ડિમાન્ડ / અમદાવાદમાં ફટાકટા બજારોમાં ખરીદીનો માહોલ, અલ્લુ અર્જૂન, એંગ્રી બર્ડ, મોદી ફટાકડાનો સૌથી વધુ ક્રેઝ, ભાવમાં તોતિંગ વધારો

• અમદાવાદમાં ફટાકટા બજારોમાં ગ્રાહકોનો ધસારો
• ઉત્પાદન 40થી 50 ટકા સુધી ઘટતા ભાવમાં 80 ટકા જેટલો વધારો 
• અવનવી વેરાઈટીના ફટાકટાની ડિમાન્ડ વધી

પ્રદૂષણને લઇ સુપ્રીમકોર્ટના કેટલાક નિર્દેશો અને ત્યારબાદ સરકારે બનાવેલા નિયમોથી ફટાકડાના ઉત્પાદનને ફટકો લાગ્યો છે. ઉત્પાદન ઘટતા 80 ટકા જેટલો ભાવ વધારો તો આવ્યો છે. પણ તેમ છતાં ભારતના લોકોનો સૌથી ધામધુમથી દિવાળીને ઉજવશે, આ વખતે તહેવારને ખાસ બનાવવા બજારમાં અવનવા ફટાકડા આવી ચુક્યા છે. જેમાં અલ્લુ અર્જૂન, પ્રભાસ, ડોરેમોન, PM મોદી ફટાકડાનો ક્રેઝ સૌથી વધુ છે.

દિવાળી નજીક આવતા જ અમદાવાદ સહિતની બજારોમાં ભીડ જોવા મળતી હોય છે ત્યારે અમદાવાદના દિલ્લી દરવાજા ખાતેની ફટકાડા બજારમાં પણ વિવિધ પ્રકારના ફટાકડાઓ પહોંચી ચૂક્યા છે. ઉલ્લેખનીય છે કે દેશમાં ટ્રેન્ડમાં રહેલા લોકોના ફોટો દર વર્ષે ફટાકડાઓના બોક્સ પર અથવા તો તેના નામથી વેચાતા હોય છે

ત્યારે આ વર્ષે પણ પુષ્પા ફેમ અલ્લુ અર્જૂન, પ્રભાસ, ડોરેમોન, PM મોદી સહિતના ફોટાવાળા ફટાકડાઓ બજારમાં પહોંચી ચુક્યા છે. બાળકોની પસંદને ધ્યાને રાખી આ વર્ષે ડોરેમોન કલર્સ, હેલિકોપ્ટર, ચોપર્સ અને એરો બસ જેવા ફટાકડાઓ પણ લાવવામાં આવ્યા છે.

આ વર્ષે ફટાકડાઓનું ઉત્પાદન 40થી 50 ટકા સુધી ઘટતા ભાવમાં 80 ટકા જેટલો વધારો નોંધાયો છે. તેમ છતા પણ વેપારીઓ માની રહ્યાં છે કે કોરોનાના કારણે છેલ્લા 2 વર્ષથી ધંધો ઠપ્પ હતો જે હવે કોરોનાના કેસો ઓછા થતા લોકો ખરીદી માટે આવશે અને તેમના ધંધાને વેગ મળશે તેવો આશાવાદ પણ વ્યક્ત કર્યો હતો.