મહામારી / Covid-19ના લક્ષણો દેખાતા BJPના રાષ્ટ્રીય પ્રવક્તા હોસ્પિટલમાં દાખલ

• ભાજપ રાષ્ટ્રીય પ્રવક્તા સંબિત પાત્રા હોસ્પિટલમાં દાખલ 
• કોરોના વાયરસના લક્ષણો દેખાતા ગુરુગ્રામની હોસ્પિટલમાં દાખલ 
• સોશિયલ મીડિયામાં લોકોએ સંબિતના સ્વાસ્થ્ય માટે કરી પ્રાર્થના 

સંબિત પાત્રામાં દેખાયા કોરોનાના લક્ષણ 

દેશમાં કોરોના વાયરસના હાહાકાર વચ્ચે દેશભરની ન્યૂઝ ચેનલમાં ભાજપનો ચહેરો બનીને આવતા પ્રવક્તા સંબિત પાત્રામાં કોરોના વાયરસના લક્ષણો દેખાયા છે. હાલમાં તેમને ગુરુગ્રામની મેદાંતા હોસ્પિટલમાં દાખલ કરવામાં આવ્યા છે. નોંધનીય છે કે સંબિત પાત્રા પોતે પણ એક તબીબ છે અને ન્યૂઝચેનલમાં ડિબેટ દરમિયાન વિરોધીઓને જડબાતોડ જવાબ આપવા માટે પણ તેઓ ખૂબ લોકપ્રિય છે. 

સોશિયલ મીડિયા પર સંબિત પાત્રા વિશે સમાચાર આવતાની સાથે ઘણા બધા લોકોએ સંબિત પાત્રા માટે જલ્દી સાજા થવાની પ્રાર્થના કરી. ભાજપનાં ઘણા નેતાઓએ પણ ટ્વીટ કરીને સંબિત પાત્રાના સ્વાસ્થ્ય માટે પ્રાર્થના કરી છે. સંબિત પાત્રા પોતે પણ સોશિયલ મીડિયામાં ખૂબ એક્ટિવ રહે છે. 

ગુજરાતમાં પણ નેતાઓ કોરોનાની ઝપેટમાં 

ગુજરાતમાં કોરોના વાયરસનો કહેર જોવા મળી રહ્યો છે. રાજ્યમાં ડોકટરો, પોલીસો સહિત નેતાઓ પણ કોરોનાની ઝપેટમાં આવેલા જોવા મળી રહ્યાં છે. અમદાવાદ શહેરની વાત કરીએ તો અમદાવાદમાં કોંગ્રેસના કોર્પોરેટર બદ્દરુદ્દીન શેખનું કોરોના પોઝિટવના કારણે મૃત્યું થયું હતું. ત્યારે અમદાવાદ શહેર ભાજપ પ્રમુખ અને નિકોલના ભાજપના ધારાસભ્ય જગદિશ પંચાલને કોરોના પોઝિટવ આવતાં એપોલો હોસ્પિટલમાં દાખલ કરવામાં આવ્યાં છે.