ચૂંટણી / વાયનાડમાં આજે ઉમેદવારી ફોર્મ ભરશે રાહુલ ગાંધી, પ્રિયંકા સાથે રહેશે...

કોંગ્રેસ અધ્યક્ષ રાહુલ ગાંધી આજે કેરલની વાયનાડ બેઠક પરથી પોતાનું ઉમેદવાર ફોર્મ ભરશે. આ અંગેની જાણકારી પાર્ટીના વરિષ્ઠ નેતા રમેશ ચેન્નીતલાએ આપી. લોકસભા-2019ની ચૂંટણીમાં કોંગ્રેસ અધ્યક્ષ રાહુલ ગાંધી પોતાની પરંપરાગત બેઠક અમેઠીથી પણ ચૂંટણી લડી રહ્યાં છે.

પાર્ટીના સૂત્રો તરફથી મળતી જાણકારી મુજબ ઉમેદવારી ફોર્મ ભરતા સમયે રાહુલ ગાંધી સાથે તેમના બહેન અને પૂર્વી ઉત્તર પ્રદેશ કોંગ્રેસના પ્રભારી મહાસચિવ પ્રિયંકા ગાંધી પણ ઉપસ્થિત રહેશે. સૂત્રોને મળતી જાણકારી મુજબ રાહુલ ગાંધી પોતાનું ઉમેદવારી પત્ર ભરવા હેલિકોપ્ટરથી વાયનાડ જશે.

પાર્ટીના વરિષ્ઠ નેતા ચેન્નીતલા અનુસાર ઉમેદવારી ફોર્મ ભરતાં પહેલા એક રોડ શોનું આયોજન કરવામાં આવ્યું છે જેમાં કાર્યકર્તાઓ ઉપસ્થિત રહેશે.  ઉલ્લેખનીય છે કે વાયનાડ બેઠક પરથી ઉમેદવારી ફોર્મ ભરવા માટે કોંગ્રેસ અધ્યક્ષ રાહુલ ગાંધી ગઇકાલે જ કાલીકટ પહોંચી ગયા. આજે રોડ શો બાદ પોતાનું ઉમેદવારી ફોર્મ ભરશે. જો કે હજુ સુધી રોડ શો અંગે મંજૂરી મળી નથી.