાદ આ ગ્રુપ દ્વારા યુવતીને તાત્કાલિક સારવાર માટે સિવિલ હોસ્પિટલ ખસેડી છે. તો આ યુવતીના રૂમમાં યુરિન ભરેલી કોથળીઓ અને ડબા મળી આવ્યા છે. આ રૂમમાં ખૂબ જ ગંદકી હતી. જોકે અંધશ્રદ્ધામાં યુવતીને બંધક બનાવી હોવાની ચર્ચા થઇ રહી છે. આ યુવતીના પરિવારમાં માતા, પિતા, કાકા અને મોટી બહેન છે.
શું છે સમગ્ર મામલો?
મળતી માહિતી અનુસાર, યુવતીના પરિવારજનો દ્વારા આ યુવતીની સારવાર માટે અનેક લોકો પાસેથી રૂપિયા ઉઘરાવવામાં આવ્યા હતા. ત્યારબાદ આ યુવતીના પરિવારજનો દ્વારા આ સંસ્થાનો સંપર્ક કરવામાં આવ્યો હતો અને મદદ માંગી હતી. જોકે સાથી સેવા ગ્રુપને કોઇ શંકા જતા તેમણે સ્થળ પર તપાસ કરી. જ્યાં તેમને આ યુવતી પથારી વશ અને કોમાની હાલતમાં જોવા મળી હતી. સંસ્થાને ચોંકાવનારા દ્રશ્યો જોવા મળ્યા હતા. ત્યારબાદ સંસ્થાએ યુવતીને હોસ્પિટલ ખસેડવા માટે પ્રયાસ કર્યા હતા જોકે પરિવારજનો આ માટે સહમત થતા ન હતા. ત્યારબાદ સંસ્થા દ્વારા સ્થાનિક પોલીસની મદદથી આ યુવતીને બહાર કાઢી હતી. સંસ્થાએ 108 એમ્બ્યુલન્સ મારફતે યુવતીને રાજકોટની સિવિલ હોસ્પિટલ ખસેડી હતી. બીજી તરફ યુવતીના પરિવારજનો સામાજિક સંસ્થાના લોકોને ધમકાવતા હોવાનો આક્ષેપ કર્યો છે.
સામાજિક સંસ્થાના જણાવ્યા અનુસાર, યુવતીએ ખાધુ-પીધુ ન હોવાથી છેલ્લા 2 દિવસથી કોમોમાં હતી. ડૉક્ટરોના જણાવ્યા અનુસાર, આ યુવતીને છેલ્લા 8 દિવસથી તેને પાણી પણ આપવામાં આવ્યુ નથી. આ યુવતીના પરિવારજનો દ્વારા યુવતીની સારવાર માટે અનેક લોકો પાસેથી રૂપિયા મેળવવામાં આવતા હતા. પરંતુ તેઓ સારવાર માટે તૈયાર ન હતા. હાલમાં આ સંસ્થા દ્વારા પોલીસનો સંપર્ક કરવામાં આવ્યો છે અને આ અંગે યોગ્ય કાર્યવાહી કરવાની માંગ કરી છે.