ગુજ'રાજ' 2022 / ભાજપની શાખ સમાન બની સાણંદ બેઠક: ખુદ અમિત શાહે પ્રચાર કરી રચી સ્ટ્રેટેજી, જાણો શું છે સમીકરણ

• અમદાવાદ જિલ્લાની સાણંદ બેઠક ખૂબ મહત્વની
• ગાંધીનગર લોકસભા મતવિસ્તાર હેઠળ આવે છે સાણંદ બેઠક
• સાણંદ-બાવળા બેઠક પર આ વખતે ત્રિપાંખિયો જંગ થશે 
• આ બેઠક પર અમિત શાહ આપી રહ્યા છે ખાસ ધ્યાન

અમદાવાદ જિલ્લાની સાણંદ બેઠકને ખૂબ જ મહત્વની માનવામાં આવે છે. આ બેઠક ગાંધીનગર લોકસભા મતવિસ્તાર હેઠળ આવે છે જેના સાંસદ કેન્દ્રીય ગૃહમંત્રી અમિત શાહ છે. છેલ્લી કેટલીક ચૂંટણીઓમાં સાણંદ બેઠક પર ભાજપ અને કોંગ્રેસ વચ્ચે જોરદાર ટક્કર જોવા મળી રહી છે. છેલ્લી બે ચૂંટણીમાં એક વખત ભાજપ અને એક વખત કોંગ્રેસનો વિજય થયો છે. અમદાવાદ જિલ્લાની સાણંદ-બાવળા વિધાનસભા 2012માં વિરમગામ વિધાનસભામાંથી અલગ કરવામાં આવી હતી. સાણંદ-બાવળા વિધાનસભા બેઠકનો મોટાભાગનો વિસ્તાર GIDC ધરાવતો વિસ્તાર છે. વિરમગામ વિધાનસભામાંથી અલગ કરવામાં આવેલી બેઠક નંબર 40 સાણંદ-બાવળા વિધાનસભાની ચૂંટણી હંમેશા રસપ્રદ રહી છે.

સાણંદ બેઠક પર જામશે ત્રિપાંખિયો જંગ
આ વખતે સાણંદ બેઠક પર ભારતીય જનતા પાર્ટીએ કરમશીભાઈ પટેલના દીકરા કનુભાઈ પટેલને રિપીટ કર્યા છે. સાણંદના વર્તમાન ધારાસભ્ય કનુભાઈ પટેલ બિઝનેસમેન અને સમાજના અગ્રણી છે. તેઓ ઘણી સામાજિક સંસ્થાઓ સાથે પણ જોડાયેલા છે, આ ઉપરાંત તેઓ સમાજના અનેક સંમેલનમાં પણ ભાગ લેતા જોવા મળે છે. 

તો કોંગ્રેસે રમેશભાઈ બાલાભાઈ કોળીને ટિકિટ આપી છે. તેઓ સાણંદ જમીન વિકાસ બેંકના વાઇસ-ચેરમેન હોવાની સાથે ખેડૂત આંદોલનોમાં અવારનવાર ચમકતો ચહેરો છે અને કોંગ્રેસમાં તાલુકા સદસ્યથી લઇ કોંગ્રેસ પ્રમુખ સુધીની જવાબદારી નિભાવી ચૂક્યા છે. જ્યારે આમ આદમી પાર્ટીએ કુલદીપસિંહ વાઘેલાને ચૂંટણીના મેદાનમાં ઉતાર્યા છે. 

ઉમેદવારી ફોર્મ ભરતી વખતે હાજર રહ્યા હતા અમિત શાહ 
સાણંદ બેઠક અમિત શાહના લોકસભા વિસ્તારમાં આવતી હોવાથી તેઓ આ બેઠક પર ખાસ ધ્યાન આપી રહ્યા છે. ભાજપના ઉમેદવાર કનુભાઈ કરમશીભાઈ પટેલ જ્યારે ઉમેદવારી ફોર્મ ભરવા માટે ગયા હતા, ત્યારે કેન્દ્રીય ગૃહમંત્રી અમિત શાહ સહિત મોટી સંખ્યામાં તેમના સમર્થકો હાજર રહ્યા હતા. 

તાજેતરમાં યોજાયો હતો અમિત શાહનો રોડ શો
આ ઉપરાંત તાજેતરમાં જ સાણંદ APMC માર્કેટથી ગઢીયા ચોકડી સુધી અમિત શાહનો રોડ શો યોજાયો હતો. આ પરથી લાગી રહ્યું છે કે સાણંદ બેઠક ભાજપ માટે ખૂબ જ મહત્વની છે. આ બેઠકનું રાજકીય મહત્વ એ વાત પરથી લગાવી શકાય છે કે કનુભાઈ પટેલના નોમિનેશનમાં ખુદ અમિત શાહે હાજરી આપી હતી.

Gujarat | Union Home Minister Amit Shah accompanies Sanand constituency candidate Kanu Patel for filing his nomination for the upcoming Gujarat elections pic.twitter.com/Kn3kJ3Hkav

— ANI (@ANI) November 15, 2022

સાણંદ બેઠક પર જાતિગત સમીકરણ
સાણંદ-બાવળા વિધાનસભામાં કુલ 2.81 લાખ મતદારો છે. જેમાં 1.36 લાખ મહિલા મતદારો છે, જ્યારે 1.44 લાખ પુરુષ મતદારો છે. આ બેઠક પર સૌથી વધુ વસ્તી કોળી પટેલ છે. સાણંદ-બાવળા વિધાનસભામાં કોળી પટેલ સમાજની વસ્તી 80,000 છે. જ્યારે ક્ષત્રિય 33,000, SC 30,000, ઠાકોર 26,000 અને મુસ્લિમોની વસ્તી 25,000 છે.

2017ની ચૂંટણીમાં ભાજપે નોંધાવી હતી જીત 
ગુજરાત વિધાનસભાની 2012ની ચૂંટણીમાં જ સાણંદ બેઠક અસ્તિત્વમાં આવી હતી. આ બેઠકની 2012ની ચૂંટણીમાં કોંગ્રેસમાંથી કરમશીભાઈ પટેલે મેદાનમાં ઉતર્યા હતા. જેમાં કરમશીભાઈ પટેલની 4,148 મતથી જીત થઇ હતી. જે બાદ તેઓ ભાજપમાં જોડાઈ ગયા હતા. 2017માં આ બેઠક પર વિધાનસભાની ચૂંટણી ખૂબ જ રસપ્રદ બની હતી. કારણે ભાજપે કરમશીભાઇ પટેલના દીકરા કનુભાઈને ટિકિટ આપી હતી, જ્યારે કોંગ્રેસે પુષ્પાબેન ડાભીને ટિકિટ આપી હતી. જ્યારે કમાભાઇ રાઠોડને ભાજપ તરફથી ટિકિટ ન મળતા અપક્ષ તરીકે પોતાની દાવેદારી નોંધાવી હતી. આ ચૂંટણીમાં ભાજપના ઉમેદવાર કનુભાઇ પટેલનો વિજય થયો હતો.  આ વખતે પણ ભાજપે કનુભાઈને રિપીટ કર્યા છે.