કચ્છની મહિલા પોલીસે કર્યુ દિલ જીતનારુ કાર્ય, વૃદ્ધા બેભાન થઇ જતા 5કિમી પીઠ પર બેસાડીને આરોગ્ય કેન્દ્રમાં સારવાર માટે લઇ ગયા
રાપર પોલીસ સ્ટેશનની સરાહનીય કામગીરી
રણમાં વૃદ્ધા બેભાન થતાં પોલીસ આવી મદદે
વૃદ્ધાને પીઠ પર ઉપાડી 5 કિલોમીટર ચાલ્યા મહિલા પોલીસ કર્મી
સેવા, શાંતિ અને સુરક્ષા જાળવવાનું કામ પોલીસ કરે છે. કાયદો અને વ્યવસ્થા સચવાય તેનું પોલીસ ધ્યાન રાખે છે. જો કે આ ઉપરાંત ગુજરાત પોલીસ ક્યારેય માનવતા નથી ભૂલી. પોતાની ફરજ ન હોવા છતાં પણ અનેકવાર સેવાકીય કાર્યોમાં પોલીસનું વિશેષ ફાળો રહ્યો છે. આપણે આવા પોલીસકર્મીઓ કોરોના કાળમાં જોયા છે. ત્યારે કચ્છની મહિલા પોલીસે ફરી એકવાર ગુજરાત પોલીસની સન્માનમાં વધારો કર્યો.
વૃદ્ધાને પીઠ પર ઉપાડી 5 કિલોમીટર ચાલ્યા મહિલા પોલીસ કર્મી
કચ્છનો સુકો રણપ્રદેશ. ઉનાળામાં કેવી આકરી ગરમી હોય તેની વાત ન પૂછો. ત્યારે આવા સમયમાં કચ્છ પોલીસની સરાહનીય કામગીરીએ લોકોના દિલ જીતી લીધા છે. ખડીરના સફેદ રણમાં એક વૃદ્ધા બેહોશ થઇ ગયા હતા. આ વાતની ખબર પડતા જ રાપરના મહિલા પોલીસ પાણી લઇને સફેદ રણ સુધી દોડી આવ્યા. મહિલા પોલીસ વર્ષાબેન પરમારે વૃદ્ધાને પાણી આપતા તેઓ હોશમાં તો આવ્યા પરંતુ વૃદ્ધાની તબિયત ખરાબ હતી. વળી પાછો રહ્યો રણ પ્રદેશ એટલે વાહનની પણ કોઇ સુવિધા નહી. એટલે મહિલા પોલીસે વૃદ્ધાને ખભા પર ઉપાડીને 5 કિમી દૂર આવેલા આરોગ્ય કેન્દ્ર ખાતે સારવાર માટે પહોંચાડ્યા.
ભંજડા દાદાના મંદિર વૃદ્ધા દર્શન કરવા જતા હતા
ખડીરના સફેદ રણમાં એક મોટો ડુંગર આવેલો છે આ ડુંગર ઉપર જૂના ભંજડા દાદાનુ મંદિર આવેલું છે. અહીં મોરારિ બાપુની કથા યોજાઇ હતી. વળી દાદાના દર્શન કરવા ભક્તો અવારનવાર પગપાળા આવતા હોય છે. ત્યારે 86 વર્ષના એક વૃદ્ધા પણ પગપાળા મંદિરના દર્શન કરવા આવ્યા હતા. પરંતુ ભારે ગરમીને કારણે તેઓ ડુંગર પર ચઢતા ચઢતા ચક્કર ખાઇને પડી ગયા. વળી રણપ્રદેશ હોવાથી આસપાસ પાણી ન મળવાને લીધે બેહોશ થઇ ગયા હતા.
મહિલા પોલીસની બિરદાવી કામગીરી
ત્યારે રાપરના મહિલા પોલીસ વર્ષા પરમારે 86 વર્ષીય વૃદ્ધાનો જીવ બચાવીને ખરા અર્થમાં સેવા, સુરક્ષા અને શાંતિના સ્લોગનને સાર્થક કર્યું છે. આ અંગે પૂર્વ કચ્છ પોલીસ વડા મહેન્દ્ર બગડીયાએ વર્ષાબેનની કામગીરીની બિરદાવી હતી. તેમણે કહ્યુ કે, પોલીસ હર હંમેશ સેવા માટે તત્પર હોય છે. કાયદો અને વ્યવસ્થા જાળવવા માટે તેમજ કુદરતી આફતો અને વૃદ્ધો માટે તેમજ મહિલા બાળકો માટે અને કાયદો વ્યવસ્થા જાળવવા માટે દરેક પોલીસ કર્મચારીઓ તત્પર રહે છે અને લોકોની સેવા કરી રહ્યા છે.