હવામાન / ગુજરાતમાં આ તારીખ પછી પડશે વરસાદ: અંબાલાલ પટેલે કરી આગાહી, સપ્ટેમ્બરમાં પડશે ઉનાળા જેવી ગરમી

• હવામાન નિષ્ણાંત અંબાલાલે કરી વરસાદની આગાહી
• 28 ઓગસ્ટથી દેશમાં ગરમી વધવાની શક્યતાઃ અંબાલાલ
• સપ્ટેમ્બરના બીજા સપ્તાહમાં સારા વરસાદની શક્યતાઃ અંબાલાલ

ગુજરાતમાં ચોથા રાઉન્ડના વરસાદની રાહ જોતા ખેડૂતો માટે નિરાશાજનક સમાચાર છે. હજુ સુધી રાજ્યમાં વરસાદી સિસ્ટમ ઉદ્દભવી ન હોવાથી આગામી દિવસોમાં પણ મેઘરાજા આરામના મૂડમાં જ રહેવાના છે. રાજ્યમાં વરસાદી ઝાપટા જેવો છૂટોછવાયો વરસાદ પડી શકે છે. આ સિવાય હજુ પણ ક્યાંય ભારે વરસાદની આગાહી સ્થાનિક હવામાન વિભાગ દ્વારા કરવામાં આવી નથી. હવામાન નિષ્ણાંતો દ્વારા પણ રાજ્યમાં હળવા વરસાદને લઈને આગાહી કરવામાં આવી છે. 

વરસાદને અંગે અંબાલાલ પટેલની આગાહી 
હવામાન નિષ્ણાંત અંબાલાલ પટેલે જણાવ્યું કે, હાલ રાજ્યમાં સારા વરસાદની શક્યતા નહીવત છે.  27થી 30 ઓગસ્ટ દરમિયાન દક્ષિણ ગુજરાત, દક્ષિણ સૌરાષ્ટ્રમાં હળવા ઝાપટાં પડશે. પિયત વ્યવસ્થાપન હોય તો ખેડૂતોએ પીયત કરવું જોઈએ. ગરમીની આગાહી કરતા તેઓએ જણાવ્યું છે કે,  28 ઓગસ્ટથી દેશમાં ગરમી વધવાની શક્યતા છે. 

સપ્ટેમ્બરના બીજા સપ્તાહમાં વરસાદની શક્યતાઃ અંબાલાલ પટેલ
અંબાલાલ પટેલે જણાવ્યું કે, ચીનના હોંગકોંગ તથા પૂર્વી ભાગમાં ચક્રવાત બની રહ્યું છે. અરબ સાગર અને બંગાળના ઉપસાગરનો ભેજ ચક્રવાત તરફ ખેંચાશે. અલનીનોની અસરખથી હિંદ મહાસાગરનું હવામાન સાનુકુળ હોવા છતાં વરસાદ થતો નથી. પૂર્વીય દેશોના ચક્રવાતની ગતિવિધિ મંદ પડ્યા બાદ વેલમાર્ક લૉ પ્રેશર બનશે. તેઓએ કહ્યું કે, સપ્ટેમ્બરના બીજા સપ્તાહમાં ઉત્તરા ફાલ્ગુની નક્ષત્રમાં સારા વરસાદની શક્યતા છે. 13 સપ્ટોમ્બરે ઉનાળાનો અહેસાસ થાય તેવી ગરમી પડશે. 25 ઓક્ટોબર સુધી ગરમી રહેવાની શક્યતા છે. 

ગુજરાતમાં ભારે વરસાદની શક્યતા સાવ નહીંવત
હવામાન નિષ્ણાંતો કહી રહ્યા છે કે ગુજરાતમાં ભારે વરસાદની શક્યતા સાવ નહીંવત છે, કારણ કે 31 ઓગસ્ટની આસપાસ હોંગકોંગ તરફનો ચક્રવાત બંગાળના ઉપસાગરનો ભેજ ખેંચી લેશે. આનાથી ભારતનું ચોમાસું નબળું પડશે. આ સાથે 3થી 4 સપ્ટેમ્બર બંગાળની ખાડીમાં ચક્રાવાત સર્જાઈને લો પ્રેશર સિસ્ટમ ઉદભવશે. 

જૂન અને જુલાઈમાં પડ્યો હતો શ્રીકાર વરસાદ
ગુજરાતમાં જૂન અને જુલાઈ મહિનામાં શ્રીકાર વરસાદ વરસ્યો હતો. આ બે મહિનામાં સૌરાષ્ટ્ર અને દક્ષિણ ગુજરાતમાં તો મેઘરાજાને ખમૈયા કહેવું પડે એવો તોફાની વરસાદ જોવા મળ્યો હતો. જોકે, ઓગસ્ટ મહિનામાં મેઘરાજા મૂડમાં જ ન હોય એ રીતે ખાસ વરસાદ વરસ્યો નથી. વરસાદનો ચોથો રાઉન્ડ ક્યારે શરૂ થશે એ હવે તર્ક-વિતર્કનો વિષય બન્યો છે, કેમ કે ઓગસ્ટ મહિનામાં શ્રાવણના સરવડાં જ પડી રહ્યો છે.