વડોદરાના નવાપુરા વિસ્તારમાં ગેસ બિલ નહીં ભરનાર 31 ગ્રાહકોના જોડાણ કાપી દેવાયા છે.
વડોદરા ગેસના બિલ નહીં ભરનાર ગ્રાહકો પર તવાઈ
ગેસ બિલ નહીં ભરનાર 31 ગ્રાહકોના જોડાણ કપાયા
6 મહોલ્લામાંથી 7.29 લાખની વસૂલાત કરવામાં આવી
વડોદરાના નવાપુરા વિસ્તારમાં ગેસના બિલ નહીં ભરનાર ગ્રાહકો પર ગેસ વિભાગે તવાઈ બોલાવી છે. શહેરના નવાપુરા વિસ્તારમાં રૂ. 3.94 કરોડ બાકી બિલ વસૂલવા ઝુંબેશ હાથ ધરાઇ છે. ગેસ વિભાગે કાર્યવાહી કરતા ગેસ બિલ નહીં ભરનાર 31 ગ્રાહકોના જોડાણ કપાયા છે. 6 મહોલ્લામાંથી 7.29 લાખની વસુલાત કરવામાં આવી.
કનેક્શન કટ કરવાની કાર્યવાહી હાથ ધરાતા બિલ બાકીદારોમાં ફફડાટ
જણાવી દઇએ કે, પાલિકા અને ગેઇલ કંપનીના સંયુક્ત સાહસ વડોદરા ગેસ લિમિટેડ દ્વારા શહેરમાં ઘરગથ્થુ ગેસનો પાઈપ મારફતે પુરવઠો પૂરો પડાય છે. જેમાં નવાપુરા વિસ્તારના અલગ-અલગ મહોલ્લામાં 1121 ગ્રાહકોના રૂ. 3.94 કરોડ બાકી હોવાનું ધ્યાને આવતાં ગેસ વિભાગે તેની કડક ઉઘરાણી શરૂ કરી દીધી છે. જો કે, બાકી વસૂલાતને ધ્યાનમાં રાખીને ગેસ કંપનીએ પોલીસની મદદ લઈને સપાટો બોલાવતા તેમજ ગેસ કંપની દ્વારા કનેક્શન કટ કરવાની કાર્યવાહી હાથ ધરાતા બિલ બાકીદારોમાં ફફડાટ ફેલાયો છે.
ઉલ્લેખનીય છે કે, વડોદરા ગેસ કંપની દ્વારા પાઈપલાઈથી જે ગેસનો પુરવઠો આપવામાં આવે છે તે પુરવઠાના ઉપયોગ બાદ બિલો આપવામાં આવે છે. પરંતુ તેની રકમ કેટલાંક ગ્રાહકો સમયસર ભરપાઈ નથી કરતા હોતા. આથી, તેને ધ્યાનમાં રાખીને વડોદરા ગેસ કંપની દ્વારા અવારનવાર બાકી બિલોની વસૂલાત કરવાની કાર્યવાહી કરવામાં આવે છે.
સોમવારે સવારથી ગેસ વિભાગની અલગ-અલગ ટીમોએ નવાપુરાના કહાર મહોલ્લા, પરદેશી ફળિયા, કોઠી પોળ, કાછિયા પોળ અને કબીર મંદિર ફળિયા અને જૂની કાછિયાવાડમાં ચેકિંગ હાથ ધર્યું હતું. જેમાં બાકી બિલના રૂ. 7.29 લાખ વસૂલ્યા હતા. જ્યારે ગ્રાહકોએ બિલ નહીં ભરતાં 31 જેટલાં કનેક્શનને તાત્કાલિક ધોરણે બંધ કરી દેવાયા હતાં. બીજી તરફ બાયપાસ કનેક્શનમાં 3 મીટર બદલવાની પણ કાર્યવાહી હાથ ધરાઇ હતી.