રાજ્યમાં ચાલુ સિઝનમાં 99.04 ટકા વરસાદ વરસ્યો છે. કચ્છમાં 121.56 ટકા અને ઉત્તર ગુજરાતમાં 80.28 ટકા વરસાદ પડ્યો છે. જ્યારે મધ્ય ગુજરાતમાં 95.72 ટકા વરસાદ નોંધાયો છે. સૌરાષ્ટ્રમાં ચાલુ સિઝનનો 89.02 ટકા વરસાદ પડ્યો છે. જ્યારે દક્ષિણ ગુરાતમાં ચાલુ સિઝનમાં 110.35 ટકા વરસાદ નોંધાયો છે. ત્યારે હજુ પણ રાજ્યમાં 4 દિવસ ભારે વરસાદની આગાહી કરવામાં આવી છે. ત્યારે આગાહી વચ્ચે અમરેલી, વલસાડ, કચ્છ, પંચમહાલ, બનાસકાંઠા, મોડાસા, કાલોલ, આણંદ, જૂનાગઢ સહિતના વિસ્તારોમાં વરસાદ વરસ્યો હતો
રાજ્યમાં ફરી વરસાદી માહોલ જામ્યો હતો. અનેક વિસ્તારોમાં લાંબા વિરામ બાદ ફરી વરસાદ વરસતા વાતાવરણમાં ઠંડક પ્રસરી હતી. લોકોએ ગરમી અને બફારાથી રાહત અનુભવી હતી. તો નીચાણવાળા વિસ્તારોમાં પાણી ભરાયા હતા. બીજી તરફ વિરામ બાદ વરસાદનું આગમન થતા ખેડૂતોમાં ખુશીનો માહોલ જોવા મળ્યો છે.
અમરેલી પંથકમાં ધોધમાર વરસાદ
હવામાન વિભાગે રાજ્યમાં ભારે વરસાદની આગાહી કરી છે. ત્યારે અમરેલીના રાજુલા, જાફરાબાદ, ખાંભા સહિતના પંથકમાં ધોધમાર વરસાદ થયો છે. પીપવાવ પોર્ટ, રાભડા, ડુંગર વિસળીયા, ગામોમાં વરસાદ થયો છે. બારપટોળી, કંથારીયા, ફાસરીયામાં વરસાદ થયો છે. અત્યાર સુધી 2 ઇંચ વરસાદ નોંધાયો છે. ઉના શાણા વાંકીયા જતા રોડ પર વરસાદી પાણી ફરી વળ્યા છે. તેમજ સ્ટેટ હાઇ-વે પર પાણી ભરાતા 30 મિનીટ બંધ કરવામાં આવ્યો છે. રસ્તા પર નદી માફક પાણી ભરાઇ ગયા છે.
ડાંગરના પાકને ફાયદાકારક વરસાદ
મોડાસા, કાલોલ, આણંદ અને વલસાડ જિલ્લામાં વહેલી સવારથી જ વરસાદી માહોલ જામ્યો હતો. લાંબા વિરામ બાદ વાપી અને આસપાસના વિસ્તારમાં વરસાદ પડ્યો. તો કેટલીક જગ્યાએ ધીમીધારે વરસાદ શરૂ થઇ ગયો હતો. લાંબા વિરામ બાદ વરસાદ પડતા ખેડૂતોમાં ખુશી જોવા મળી છે. વરસાદ પડતા ડાંગરના પાકને ફાયદો થશે. વલસાડમાં અત્યાર સુધી 103 ટકા જેટલો વરસાદ વરસી ચૂક્યો છે.
કચ્છમાં વરસાદની શરૂઆત
કચ્છમાં વિરામ બાદ ફરી એક વખત વરસાદની શરૂઆત થઈ છે. કચ્છના કંડલા, મુંદ્રા, સામખયાળી સહિતના વિસ્તારમાં વરસાદ વરસી રહ્યો છે. વરસાદ થતા અનેક વિસ્તારમાં પાણી ભરાયા છે. કચ્છમાં સીઝનનો અત્યાર સુધી 121.56 ટકા વરસાદ નોંધાયો છે. હવામાન વિભાગે દિવસભર વરસાદની આગાહી કરી છે. આગાહી બાદ હવે વરસાદનું આગમન થયુ છે.
દામોદર કુંડમા ફરી પુરની સ્થિતી
જૂનાગઢના દામોદર કુંડમા ફરી પુરની સ્થિતી સર્જાઇ છે. ગિરનાર પર ભારે વરસાદના કારણે પુર આવ્યું છે. ગિરનારના જંગલોમાં ભારે વરસાદ થયો છે. ભારે વરસાદથી દામોદર કુંડમાં નવા નીર આવ્યાં છે. સોનરેખ નદીમાં પણ નવા નીર આવ્યા છે.
એક મહિના પહેલા બનેલો રોડ ધોવાયો
બનાસકાંઠામાં એક મહિના પહેલા બનેલો રોડ ધોવાયો હોવાનું સામે આવ્યું છે..ગોળા અંબાજી ફોરલેન હાઈવે ધોવાયો છે. સામાન્ય વરસાદમાં રોડ ધોવાતા પાણી ખેતરોમાં ઘુસ્યા છે. ત્યારે તંત્ર દ્વારા પ્રોટેક્શન દીવાલ ન બનાવતા લોકોમાં રોષ જોવા મળ્યો છે.
અમદાવાદમાં મોડીરાત્રે ધીમીધારે વરસાદ
અમદાવાદમાં મોડીરાત્રે ધીમીધારે વરસાદ પડ્યો છે. શહેરના અનેક વિસ્તારોમાં વરસાદ પડ્યો. માનસી સર્કલ, સેટેલાઇટ, વસ્ત્રાપુર વિસ્તારમાં વરસાદ વરસ્યો. એસ.જી.હાઇવે, બોડકદેવ વિસ્તારમાં ધીમીધારે વરસાદ પડ્યો છે.