તહેવારની સીઝન શરૂ થવા જઇ રહી છે. આ પહેલાં ફરી એક વાર સસ્તું સોનું ખરીદવાની તક છે.
જો કે આ સોનું ફિઝિકલ નહીં પણ બોન્ડ તરીકે હશે. કેન્દ્ર સરકારની ગોલ્ડ બોન્ડ યોજના હેઠળ સસ્તા ભાવે સોનું ખરીદી શકાય છે. સોનાના ભાવ રિઝર્વ બેંક દ્વારા નક્કી કરવામાં આવે છે જે બજાર કિંમત કરતા ઓછા હોય છે.
આ વખતે ગોલ્ડ બોન્ડની કિંમત પ્રતિ ગ્રામ રૂપિયા 5,051 નક્કી કરવામાં આવી છે
રિઝર્વ બેંક ઓફ ઇન્ડિયા (RBI) દ્વારા આપવામાં આવેલી માહિતી મુજબ આ વખતે ગોલ્ડ બોન્ડની કિંમત પ્રતિ ગ્રામ રૂપિયા 5,051 નક્કી કરવામાં આવી છે. આ ઉપરાંત ઓનલાઇન અરજી કરવા અને ડિજિટલ માધ્યમ દ્વારા ચુકવણી કરનારા રોકાણકારોને 50 રૂપિયા પ્રતિ ગ્રામ છૂટ આપવાનો નિર્ણય લેવામાં આવ્યો છે. આવા રોકાણકારો માટે ગોલ્ડ બોન્ડની કિંમત પ્રતિ ગ્રામ 5,001 હશે.
ગોલ્ડ બોન્ડ યોજના અંતર્ગત 12 થી 16 ઓક્ટોબર સુધી સોનું ખરીદી શકાય છે. નોંધનીય છે કે આ સોનાને બોન્ડ તરીકે આપવામાં આવે છે. આનો અર્થ એ છે કે આ સોનાનો ઝવેરાતની જેમ ઉપયોગ કરી શકાતો નથી.
મેચ્યોરિટીની અવધિ આઠ વર્ષની
તેને ઇન્વેસ્ટમેન્ટ તરીકે પસંદ કરવામાં આવે છે. તેની મેચ્યોરિટીની અવધિ આઠ વર્ષની હોય છે અને પાંચ વર્ષ પછી તમે આ રોકાણમાંથી બહાર આવી શકો છો. ઓછામાં ઓછા એક ગ્રામ સોનામાં બોન્ડમાં રોકાણ કરી શકાય છે અને સામાન્ય માણસ માટે મહત્તમ રોકાણ મર્યાદા ચાર કિલોગ્રામ છે.
આ ખરીદવા માટે તમારે તમારી બેંક, BSE, NSE વેબસાઇટ અથવા પોસ્ટ ઓફિસનો સંપર્ક કરવો પડશે. તેને અહીંથી ડિજિટલી ખરીદી શકાય છે. આ એક પ્રકારનું સુરક્ષિત રોકાણ છે કારણ કે ત્યાં ન તો શુદ્ધતાની ચિંતા છે કે ન સુરક્ષાની સમસ્યા.
જો તમે આ વખતે સોનાની ખરીદી ચૂકી ગયા છો, તો તમારે નવેમ્બર સુધી રાહ જોવી પડશે. આ યોજના ફરીથી 9 નવેમ્બરથી 13 નવેમ્બર સુધી ખુલશે. નોંધનીય છે કે સરકારની યોજના શરૂ કરવાનો હેતુ આયાત અને ભૌતિક સોનાની માંગ ઘટાડવાનો છે.