ગેરરીતિ / અમદાવાદઃ પશ્ચિમ ઝોનમાં છેલ્લાં પાંચ વર્ષમાં થયેલાં રોડનાં કરોડોના કામનો હિસાબ ગાયબ

• રોડના કામનાં પેમેન્ટ કે ફાઇનલ બિલનો વોર્ડ વાઇઝ રેકોર્ડ મળતો નથી
• મટીરિયલ્સ ટેસ્ટિંગ રિપોર્ટ તેમજ વજનનાં સર્ટિફિકેટ પણ લાપતા

પશ્ચિમ ઝોનના અનેક કોર્પોરેટર નીચલી કમિટીમાં ચેરમેનપદ શોભાવતા આવ્યા છે એટલે કે પશ્ચિમ ઝોન રાજકીય દૃષ્ટિએ પણ સમગ્ર શહેરમાં મોખરાનું સ્થાન ધરાવે છે, જેના કારણે સ્વાભાવિકપણે વિકાસનાં રોડ સહિતનાં કામ પણ આ ઝોનમાં સૌથી વધુ થતાં હોઇ શહેરના અન્ય ઝોન સાથે પક્ષપાતપૂર્ણ વ્યવહાર થતો હોવાના અવારનવાર આક્ષેપ થતા રહે છે.

પશ્ચિમ ઝોનના રોડ તેનાં વિવિધ કામ જેવાં કે પેચવર્ક, માઇક્રો સરફેસિંગ કે રોડ રિસરફેસિંગ તેમજ નવા રોડના મામલે હંમેશાં અગ્રતાનું સ્થાન ધરાવતા આવ્યા છે. પોલિટિકલી આગળ પડતો ઝોન હોઇ દર વર્ષે સામાન્યપણે રૂ.૧૦૦ કરોડનાં રોડનાં કામ થતાં આવ્યાં છે તેમ છતાં રોડનાં કામની ગેરરીતિમાં પણ પશ્ચિમ ઝોન નંબર વન છે.

ર૦૧૭ના  રોડ કૌભાંડમાં વિકાસ ગાંડો થયો છે તેવું સૂત્ર રાજ્યભરમાં ગાજતું કરનાર અને મ્યુનિસિપલ ઇજનેર વિભાગની રહીસહી આબરૂના લીરેલીરા ઉડાડનાર કૌભાંડમાં તાજેતરમાં મ્યુનિસિપલ તંત્ર દ્વારા જે તે સમયના પશ્ચિમ ઝોનના ઇજનેર વિભાગના અધિકારીઓ હરપાલસિંહ ઝાલા, પ્રકાશ વિંઝુડા, મેહુલ ખરાડી, મનોજ ડી. મજુમદાર અને સુરેશ પી. દત્તને પણ ચાર્જશીટ ફટકારાઇ છે. અન્ય દોષી અધિકારીઓમાં અન્ય ઝોનના હિતેશ કોન્ટ્રાક્ટર, નરેન્દ્ર મોદી, મનોજ એલ. સોલંકી વગેરેનો સમાવેશ થાય છે.

જાણકાર સૂત્રો કહે છે કે પશ્ચિમ ઝોનનાે ઇજનેર વિભાગ ફક્ત ર૦૧૭થી રોડ કૌભાંડમાં સંડોવાયેલ નથી, પરંતુ રોડનાં કામમાં ગેરરીતિનાં મૂળિયાં છેક પાંચ વર્ષ જૂનાં છે. છેલ્લાં પાંચ વર્ષ દરમિયાનના જે તે સમયના ઇજનેર વિભાગના અધિકારીઓ દ્વારા રોડનાં કામનાં પેમેન્ટ બિલ કે ફાઇનલ બિલના રેકોર્ડ રખાયા નથી, જેના કારણે વોર્ડ વાઇઝ રોડનાં કામનાં પેમેન્ટ કે ફાઇનલ બિલની માહિતી મળતી નથી. આ ખૂબ ગંભીર પ્રકારની ગેરરીતિ કે લાલિયાવાડી છે.

રોડ રિસરફેસિંગની કામગીરીમાં વપરાતા મટીરિયલ્સનું પેમેન્ટ બિલ કે ફાઇનલ બિલ તેના વજનના આધારે કરાતું હોય છે. જે સપ્લાયર્સ દ્વારા મટીરિયલ્સ મોકલાવાયું હોય તેના બિલમાં દર્શાવેલ વજન કયા આધારે સર્ટિફાઇ કર્યું છે તેનું સર્ટિફિકેટ પણ રખાતું નથી. જે મટીરિયલ્સ ટેસ્ટિંગ કરાવવાની શરતે મેળવ્યું હોય તો તેના ટેસ્ટ રિપોર્ટની નોંધ પણ ગાયબ છે. ખરેખર તો રોડનાં તમામ કામની વિગત વેબસાઇટ પર મૂકવી જોઇએ અને તેને નિયમિત અપડેટ કરવી જોઇએ. આના બદલે રોડનાં કામમાં નવા નવા પ્રયોગ કરીને શાસક પક્ષ પણ ગેરરીતિને પ્રોત્સાહન આપતો હોય તેમ ચર્ચાઇ રહ્યું છે.

તાજેતરમાં ઇજનેર વિભાગ અને કોન્ટ્રાક્ટરની મિલીભગતથી રોડનાં કામમાં દાટ વળાઇ રહ્યો હોવા છતાં મજબૂત રોડ બનાવવાના નવા વાયદા સાથે એક જ કંપનીનું રૂ.પ૩૬ કરોડનું ટેન્ડર મંજૂર કરાયું છે. મ્યુનિસિપલ કોર્પોરેશન ઇતિહાસમાં પહેલી વાર રૂ.૧૩૬ કરોડના વધારા સાથેનું આટલું મોટું જંગી ટેન્ડર એક જ કંપનીને અપાતાં ફરીથી નવા 
રોડ કૌભાંડની આશંકા જાગી છે.