હેલ્થ / તમારી ચાલવાની સ્પીડ જણાવે છે કે તમે કેટલા ઝડપથી વૃદ્ધ થઈ રહ્યા છો, જાણી લો

• ચાલવું એ સૌથી સસ્તી અને જરૂરી કસરત છે
• 45 વર્ષની વયે તમારી ગતિ ધીમી પડતી હોય તો ચેતો
• ચાલવાની સ્પીડ મગજ કેટલી ઝડપે વૃદ્ધત્વ તરફ જઇ રહ્યુ છે

ઉંમરની સાથે આપણી ચાલ થોડી ધીમી પડે તે સમજી શકાય તેવી વાત છે, પરંતુ માંડ 45 વર્ષની વયે તમારી ગતિ ધીમી પડતી હોય તો ચેતો. માત્ર ચાલવા પર ફોકસ કરવાના બદલે તેની ગતિ તરફ પણ ધ્યાન આપો. લંડનના સંશોધકોએ તાજેતરમાં કરેલા એક સંશોધન પરથી નક્કી કર્યુ કે વ્યક્તિ 40 વર્ષનું થાય તે પછી તેની ચાલવાની ગતિ પરથી નક્કી થાય છે કે તેનું મગજ કેટલી ઝડપે વૃદ્ધત્વ તરફ જઇ રહ્યુ છે. તમે કેટલા ઝડપથી ઘરડા થશો તે મિડલ-એજમાં તમારી વોકિંગ સ્પીડ કેટલી છે તેની પરથી નક્કી કરી શકાય.

55-65 વર્ષે તમારી ચાલવાની ગતિ ધીમી પડે તો....

આ અગાઉના અભ્યાસમાં તો એમ પણ કહેવાયુ હતુ કે 55-65 વર્ષે તમારી ચાલવાની ગતિ ધીમી પડે કે ચાલવામાં સંતુલનની તકલીફ પડે તો ડિમેન્શિયા કે બ્રેઇન ડિજનરેશનની શરુઆત હોઇ શકે. એક સંશોધનમાં તો એવુ પણ સાબિત થયું કે ધીમે ચાલનારા લોકોના ફેફસાં, દાંત, હાડકા અને ઇમ્યૂન-સિસ્ટમ સ્પીડ વોકર્સની સરખામણીએ ઓછા મજબૂત હોય છે. ધીમી ચાલ ધરાવતા લોકોનો ચહેરો પણ તેમની ઉંમર કરતા વધુ વૃધ્ધ હોય છે અને બ્રેઇનની સાઇઝ પણ નાની હોય છે. 

આ બધા અવલોકનો થોડું આશ્ચર્ય પમાડે એવા છે કેમકે ચાલવા જેવી સામાન્ય ક્રિયા પરથી વૈજ્ઞાનિકોએ ઝડપથી ઘડપણના આગમનની ભવિષ્યવાણી કરી છે. અત્યાર સુધી 65 વર્ષથી મોટી ઉંમરની વ્યક્તિનું ઓવરઓલ સ્વાસ્થ્ય તપાસવા માટે ફેફસાંની કાર્યક્ષમતા, મસલ્સની મજબુતાઇ, સંતુલન અને કરોડરજ્જુની તાકાત અને દ્રષ્ટિ જેવા પરિણામોની તપાસ કરતા હોય છે, પરંતુ હવે યંગ એજમાં તમારી ચાલવાની ગતિ પરથી તમારું ઘડપણ વહેલું આવશે કે મોડું એ કહી શકાય એમ છે. 

વોકિંગ સ્પીડ ઘટવાના કારણો

• મસલ્સમાં સ્ટિફનેસ અથવા મજબુતાઇનો અભાવ હોય તો પગ ઝડપથી ઉપડતા નથી
• ઝડપથી ચાલવાની કોશિશ કરો તો હાંફ ચડે, પરસેવો થાય તે હાર્ટબિટ્સ વધી જાય તો ફેફસા અને હ્રદયની ક્ષમતા ઘટી હોય અથવા આ બે અવયવોમાં તકલીફ હોય.
• સાંધામા ઓસ્ટિઓઆર્થ્રાઇટિસને કારણે પીડા થવાથી ચાલ ધીમી પડી જાય
• સ્થૂળતા વધવાના કારણે ચાલવાની ઝડપ ઘટી જાય છે