ક્રાઈમ કેપિટલ દિલ્હી / રાતે સહેલીઓએ કરી દારુની પાર્ટી, પરોઢિયે છોકરીએ બીજીને રસોડાનું ચપ્પું હુલાવીને મારી નાખી, પાછું નાટક રચ્યું

• દિલ્હીમાં વધુ એક સનસનીખેજ હત્યા
• એક સહેલીએ બીજીને છરીથી મારી નાખી
• મૃતક પિતાને ગાળો આપતાં છોકરી ઉશ્કેરાઈ હતી 

 ઉત્તર દિલ્હીના નોર્થ ડિસ્ટ્રિક્ટમાં સિવિલ લાઇન્સમાં એક યુવતીની હત્યા બાદ પોલીસે ખુલાસો કર્યો છે કે તેનો જીવ તેના રૂમ પાર્ટનરે લીધો હતો. રાની નામની યુવતીની હત્યા બાદ તેની મિત્ર સપનાએ પોતાનો ગુનો કબૂલી લીધો છે. પોલીસના જણાવ્યા પ્રમાણે દારુ પીધા બાદ બંને યુવતીઓ વચ્ચે ઝઘડો થયો હતો. નશાની હાલતમાં રાનીએ સપનાના મૃત પિતાને ગાળો આપી હતી આથી ઉશ્કેરાયેલી સપનાએ રસોડાના ચપ્પાથી રાનીને ગળાને ભાગે જોરદાર ઘા માર્યાં હતા જેમાં તેનું મોત થયું હતું.

હત્યા બાદ રચ્યું નાટક 
હત્યા બાદ પોતે પકડાઈ ન જાય એટલે સપનાએ એક નાટક રચ્યું હતું જોકે આખરે તે પકડાઈ ગઈ હતી. સિવિલ લાઇન્સના અરુણા નગરથી સવારે 7 વાગ્યાની આસપાસ પોલીસને એક કોલ મળ્યો કે એક છોકરીની હત્યા કરવામાં આવી છે. તરત જ પોલીસની ટીમ ઘટના સ્થળે પહોંચી અને સપના નામની એક છોકરી મળી. તેની રૂમ પાર્ટનર રાનીની હત્યા કરવામાં આવી હતી અને તે લોહીથી લથપથ હતી. સપનાએ પોલીસને જણાવ્યું હતું કે તે અગાશી પર હતી અને જ્યારે તે નીચે આવી ત્યારે રાની આ હાલતમાં મળી આવી હતી. શંકાના આધારે પોલીસે તેની પૂછપરછ શરૂ કરી હતી. તેના ફોન પરથી કેટલાક સંકેતો પણ મળ્યા હતા. આ પછી સપનાએ પોતાનો ગુનો કબૂલી લીધો હતો.

નેહાના ઘેર દારુ પાર્ટી કરી 
પોલીસ અધિકારીએ જણાવ્યું હતું કે, ગત રાત્રે સપના અને રાનીએ નજીકમાં રહેતી મિત્ર નેહાના ઘરે દારૂની પાર્ટી કરી હતી. ડિનર અને વાઈન પાર્ટી દરમિયાન 8-10 લોકો હાજર હતા. આ દરમિયાન તેમણે દારૂ પીધો હતો. ત્યાંથી પરત ફર્યા બાદ તેમણે ઘરે જ દારૂ પણ પીધો હતો. સવારે 4-5 વાગે રાની સાથે વધુ દારૂ પીવાને લઈને ઝઘડો થયો હતો. આ દુર્વ્યવહાર દરમિયાન રાનીએ સપનાના પિતાને ગાળો આપી પિતા માટે બોલાતી ગાળો જોઈને સપનાએ  પિત્તો ગુમાવ્યો હતો અને રસોડામાંથી છરી લઇને આવી હતી અને રાનીના ગળા પર ઘા માર્યાં હતા જેમાં તે ઢળી પડી હતી અને ત્યાં જ મરી ગઈ હતી. સપનાએ નેહાને વીડિયો કોલ કરીને કહ્યું કે કોઇએ આવીને રાનીને મારી નાખી છે. આ પછી તેણે પોલીસને પણ જાણ કરી હતી. જો કે શરૂઆતની તપાસ બાદ જ તસવીર સંપૂર્ણ રીતે સ્પષ્ટ થઇ ગઇ હતી. સપનાની ધરપકડ કરી લેવામાં આવી છે. પોલીસે હત્યાનો ગુનો નોંધી તપાસ શરૂ કરી છે. ફોરેન્સિક ટીમે ઘટના સ્થળેથી પુરાવા એકત્રિત કર્યા છે.