સુરત મહાનગરપાલિકા દ્વારા વાહન ચલાવતી વખતે થૂંકતા અથવાતો કચરો ફેકતા લોકો પાસેથી દંડ વસૂલ કરવાની કામગીરી શરૂ કરવામાં આવી છે. હાલ આ કામગીરી અંતર્ગત 6થી વધુ લોકો પાસે દંડ વસૂલાઇ ચૂક્યો છે. અમદાવાર, રાજકોટ અને વડોદરા બાદ હવે સુરત મનપા પણ થૂંકવા ઉપર દંડ વસૂલ કરશે.
શું આપ સુરત આવી રહ્યા છો? શું આપ સુરતમાં રહો છો? જો આપ સુરતમાં બાઇક, રિક્ષા, કાર કે અન્ય વાહનની સફર કરી રહ્યા છો તો ભૂલથી પણ કચરો ફેંકતા પહેલા કે થૂંકતા પહેલા વિચાર કરજો. કારણ કે સુરત મહાનગર પાલિકા દ્વારા જાહેરમાં થૂંકતા અથવા તો કચરો ફેંકતા લોકોને ઇ-મેમો દ્વારા દંડ ફટકારવાની શરૂઆત કરી દેવામાં આવી છે. ગત 15 ઓગસ્ટથી આ દંડ વસૂલવાની કામગીરીની શરૂઆત કરવામાં આવી છે. સુરત શહેરના તમામ 8 ઝોનમાં લાગેલા પોલીસના સર્વેલન્સ કેમેરા દ્વારા મનપા લોકો ઉપર દંડ ફટકારી રહી છે. એટલે કે હવે થૂંકવા કે કચરો ફેંકવાના દંડનો મેમો સીધો આપના ફોટો સાથે આપના ઘરે આવશે.
થૂંકશો તો 1000 રૂપિયા સુધી થશે દંડ
સુરત શહેરમાં ક્રાઇમ ઉપર વોચ રાખવા માટે તમામ રસ્તાઓ ઉપર સીસીટીવી કેમેરા લગાવવામાં આવેલ છે. આ તમામ સીસીટીવી કેમેરાના હાલ સુરત મહાનગરપાલિકા સાથે જોડાણ કરી દેવામાં આવ્યા છે. આ કેમેરા થકીથી મનપાની નજર પણ આપના ઉપર રહેશે. એટલે કે આપ કોઇપણ સિગ્નલ કે ચાર રસ્તા ઉપર ઉભા છો અને આપના દ્વારા થૂંકવામાં આવે છે તો તાત્કાલિક કેમેરાની નજરથી આપને ઇમેમો આપના ઘરે આવી જશે. આ માટે દંડની જોગવાઇ કરવામાં આવી છે. મનપા આ માટે 1000 રૂપિયા સુધીનો દંડ વસૂલશે. તેથી જો આપને રસ્તા ઉપર ગંદકી કરવાની આદત હોય તો તાત્કાલિક સુધરી જજો અથવા તો દંડ ભરવા માટે તૈયાર થઇ જજો.
સુરત મનપા દ્વારા કરવામાં આવેલી પહેલ સારી કહેવાય. અને જ્યારે સુરતને સ્વચ્છ બનાવવાની વાતો કરવામાં આવતી હોય ત્યારે ગમે ત્યાં થૂંકી અથવા તો કચરો ફેંકી સુરતમાં ગંદકી ફેલાવનાર લોકો સામે આ પ્રકારે કાર્યવાહી થાય તે જરૂરી છે.