નવી દિલ્હી / આજે માર્કેટમાં સારી શરૂઆત પણ સેન્સેક્સ ઘટ્યો, બજેટના દિવસે રજા છતાં શેરબજાર ચાલુ

• શેરબજારની આજે મજબૂત શરૂઆત
• સેન્સેક્સ આજે ૧૪૩ પોઇન્ટના ઉછાળા સાથે ૪૧,૪૬૭ પર
• નિફ્ટી ૪૮ પોઇન્ટના ઉછાળા સાથે ૧૨,૨૧૮ પર ખૂલી

બજારને આજે રિલાયન્સ, એસબીઆઇ અને આઇટી શેરથી સપોર્ટ મળી રહ્યો છે. આઇટી શેરમાં સૌથી વધુ લેવાલી જોવા મળી રહી છે. ઈન્ફોસિસના શેરમાં બે ટકાનો ઉછાળો જોવા મળી રહ્યો છે. ઇન્ડિયા માર્ટ ઇન્ટરમેશના શેરમાં ૧૧ ટકાનો ઉછાળો જોવા મળ્યો હતો અને આ શેર રૂ. ૨,૩૧૫ની સપાટીએ પહોંચી ગયો છે. 

આજે સૌથી વધુ ઘટાડો ૩.૫ ટકાનો ઓએનજીસીના શેરમાં જોવા મળ્યો છે. સન ફાર્માના શેરમાં ૧.૧૪ ટકાનો, ટીસીએસ અને એસબીઆઇના શેરમાં અનુક્રમે ૧.૦૭ અને ૦.૮૩ ટકાનો ઉછાળો જોવા મળ્યો છે. એનટીપીસીનો શેર ૨.૨ ટકા ગગડી ગયો હતો. પાવર ગ્રીડ, એશિયન પેઇન્ટ અને કોટક મહિન્દ્રાના શેરમાં અનુક્રમે ૨.૨૭ ટકા, ૦.૭૯ ટકા અને ૦.૧૫ ટકાનો ઘટાડો જોવા મળ્યો છે. આજે એલએન્ડટીનાં પરિણામો જાહેર થનાર છે અને બજારની તેના પર મીટ છે. કંપનીના નફામાં સો ટકાનો ઉછાળો આવવાની અપેક્ષા છે.

રૂપિયાની શરૂઆત આજે મજબૂત થઇ હતી. ડોલર સામે રૂપિયો સાત પૈસા વધીને ૭૧.૧૩ની સપાટીએ ખૂલ્યો હતો, જ્યારે ગઇ કાલે રૂપિયો ડોલર સામે ૧૦ પૈસા તૂટીને ૭૧.૨૦ની સપાટીએ બંધ રહ્યો હતો.

રજાના દિવસે શેરબજાર ચાલુ રહેશે

બીએસઈ (BSE)એ સર્ક્યુલર જારી કરીને જણાવ્યું છે કે ૧ ફેબ્રુઆરી, ૨૦૨૦ના રોજ શનિવાર હોવા છતાં બજેટ રજૂ થવાનું હોવાથી ઘરેલુ શેરબજાર ખુલ્લાં રહેશે અને ટ્રેડિંગ ચાલશે. પ્રથમ વાર એવું બની રહ્યું છે કે જ્યારે બજેટની રજૂઆતના દિવસે રજા હોવા છતાં ઘરેલુ શેરબજારનું કામકાજ ચાલુ રહેશે. 

આ અગાઉ તત્કાલીન નાણાપ્રધાન અરુણ જેટલીએ ૨૮ ફેબ્રુઆરી, ૨૦૧૫ના રોજ શનિવારે બજેટ રજૂ કર્યું હતું, પરંતુ તે દિવસે શેરબજાર બંધ રહ્યાં હતાં. ૧ ફેબ્રુઆરી, ૨૦૨૦ને શનિવારે સવારના સાત વાગ્યે લોગ ઇન શરૂ થશે અને નવ વાગ્યા સુધી લોગ ઇન સેશન રહેશે. ત્યારબાદ નવ વાગ્યે પ્રી ઓપન અને સ્પેશિયલ પ્રી ઓપન સેશન આઇપીઓ માટે શરૂ થશે.

દરમિયાન સવારના ૯.૧૫થી ટ્રેડિંગ શરૂ થશે અને બજાર બપોરના ૩.૩૦ વાગ્યે બંધ થશે. દલાલ સ્ટ્રીટને આ બજેટ અંગે ઘણી અપેક્ષા છે. ખાસ કરીને બજેટમાં ત્રણ સેક્ટરમાં રાહતની આશા છે, જેમાં વપરાશ વધારવા પર્સનલ ટેક્સમાં રાહત, MSME સેક્ટર માટે રાહત અને વિદેશી રોકાણકારોને આકર્ષવાની યોજનાનો સમાવેશ થાય છે.