વેસ્ટઇન્ડીઝના વિરુદ્ધ મુંબઇમાં રમાઇ રહેલી અંતિમ અને નિર્ણાયક ટી-20 મેચમાં ટીમ ઇન્ડિયાના 'હિટમેન' રોહિત શર્માએ વર્લ્ડ ક્રિકેટમાં એક મોટો રેકોર્ડ પોતાના નામે કર્યો છે. રોહિત શર્માએ એક એવો 'વિરાટ રેકોર્ડ' બનાવ્યો છે, જેને બનાવવા માટે વર્લ્ડ ક્રિકેટના મોટામાં મોટા ધૂરંધર બેટ્સમેન તરસતા હોય છે.
રોહિત શર્મા 400થી વધુ સિક્સ ફટકારનાર દુનિયાનો ત્રીજો બેટ્સમેન બન્યો
રોહિત પહેલા માત્ર આફ્રીદી અને ગેલ આ સિદ્ધિ નોંધાવી ચૂક્યા છે
આ પહેલા આ રેકોર્ડ માત્ર બે જ બેટ્સમેન બનાવી શક્યા હતા. પરંતુ હવે રોહિત શર્મા આ સિદ્ધિ પોતાના નામે કરનારા દુનિયાના ત્રીજા બેટ્સમેન બની ગયા છે. રોહિત શર્માએ આ મેચમાં એક સિક્સ ફટકારી આંતરરાષ્ટ્રીય ક્રિકેટ (ટેસ્ટ, વનડે અને ટી-20)માં પોતાની 400 સિક્સ પૂર્ણ કરી લીધી છે. રોહિત શર્મા આ રેકોર્ડ બનાવનાર દુનિયાનો ત્રીજો અને ભારતનો પહેલા ખેલાડી બની ગયો છે.
આંતરરાષ્ટ્રીય ક્રિકેટમાં આ પહેલા આ દુર્લભ રેકોર્ડ માત્ર બે ધુરંધર બેટ્સમેન જ કરી શક્યા છે. જ્યારે રોહિત ઉપરાંત ભારતનો અન્ય કોઇ બેટ્સમેન હજુ સુધી આ પ્રકારની સિદ્ધિ મેળવી શક્યો નથી. પાક.ના પૂર્વ કેપ્ટન શાદિહ આફ્રીદી અને વેસ્ટઇન્ડીઝના વિસ્ફોટક બેટ્સમેન ક્રિસ ગેલના નામે આંતરરાષ્ટ્રીય ક્રિકેટમાં 400થી વધારે સિક્સ ફટકારવાનો રેકોર્ડ નોંધાયો છે.
ક્રિસ ગેલે ક્રિકેટની ત્રણેય ફોર્મેટ (ટેસ્ટ, વનડે અને ટી-20)માં 534 સિક્સ ફટકારી છે. ક્રિસ ગેલ આંતરરાષ્ટ્રીય ક્રિકેટમાં સૌથી વધારે સિક્સ ફટકારનાર બેટ્સમેન છે. જ્યારે શાહિદ આફ્રીદીએ આંતરરાષ્ટ્રીય ક્રિકેટમાં કુલ 476 સિક્સ ફટકારી છે.