VIDEO / હિરો જૈસે નાચ કે દિખાઉં….રાજકોટમાં ટલ્લી થઈને ટોળાંનો ડાન્સ, એકની અટકાયત

• રાજકોટમાં બંધ ઑફિસમાં દારૂની પાર્ટી
• ગઇકાલે સાંજે દારૂ પાર્ટી યોજાઇ હતી
• રાજકોટ B ડિવિઝન પોલીસે એકની કરી અટકાયત 
   

બોટાદમાં કથિત લઠ્ઠાકાંડમાં 55 લોકોના મોત નીપજ્યા. આ ગંભીર ઘટના બાદ રાજ્યની પોલીસ સફાળી જાગી છે. મહાનગરો તથા વિવિધ જિલ્લાઓમાં દારૂબંધીની પોલ ખોલતી ઘટનાઓ બની રહી છે. ક્યાંક દૂધના પાઉચની જેમ દેશી દારૂ વેચાય છે તો ક્યાંક જમીનમાં દેશી દારૂના પીપળા મળી આવે છે. ક્યાંક યુવાનો જાહેરમાં દારૂ પાર્ટી કરતા ખચકાતા નથી તો ક્યાંક બંધ બારણે દારૂની છોળો ઉડી રહી છે. ત્યારે આવો જ એક  વીડિયો સામે આવ્યો છે રાજકોટમાંથી..

રાજકોટમાં બંધ ઑફિસમાં દારૂની પાર્ટીનો વીડિયો વાયરલ

ગુજરાતમાં દારૂબંધી છે પરંતુ ક્યાં તે સવાલ અત્યારે સૌ કોઇને થઇ રહ્યો છે. કારણ કે ગુજરાતમાંથી દારૂબંધીના નિયમો નેવે મૂકતી અનેક ઘટનાઓ સામે આવી રહી છે ત્યારે રાજકોટમાં બંધ ઑફિસમાં દારૂ પાર્ટી થતી હોવાનો વીડિયો સામે આવ્યો છે. બુધવારના રોજ રાત્રિના સમયે દારૂ પાર્ટી યોજાઇ હતી.આ વીડિયોમાં 15 જેટલા વ્યક્તિઓ જોવા મળી રહ્યા છે. એક તરફ દારૂ પાર્ટી થઇ રહી છે તો બીજી તરફ દારૂના નશામાં ચૂર થઇને ફિલ્મી ગીતો પર ડાન્સ કરી રહ્યા છે. આ વીડિયો માલવિયા નગર પોલીસ સ્ટેશન વિસ્તારનો હોવાની ચર્ચા છે. બી ડિવિઝન પોલીસે એક શખ્સની અટકાયત કરી હોવાનું સામે આવ્યું છે જો કે આ વીટીવી વાયરલ વીડિયોની પુષ્ટિ કરતું નથી. 

અગાઉ યુવાનોની દારૂ પાર્ટીનો વીડિયો આવ્યો હતો સામે 

તો થોડા દિવસ અગાઉ રાજકોટના જસદણ વિસ્તારનો એક વીડિયો સામે આવ્યો હતો. જેમાં પાંચ યુવાનો ખુલ્લેઆમ દારૂની છોળો ઉડાડીને ટલ્લી બન્યા હતા. દારૂ પીને જાહેર માર્ગ ઉપર છાકટા બન્યા હતા. પીલે..પીલે ઓ મેરે રાજા ગીત પર યુવાનો બોટલો લઇને ઝૂમતા જોવા મળી રહ્યા હતા. આ વીડિયો સોશિયલ મીડિયામાં વાયરલ થતા જિલ્લા પોલીસે આરોપીઓને શોધવા માટેની તજવીજ હાથ ધરી હતી.