કાયદાનું ભાન / રાજકોટમાં પોલીસ બની સિંઘમ! પેટ્રોલપંપ દાદાગીરી કરનારાઓને કલાકોમાં જ સીધા કર્યા, કાન પકડીને મંગાવી માફી

• પેટ્રોલપંપમાં આતંક મચાવનારાની ધરપકડ
• પોલીસે 2 આરોપીઓની કરી ધરપકડ
• ધરપકડ થયા બાદ કાયદાનો પાઠ ભણાવ્યો

રાજકોટના કુવાડવા રોડ પર આવેલા પેટ્રોલપંપના કર્મચારી પર હુમલો કરનારાઓને પોલીસે ગણતરીની કલાકોમાં જ ઝડપી પાડ્યા હતા. બી-ડિવિઝન પોલીસે ગણતરીની કલાકમાં 2 આરોપીને દબોચી લઈને જાહેરમાં કાયદાનો પાઠ ભણાવ્યો હતો. પોલીસે બંને આરોપીઓ પાસે જાહેરમાં માફી પણ મંગાવડાવી હતી. 

પેટ્રોલપંપના કર્મચારી પર કર્યો હતો જીવલેણ હુમલો
મળતી માહિતી અનુસાર, શહેરના કુવાડવા રોડ પર આવેલા સેલ પેટ્રોલ પંપ પર પેટ્રોલ ભરાવા બાબતે કર્મચારી સાથે બોલાચાલી થયા બાદ બે શખ્સોએ કર્મચારી પર છરી વડે હુમલો કર્યો હતો. જેમાં ગંભીર રીતે ઈજાગ્રસ્ત થયેલા વિનોદભાઇ ગરેજા (ઉં.વ 28) નામના કર્મચારીએ શહેરના બી ડિવિઝન પોલીસ સ્ટેશનમાં ફરિયાદ નોંધાવી હતી. આ સમગ્ર ઘટના સીસીટીવી કેમેરામાં કેદ થઈ હતી. 

પોલીસે ગણતરીની કલાકોમાં જ બંનેને દબોચી લીધા
વિનોદભાઈની ફરિયાદના આધારે પોલીસે સીસીટીવી કેમેરાની ફૂટેજની મદદથી આરોપીઓની શોધખોળ હાથ ધરી હતી. પોલીસે આરોપીઓને ઝડપી પાડવા માટે ચક્રો ગતિમાન કર્યા હતા. જે બાદ બી ડિવિઝન પોલીસની ટીમે આફતાબ ઠેબા અને ફૈઝલ બ્લોચ નામના બે આરોપીઓને ગણતરીની કલાકોમાં જ દબોચી લીધા હતા.