રેસિપી / ડિનરમાં ટ્રાય કરી લો દાળ ફ્રાય, આ રીતે બનાવશો તો નહીં ભૂલાય સ્વાદ

દાળ-ફ્રાય

સામગ્રી

• ચાર ચમચા તુવેર દાળ
• ત્રણ ચમચા ચણા દાળ
• ત્રણ ચમચા મગદાળ
• ત્રણ ચમચા મસુર દાળ
• દોઢ કપ પાણી 
• એક ટામેટું સમારેલું
• એક મોટી ડુંગળી
• ચાર લસણની કળી
• અડધો ઈંચ આદુનો ટુકડો
• બે લીલા મરચા
• બે ચમચા ઘી
• ત્રણ લવિંગ
• એક ઈંચ તજનો ટુકડો
• અડધી ચમચી જીરું
• બે સુકા લાલ મરચા
• પા ચમચી ગરમ મસાલો
• પા ચમચી હળદર
• અડધી ચમચી લાલ મરચું
• એક ચમચી ધાણાજીરું
• મીઠું સ્વાદ અનુસાર
• બે ચમચા સમારેલી કોથમીર

રીત

બધી દાળને ધોઈને દસ મિનિટ પલાળી રાખો. પલળી જાય એટલે તેને કુકરમાં દાળ, મીઠું અને દોઢ કપ પાણી રેડીને મધ્યમ તાપે ચાર સીટી વાગે ત્યાં સુધી બાફો. પછી ગેસ બંધ કરી દો અને કુકરમાંથી જાતે વરાળ નીકળી જાય ત્યાં સુધી ખોલો નહીં. હવે એક પેનમાં ઘી ગરમ કરો. તેમાં જીરું, સુકા લાલ મરચા, તજ અને લવિંગનો વઘાર કરો. પછી તેમાં ડુંગળી ઉમેરીને મધ્યમ તાપે સાંતળો. એક મિનિટ સાંતળી લો પછી તેમાં આદુ, લસણ અને લીલા મરચા ઉમેરીને સાંતળો. પછી તેમાં ટામેટા અને મીઠું ઉમેરો. ટામેટા થોડા પાકી જાય એટલે તેમાં ગરમ મસાલો, ધાણાજીરું, લાલ મરચુ અને હળદર અને દાળ ઉમેરીને મિક્સ કરો. હવે તેમાં લીંબુનો રસ અને પોણો કપ પાણી રેડો અને મધ્યમ તાપે પાંચ મિનિટ પકાવો. વચ્ચે વચ્ચે તેને હલાવતા રહો. તૈયાર છે દાળ ફ્રાય. તેને કોથમીરથી ગાર્નિશ કરીને ભાત સાથે સર્વ કરો.