ગરજ હોય તો આવો / Audio Viral: 'તમે અહેસાન નથી કરતાં અમારા પર'  નાઇટ કર્ફ્યૂના બહાને ટેક્સી ચાલકોની ખુલ્લી લુંટ

• નાઇટ કર્ફ્યૂના બહાને બેફામ લૂંટ
• ટેક્સી ડ્રાઇવરો વસૂલી રહ્યાં છે ડબલ ભાડૂં
• મહિલા સાથે કર્યું ગેરવર્તન

અમદાવાદમાં નાઇટ કર્ફ્યૂના બહાને ટેક્સી ચાલકો બેફામ બની ગયા છે. ટેક્સી ચાલકો રાત્રી સમયે મુસાફરો પાસેથી બે ગણું ભાડૂં વસૂલી રહ્યાં છે. ત્યારે કથિત ઓલા કંપનીના ડ્રાઇવર અને મહિલાનો ઓડિયો વાયરલ થયો છે. જેમાં ટેક્સી ચાલક રૂ.425 રૂપિયાના ભાડા સામે રૂ.790ની માગણી કરે છે. અને મહિલા સાથે ગેરવર્તન પણ કરે છે.

રૂ.425 રૂપિયાના ભાડા સામે રૂ.790 ભાડુ..!
રાત્રિ કર્ફ્યૂ હોવાથી ટેક્સી ચાલકો રાતના સમયે મુસાફરો પાસે અધધ ભાડૂં વસુલી રહ્યા છે .તથ્ય પ્રમાણે કથિત ઓલા કંપનીના ડ્રાઇવર અને મહિલાનો ઓડિયો વાયરલ થયો છે. જેમાં મહિલાએ કાર બુક કરાવી હતી જેનું ઓનલાઈન ભાડું રૂ.425 રૂપિયા હતું પણ ડ્રાઈવરને કોલ કરવામાં આવતા પેટ્રોલ ડીઝલના ભાવ વધારાનું બહાનું કાઢી  રૂ.790 સિવાય કોઈ ડ્રોપ કરવા નહિ આવે તેવો ચોખ કર્યો હતો. બાદમાં મહિલાએ ઓર્ડર કેન્સલ કરવાનું કહેતા 10 મીનીટ બાદ કેન્સલેશન ચાર્જ ચૂકવો પડશે તેમ કહી મહિલા સાથે ગેરશિસ્ત રીતે વાત કરી હતી. 

'પોલીસ ફરિયાદ કરી દો, તમે અમારા પર અહેસાન નથી કરતા'
મહિલા કંપનીમાં ફરિયાદ કરવાનું કહેતા સામેથી ડ્રાઈવરે રૌફ મારતા કહ્યું હતું કે કંપનીમાં શું પોલીસ સ્ટેશનમાં પણ ફરિયાદ કરવી હોય તો કરી નાખો, ભાડું જે હાલ ચાલે છે તે લેવાશે. જે બાદ મહિલાએ કહ્યું હતું કે તમે અમારા પર અહેસાન કરતા હોય તેમ કેમ વાત કરી રહ્યા છો, તો સામેપક્ષે ડ્રાઇવરે ઉગ્ર અવાજમાં કહ્યું હતું કે મેડમ તમે પણ અમારા પર અહેસાન નથી કરતાં બરોબર.. આમ રાત્રિ કર્ફ્યૂની આડ હેઠળ ડબલ ભાડાની વસૂલાત થઈ રહી હોવાનો વાયરલ ઓડિયો પરથી ઘટસ્ફોટ થયો છે.