ધડામ! / ડોલર સામે રુપિયો રોળાયો, પહોંચ્યો અત્યાર સુધીના સૌથી નીચલા સ્તરે, જાણો કેટલો આવ્યો ઘટાડો

• ફરીવાર ડોલર સામે રૂપિયામાં ઘટાડો જોવા મળ્યો
• ક્રૂડ ઓઇલના ભાવમાં મજબૂતીને પગલે ડોલર મજબુત
• 81.94ની નીચી સપાટીને પહોચી ભારતની કરન્સી

ડોલર સામે રૂપિયામાં ઘટાડો અટકવાનું નામ નથી લઈ રહ્યો. ગુરૂવારના કરન્સી માર્કેટમાં ડોલર સામે રૂપિયો ઐતિહાસિક ઘટાડા સાથે બંધ થયો છે. ક્રૂડ ઓઇલના ભાવમાં મજબૂતીને પગલે ડોલરની વધતી માગને પગલે અમેરિકન ડોલર સામે રૂપિયો 32 પૈસા તૂટીને 81.94ની સર્વોચ્ચ નીચી સપાટીએ બંધ રહ્યો હતો.

રૂપિયામાં ભારી ઘટાડો
સવારના કારોબારમાં રૂપિયો 81.52 પર ખુલ્યો છે. પરંતુ કાચા તેલની કિંમતોમાં અસ્થિરતાને કારણે રૂપિયા પર દબાણ જોવા મળ્યું. દિવસ દરમિયાન રૂપિયો પણ 81.51ની ઊંચી સપાટી અને 81.94ની નીચી સપાટીને સ્પર્શ્યો હતો. કરન્સી માર્કેટ બંધ થતાં અમેરિકન ડોલર સામે રૂપિયો અત્યાર સુધીના સૌથી નીચલા સ્તરે 81.94ની સપાટીએ બંધ રહ્યો હતો. આ રીતે પાછલા ટ્રેડિંગ દિવસની સરખામણીમાં રૂપિયામાં 32 પૈસાનો મોટો ઘટાડો નોંધાયો છે. મંગળવારે અમેરિકન ડોલર સામે રૂપિયો 81.62ની સપાટીએ સ્થિર થયો હતો.

અમેરિકામાં આ આંકડાથી ફર્ક પડ્યો
મોતીલાલ ઓસવાલ ફાઇનાન્શિયલ સર્વિસિસના ફોરેક્સ અને બુલિયન એનાલિસ્ટ ગૌરાંગ સોમૈયાએ જણાવ્યું હતું કે મંગળવારે રૂપિયામાં થોડી મજબૂતાઇ જોવા મળી હતી પરંતુ આજે તે ફરી દબાણમાં આવી ગયો હતો. અમેરિકન ડોલરની મજબૂતીના કારણે રૂપિયામાં ઘટાડો જોવા મળ્યો હતો. વાસ્તવમાં અમેરિકામાં અપેક્ષા કરતા સારી સર્વિસ પીએમઆઈ અને પ્રાઈવેટ જોબ્સના આંકડાને કારણે ડૉલર મજબૂત થયો હતો. સોમૈયાએ જણાવ્યું હતું કે યુરો અને પાઉન્ડમાં પણ ડોલર સામે ઊંચા સ્તરે વેચવાલીનું દબાણ જોવા મળ્યું હતું. તેમણે કહ્યું કે હવે યુરોપિયન સેન્ટ્રલ બેંક (ઇસીબી)ની બેઠકની વિગતો પર નજર રહેશે. સોમૈયાએ જણાવ્યું હતું કે અમેરિકન ડોલર સામે રૂપિયાની હાજર કિંમત 81.20 થી 82.05 ની રેન્જમાં રહેવાની ધારણા છે.

કાચા તેલની કિંમતમાં વધારો
જોકે ભારત બેવડા પડકારોનો સામનો કરી રહ્યું છે. એક તરફ કાચા તેલની કિંમતોમાં વધારો જોવા મળી રહ્યો છે, જેના કારણે કાચા તેલની આયાત માટે વધુ ડોલર ખર્ચ કરવા પડશે, ત્યારે રૂપિયામાં નબળાઈ મુશ્કેલી વધારવાનું કામ કરી રહી છે. કારણ કે આયાત માટે વધુ ડોલરનો ભોગ આપવો પડશે. ભૂતકાળમાં ક્રૂડ ઓઇલ 90 ડોલર પ્રતિ બેરલની નીચે આવી ગયું હતું, જે ફરી 93.30 ડોલર પ્રતિ બેરલ પર ટ્રેડ થઇ રહ્યું છે.