ગુજરાતમાં આગામી 48 કલાકમાં કમોસમી વરસાદની આગાહી કરાઈ છે જેમાં સૌરાષ્ટ્ર, ગાંધીનગર અને અમદાવાદમાં વાદળછાયું વાતાવરણ જોવા મળી શકે છે.
ગુજરાતમાં 48 કલાક સુધીમાં વરસી શકે છે કમોસમી વરસાદ
સૌરાષ્ટ્રમાં વરસાદની સાથે તેજ પવન ફૂંકાવાની પણ આગાહી
ગાંધીનગર, અમદાવાદમાં રહેશે વાદળછાયુ વાતાવરણ
હવામાન વિભાગની આગાહી અનુસાર આવનારા 48 કલાકમાં ગુજરાતના અનેક વિસ્તારોમાં વાદળછાયું વાતાવરણ જોવા મળી શકે છે. ગાંધીનગર અને અમદાવાદ સહિત સૌરાષ્ટ્રના અનેક વિસ્તારોને હવામાનની અસર પ્રભાવિત કરી શકે છે. કેટલાક વિસ્તારમાં 40 કિલોમીટર પ્રતિ કલાકની ઝડપે પવન ફૂંકાવાની આગાહી પણ કરવામાં આવી છે.
ગઈકાલે આવું રહ્યુ અનેક જગ્યાએ હવામાન
ગઈકાલે સાબરકાંઠા જિલ્લામાં મોડી રાતથી વાતાવરણમાં પલટો જોવા મળી રહ્યો છે અને ઠંડી હવા ચાલી હી છે. તો અન્ય તરફ હિંમતનગરમાં રાત્રી દરમિયાન કમોસમી વરસાદી છાંટાનો નગરજનોએ અનુભવ કર્યો હતો. અહીં પવન સાથે સામાન્ય વરસાદી છાંટા પડ્યા હોવાનું પણ જાણવા મળી રહ્યું છે. અનેક વિસ્તારોમાં ગઈકાલે વહેલી સવારથી આકાશમાં કાળા વાદળો છવાયા હતા જેના પરિણામે શહેરીજનોને ગરમીથી થોડી રાહત મળી હતી.
થોડા દિવસ અગાઉ પણ કરાઈ હતી આગાહી
ગુજરાતમાં કમોસમી વરસાદની આગાહી છેલ્લા એક અઠવાડિયાથી કરવામાં આવી રહી છે. અરબી સમુદ્રમાં સાઈક્લોનિક સર્ક્યુલેશનની અસરના કારણે અમદાવાદ, બનાસકાંઠા, પાટણમાં વરસાદની આગાહી કરાઈ છે. મોરબી, કચ્છ, બોટાદ, સુરેન્દ્રનગરમાં વરસાદની આગાહી કરાઈ છે. વરસાદી છાંટાથી લઇને ઝાપટા પડવાની શક્યતા પણ હવામાન વિભાગે કરી છે. આગામી 4 દિવસોમાં ગરમીનો પારો વધવાની શક્યતા સેવાઈ રહી છે.