ચૂંટણી માટે તમારા કામનું / વોટ નાંખવા ક્યાં જવાનું? યાદીમાં નામ છે કે નહીં? ચૂંટણી પહેલા ચેક કરી લો આ 3 વેબસાઇટ

• ગુજરાતમાં વિધાનસભાની ચૂંટણી આગામી 1 અને 5 ડિસેમ્બરે યોજાશે 
• આ ત્રણ વેબસાઇટ ચૂંટણીમાં મત આપનાર માટે ઘણી મદદરૂપ 
• ઇલેકશનમાં કામ લાગે તેવી 3 વેબસાઈટ

હાલમાં ગુજરાત વિધાનસભાની ચૂંટણીના પડઘમ સંભળાઈ રહ્યા છે. ચૂંટણીને બસ હવે ગણતરી દિવસો બાકી રહ્યા છે એવામાં દરેક પાર્ટી તેનું પૂરું જોર લગાવીને ચૂંટણી પેચર કરી રહી છે. નેતાઓ ચૂંટણી પ્રચાર કરીને એમનું કામ કરી રહ્યા છે અને એ સામે પ્રજા એ આ ચૂંટણીમાં સારા ઉમેદવારની પસંદગી કરવા તેનો કીમતી મત આપીને તેનું કામ કરવું જોઈએ. ગુજરાતમાં વિધાનસભાની ચૂંટણી આગામી 1 અને 5 ડિસેમ્બરે યોજાનાર છે. જેમાં પ્રથમ તબક્કાનું મતદાન 1 ડિસેમ્બરે અને બીજા તબક્કાનું મતદાન 5 ડિસેમ્બરે યોજાશે. આ સાથે ગુજરાત વિધાનસભા ચૂંટણીની મતગણતરી 8 ડિસેમ્બરે થશે. 

એવામાં સામાન્ય જનતાને મત આપવાની તેની ફરજને પૂરી કરવા માટે કામમાં લગતી ત્રણ વેબસાઇટ વિશે આજે અમે તમને જણાવવા જઈ રહ્યા છીએ. આ વેબ સાઇટની મદદથી તમે તમારા વોટર આઈડી કાર્ડની માહિતી, તમે કઈ જગ્યાએ વોટ કરવા જઈ શકો છો, તમારા વોટિંગ કરવાના વિસ્તારમાં કયા ઉમેદવારે ફૉર્મ ભર્યું છે અને એ ઉમેદવારને લગતી તમામ પ્રકારની માહિતી વિશે જાણી શકો છો.  તો ચાલો જોઈએ કઈ છે એ ત્રણ વેબસાઇટ. 

1. Voter Portal
આ એક એવી વેબસાઇટ છે જે કોઈ પણ વોટરના ઇલેક્શન કાર્ડને લગતી માહિતી આપવા અને તેમાં કોઈ પણ ફેરફાર કરવા માટે બનાવવામાં આવી છે. આ વેબસાઇટ ઇલેક્શન કમિશન ઓફ ઈન્ડિયા દ્વારા બનાવવામાં આવી છે. વેબસાઇટનું નામ છે https://voterportal.eci.gov.in/ . આ વેબસાઇટ પર જઈને તમે તમારું એકાઉન્ટ બનાવીને તમારા વોટર આઈડી કાર્ડને લગતી દરેક માહિતી વિશે જાણી શકો છો અને સાથે જ એડ્રેસ, નામ, ફોટો જેવી કોઈ પણ માહિતી બદલવી હોય તો એ પણ કરી શકો છો. બસ આટલું જ નહીં જો તમારું ઇલેક્શન કાર્ડ ખોવાઈ ગયું છે અને નવું ઇલેક્શન કાર્ડ ઘરે માંગવુ છે તો તમે એ પણ કરી શકો છો. 

2. Electoral Roll
ભારતીય નાગરિકતા ધરાવતા અને 18 વર્ષથી ઉપરના કોઈ પણ વ્યક્તિને વોટ કરવાનો અધિકાર છે એ આપણે જાણીએ છીએ. જો કે વોટ કરવા માટે એ વ્યક્તિનું નામ મતદારોની યાદીમાં હોવું પણ જરૂરી છે. મતદાર યાદીમાં નામ વીના કોઈ વ્યક્તિ વોટ કરી શકતું નથી. એટલા માટે આ વેબસાઇટ પર એ ચેક કરી શકાય છે કે તમારું નામ મતદારોની યાદીમાં છે કે નહીં. મતદારોની યાદીમાં નામ છે તો તમારે કયા વિસ્તારમાં, કઈ જગ્યાએ અને કઈ તરીકે વોટ કરવા જવાનું છે એ વિશે દરેક માહિતી તમે આ વેબસાઇટ પરથી મેળવી શકો છો. આ વેબસાઇટ છે https://electoralsearch.in/ . જણાવી દઈએ કે ઇલેક્શન કમિશન ઓફ ઈન્ડિયાની વોટર સર્ચ વેબસાઇટ છે. 

3. Candidate Affidavit ECI
વોટ કરવા માટે ચૂંટણી લડવા ઉભેલ ઉમેદવાર વિશે જાણકારી હોવી ખૂબ જ જરૂરી છે. એક જાગૃત નાગરિક તરીકે વોટ આપતા પહેલા કોને વોટ આપવા જઈ રહ્યા છીએ એ વિશે જાણકારી હોવી જોઈએ. આ માટે ઇલેક્શન કમિશન ઓફ ઈન્ડિયા એ એક એવી વેબસાઇટ બહાર પાડી છે જએની મદદથી તમે કોઈ પણ ઉમેદવાર વિશે જાણી શકો છો. આ વેબસાઇટમાં જઈને તમે જોઈ શકો છો કે ચૂંટણી લડવા ઉભેલ ઉમેદવારે તેની એફિડેવિટ જમા કર્યા છે અને એ એફિડેવિટને તમે જોઈ શકો છો. આ સાથે જ કયા કયા લોકોએ અરજી કરી હતી અને કયા ઉમેદવારની અરજી સ્વીકારવામાં આવી અને કોની નામંજૂર કરવામાં આવી એ વિશે પણ જાણી શકાય છે. આ સાથે જ જે ઉમેદવાર ચૂંટણી લડવા ઊભા છે તેની એફિડેવિટ તમે જોઈ શકો છો. એટલે કે એ ઉમેદવાર પાસે કેટલી મિલકત છે એ સહિત દરેક માહિતી તમે જોઈ શકો છો. આ વેબ સાઇટ છે https://affidavit.eci.gov.in/ . તેની મદદથી તમે તમારા વિસ્તારમાં ઉભેલા ઉમેદવારની દરેક માહિતી જાણી શકો છો.