રવિવાર એટલે કે આજથી દેશના તમામ પુખ્ત વયના લોકો માટે કોરોનાના બૂસ્ટર ડોઝનો પ્રારંભ થઈ રહ્યો છે.
આજથી દેશભરમાં કોરોનાના બૂસ્ટર ડોઝનો પ્રારંભ
18 વર્ષથી ઉપરની ઉંમરના લોકોને મળશે
કોરોનાના બૂસ્ટર ડોઝમાં કોવિશિલ્ડ અને કોવેક્સિન મળશે
કોવિન એપ પર કરાવવું પડશે બુકિંગ
કેન્દ્ર સરકારે આ અઠવાડિયાની શરૂઆતમાં તેની જાહેરાત કરી હતી. ભારતમાં કોરોના વાયરસના નવા સબ વેરિઅન્ટ xeના કેસોની વચ્ચે આ જાહેરાત કરવામાં આવી હતી. અગાઉ, ફક્ત આરોગ્ય કર્મચારીઓ, ફ્રન્ટલાઈન વર્કર્સ અને 60 વર્ષથી વધુ ઉંમરના લોકો જ ત્રીજા ડોઝ માટે પાત્ર હતા.ખાનગી રસીકરણ કેન્દ્રો પર તમામ પુખ્ત વયના લોકો માટે કોવિડ -19નો બૂસ્ટર ડોઝ ઉપલબ્ધ રહેશે. આ દરમિયાન સરકારી કેન્દ્રો પર સરકારનું નિ:શુલ્ક રસીકરણ અભિયાન ચાલુ રહેશે. અહીં, વૃદ્ધો, ફ્રન્ટલાઈન વર્કર્સ અને આરોગ્ય કર્મચારીઓ કે જેમણે પ્રથમ અને બીજો ડોઝ મેળવ્યો છે તેમને બૂસ્ટર ડોઝ આપવામાં આવશે.
બુસ્ટર ડોઝમાં કઈ રસી?
બુસ્ટર ડોઝ માટે, તમને તે જ રસી આપવામાં આવશે જે તમે તમારા પ્રથમ અને બીજા ડોઝ તરીકે લીધી છે. ઉદાહરણ તરીકે, જો તમને તમારા પ્રથમ અને બીજા ડોઝના સમયે કોવિશિલ્ડ આપવામાં આવી હોય તો તમને કોવિશિલ્ડનો સમાન બૂસ્ટર ડોઝ આપવામાં આવશે.
તેની કિંમત શું હશે?
હેલ્થકેર વર્કર્સ, ફ્રન્ટલાઈન વર્કર્સ અને વૃદ્ધોને બાદ કરતા બાકીના લોકોએ કોવિડ -19 પ્રીકોશન ડોઝ માટે ચૂકવણી કરવી પડશે. તે ખાનગી રસીકરણ કેન્દ્રો પર આપવામાં આવશે. શનિવારે જાહેરાત કરવામાં આવી હતી કે સીરમ ઇન્સ્ટિટ્યૂટ ઓફ ઇન્ડિયાની કોવિશિલ્ડ અને ભારત બાયોટેકની કોવેક્સિનના એક ડોઝની કિંમત હવે ખાનગી હોસ્પિટલોને 225 રૂપિયા થશે. અગાઉ તે અનુક્રમે 600 રૂપિયા અને 1,200 રૂપિયા પ્રતિ ડોઝ હતો.
બુકિંગ કેવી રીતે કરવું
કેન્દ્ર સરકારે શનિવારે સ્પષ્ટતા કરી હતી કે કોવિડ -19 રસીના પ્રીકોશન ડોઝ માટે લાભાર્થીઓએ કો-વિન પોર્ટલ પર ફરીથી નોંધણી કરાવવાની જરૂર નથી. કેન્દ્રીય આરોગ્ય સચિવે કહ્યું કે તમામ લાભાર્થીઓ પહેલેથી જ કોવિન પર નોંધાયેલા છે. કોવિડ -19 પ્રીકોશન ડોઝ સ્લોટને બુક કરવા માટે તમારે ફક્ત તમારા પૂર્વ-નોંધાયેલા મોબાઇલ નંબર સાથે કોવિન પોર્ટલ પર લોગ ઇન કરવાની જરૂર છે. પહેલા અને બીજા ડોઝ વખતે જે રીતે સ્લોટ હતો તે જ રીતે બુક કરાવવો પડે છે. તમે તમારું નજીકનું રસીકરણ કેન્દ્ર પસંદ કરી શકો છો અને પોર્ટલ પર અનુકૂળ તારીખ અને સમય બુક કરાવી શકો છો. તમે અગાઉથી ઓનલાઇન સ્લોટ બુક કરવાને બદલે વોક-ઇન રજિસ્ટ્રેશનનો વિકલ્પ પસંદ કરી શકો છો પરંતુ ખાતરી કરો કે તમે પ્રથમ પ્રીકોશન ડોઝ માટે પાત્ર છો.