ક્રૂરતા / લગ્ન પ્રસંગમાં ભાન ભૂલ્યા લોકો, ઘોડીને સુવડાવી તેના પર બાઈક ચડાવી ડાંસ કર્યાં

• લગ્ન પ્રસંગમાં ભાન ભૂલ્યા લોકો
• ઘોડી પર આચરી ક્રૂરતા
• વીડિયો વાયરલ થતાં પોલીસ એક્શનમાં આવી

રાજસ્થાનના ઉદયપુર જિલ્લાના માવલી પોલીસ સ્ટેશન હદ વિસ્તારમાં માનવતા નેવે મુકી હોવાનો એક કિસ્સો સામે આવ્યો છે. માવલી વિસ્તારમાં એક પરિવારમાં લગ્ન હતા. આ દરમિયાન ઘોડીને જમીન પર સુવડાવીને  તેના પર બાઈક મુકી દીધું હતું, જે બાદ બાઈક પર ચડીને એક શખ્સ ડાંસ કરવા લાગ્યો હતો. આ પ્રકારના કરતબ અને ડાંસનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયો સામે આવ્યા બાદ પશુ ક્રૂરતા નિવારણના અધિકારી દયાલ ગોરાએ માવલીએ પોલીસ સ્ટેશનમાં ફરિયાદ નોંધાવી છે. 

પોલીસે 3 આરોપીની કરી ધરપકડ

પોલીસ પ્રભારી શંદ્ર શેખર કિલાનિયાએ જણાવ્યું હતું કે, દીન દયાલ ગોરાએ ઈમેલ દ્વારા આ વીડિયો મોકલીને પશુ અત્યાચારની ફરિયાદ નોંધાવી છે. તેના પર પોલીસે તપાસ કરીને 3 આરોપીઓની ધરપકડ કરી છે. પોલીસ પ્રભારીનું કહેવું છે કે, માવલીના ગડવાડા નિવાસી મોહન દાનના ઘરે લગ્ન હતા. જેમાં કાલૂરામ ગાયરી પોતાની ઘોડી લઈને આવ્યો હતો. કાલૂરામ સાથે ચેતન સરગરાએ કરતબ બતાવવા માટે ઘોડીને જમીન પર સુવડાવી અને તેના પર બાઈક રાખી ખુદ ઉપર ચડી ડાંસ કરવા લાગ્યો.

સોશિયલ મીડિયા પર વાયરલ થયો આ વીડિયો

આ મામલાનો વીડિયો સામે આવ્યા બાદ પોલીસ એક્શનમાં આવી છે. પોલીસે મોહનદાનના પુત્ર હમીર ચારણ નિવાસી ગડવાડા, કાલૂરામ પુત્ર નારાયણ ગાયરી નિવાસી કાનરખેડા અકોલા ચિતૌડગઢ અને ચેતન પુત્ર પુરુષોત્તમ સરગરા નિવાસી તાણા અકોલાની ધરપકડ કરવામાં આવી છે. મંગળવારના રોજ તેમને કોર્ટમાં હાજર કરવામાં આવશે.