લોકજાગૃતિ / અમદાવાદમાં સીટ બેલ્ટ વિના જતાં લોકોની કારને પોલીસે ઊભી તો રાખી પણ દંડ ન લીધો, 3 દિવસ ચાલશે મેગાડ્રાઈવ

•  અમદાવાદમાં સીટબેલ્ટની મેગા ડ્રાઇવ
•  3 દિવસ નહીં લેવાય કોઇપણ દંડ
•  પોલીસની કામગીરીને લોકોએ બિરદાવી

કેન્દ્ર સરકારે મંગળવારના રોજ કારમાં બેઠેલ દરેક વ્યક્તિ માટે સીટ બેલ્ટ બાંધવો ફરજિયાત કરી દીધો છે. જો કોઇ સીટ બેલ્ટ વિના પકડાશે તો તુરંત તેનું ચલણ કપાશે. એટલે કે તેને દંડ ભરવો પડશે. ત્યારે હવે અમદાવાદમાં પણ આજથી 3 દિવસ સુધી ટ્રાફિક પોલીસની સીટ બેલ્ટ ડ્રાઇવ શરૂ થઈ છે. પોલીસ દ્વારા લોકોની કારને રોકીને સીટ બેલ્ટ પહેરવા સમજાવવામાં આવી રહ્યા છે. આ ડ્રાઈવ ત્રણ દિવસ સુધી ચાલશે. 

લોકોમાં જાગૃતિ આવે તે મુખ્ય હેતુ

અમદાવાદ શહેર ટ્રાફિક પોલીસ આ સીટ બેલ્ટ ડ્રાઈવમાં કારમાં પાછલી સીટમાં બેઠલા લોકોને સીટ બેલ્ટ બાંધવા માટે જાગૃત કરી રહ્યા છે. આ ડ્રાઈવનો હેતું કારમાં સવાર તમામ લોકોમાં સીટ બેલ્ટ પહેરવાને લઈને જાગૃતિ આવે તે માટેનો છે. અમદાવાદ પોલીસની આ કામગીરીને શહેરીજનોએ બિરદાવી છે.

હવેથી કારમાં બેઠેલા તમામ લોકોએ સીટ બેલ્ટ પહેરવો ફરજિયાત
 
ઉલ્લેખનીય છે કે, કેન્દ્રીય માર્ગ અને પરિવહન મંત્રી નીતિન ગડકરીએ મંગળવારના રોજ મીડિયા ઇવેન્ટને સંબોધિત કરતા જણાવ્યું હતું કે, 'હવેથી કારમાં બેઠેલા તમામ લોકોએ સીટ બેલ્ટ ફરજિયાત પહેરવો પડશે. સાયરસ મિસ્ત્રીના મોત બાદ કેન્દ્ર સરકારે બેકસીટ યાત્રીઓની સુરક્ષા માટે મોટો નિર્ણય લીધો હતો. એટલે કે હવેથી કારમાં પાછળની સીટ માટે પણ સીટ બેલ્ટ જરૂરી છે. મીડિયા કાર્યક્રમને સંબોધિત કરતા તેઓએ કહ્યું હતું કે, "એક કાર અકસ્માતમાં સાયરસ મિસ્ત્રીના મોતના કારણે અમે આ નિર્ણય લીધો છે કે વાહનોમાં પાછળની સીટ માટે પણ સીટ બેલ્ટ બીપ સિસ્ટમ હશે.'

વધુમાં નીતિન ગડકરીએ જણાવ્યું કે, 'સરકાર વ્હિકલ નિર્માતાઓ માટે પાછળની સીટો માટે પણ સીટ બેલ્ટ એલાર્મ સિસ્ટમ મૂકવી ફરજિયાત બનાવવાની યોજના બનાવી રહી છે. હાલમાં તમામ વાહન ઉત્પાદકો માટે માત્ર આગળની સીટના મુસાફરો માટે જ સીટ બેલ્ટ રિમાઇન્ડર આપવાનું ફરજિયાત છે.'

આ મુદ્દે નીતિન ગડકરીએ ભારપૂર્વક જણાવ્યું હતું કે, આ નિયમનો ભંગ કરનારાઓ અને આ નિયમનો ભંગ કરનારાઓને દંડની સજા કરવામાં આવશે. સીટ બેલ્ટ ન હોવા બદલ ચલણ (શિક્ષાત્મક દંડ) ને મંજૂરી આપવામાં આવશે. આ આદેશનો અમલ 3 દિવસની અંદર કરાવવામાં આવશે.