રાજકોટ / રાજકોટમાં વિદ્યાર્થિનીઓ સાથે અડપલા કરનાર ભાજપ હોદ્દેદારના પતિ સામે મહિલા કોંગ્રેસે નોંધાવ્યો વિરોધ

• વિદ્યાર્થિનીઓ સાથે અડપલાનો મામલો
• રાજકોટ મહિલા કોંગ્રેસ દ્વારા વિરોધ 
• મહિલાઓએ બેનરો સાથે કર્યો વિરોધ

રાજકોટ ગ્રામ્યમાં વિદ્યાર્થિનીઓ સાથે અડપલાના મામલે રાજકોટ મહિલા કોંગ્રેસ દ્વારા જિલ્લા ભાજપ કાર્યાલય ખાતે વિરોધ કરવામાં આવ્યો હતો મહિલા કોંગ્રેસના કાર્યકર્તાઓએ બેનરો સાથે વિરોધ કરવા પહોંચ્યા હતા અને ભારે સુત્રોચ્ચાર કરી ન્યાયની માંગ કરી હતી. 

રાજકોટ મહિલા કોંગ્રેસ દ્વારા વિરોધ 

મહત્વનું છે કે જિલ્લા ભાજપ મહિલા મોરચાના પ્રમુખ સીમાબેન જોષીના પતિ દિનેશ જોષી સામે વિદ્યાર્થિનીઓ સાથે દુરવ્યવહાર કર્યોનો આક્ષેપ કરવામાં આવ્યા છે જેને લઈને લોધિકા પોલીસ મથકમાં ગુનો પણ નોંધવામાં આવ્યો છે ત્યારે ભાજપ મહિલા મોરચાના પ્રમુખ સીમાબેન જોષીને પક્ષમાંથી સસ્પેન્ડ કરવાની માંગ કરવામાં આવી છે.

ભાજપના મહામંત્રી મનસુખ રામાણીનું નિવેદન

જિલ્લા ભાજપના મહામંત્રી મનસુખ રામાણીએ કહ્યું કે વિદ્યાર્થિનીઓ સાથે આવું થયું હોય તો ન્યાય મળવો જોઇએ, હાલ દિનેશ જોષી સામે લોધિકા પોલીસ સ્ટેશનમાં ગુનો નોંધાયો છે. જેને લઈ પોલીસ દ્વારા પણ તપાસ હાથ ધરવામાં આવી. 

વિદ્યાર્થિનીઓ સાથે અડપલાનો મામલો

કોરોના કાળ પછી શાળાઓ ખુલતા જ શાળાનું વ્યવસ્થાપન સંભાળતા જ જ્ઞાનજ્યોતનાં દિનેશની દાઢ સળવળી. શાળામાં સ્વિમિંગપુલમાં પાઠ ભણાવવા દિનેશ પોતાની ચેમ્બરમાં બોલાવી શાળાની બે વિદ્યાર્થીની સાથે અડપલા કરતો હોવાની વાત બહાર આવી હતી. ડર અને સંકોચના માર્યા કેટલીક છાત્રાઓ કાર્યાલયમાં શું થયું તે વાત કરતા ગભરાતી હતી જે બાદમાં દિનેશ બેફામ બન્યો અને વધુ વિદ્યાર્થિનીઓ સાથે તેની દુરવ્યવહાર કરવાની હિંમત ખુલવા લાગી આમ સમગ્ર મામલે ધીમે-ધીમે વાત પ્રસરવા માંડતા કેટલાક વાલીઓએ હિંમત દાખવી દિનેશ વિરુદ્ધ મોરચો જ માંડ્યો અને લોધિકા પોલીસ મથકમાં છેડતીની ફરિયાદ નોંધાવી છે. 

લોધિકા પોલીસ સ્ટેશનમાં નોંધાયો છે ગુનો

શાળાકીય અભ્યાસમાં કેહેવાય છે કે, શાળા અમારી તીર્થ ભૂમિ જ્ઞાનગંગા જ્યાં વહે' પણ સ્વીમીંગના બહાને શાળાની વિદ્યાર્થીનીઓને પોતાની જ્ઞાન -ગંગામાં ડૂબકી લગાવવાના દિનેશના ઓરતા અધૂરા રહ્યા અને 'તરણકળા'ના સાતે'ય કોઠા જાણતો આ અભિમન્યુ વગર સ્વીંમિંગ પુલે ડૂબી ગયો છે તેની પોતાની ઈજ્જત,અને શાળાની જે  આબરૂ ગઈ છે તે પણ જૂદી.

પોક્સો એકટ હેઠળ કાર્યવાહી 

પતિ સામે ફરિયાદ નોંધાતા રાજકોટના ભાજપ મહિલા મોરચાના પ્રમુખ સીમેબેન જોષીએ અગાઉ નિવેદનમાં જણાવી ચુક્યા છે કે મારા પતિને બદનામ કરવાનું કાવતરું છે, સમગ્ર મામલે લોધિકા પોલીસ મથકમાં પોક્સો અને એટ્રોસિટી એક્ટ મુજબ ગુનો નોંધવામાં આવ્યો છે. ત્યારે ST-ST સેલના DySP મહર્ષિ રાવલ દ્વારા તપાસ હાથ ધરાઈ છે, પોક્સો એક્ટ હેઠળ કાર્યવાહી કરવામાં આવતા અધિકારીઓ દ્વારા આરોપીની સઘન પૂછપરછ કરવામાં આવી રહી છે.