અમદાવાદ: પેટ્રોલ ડીઝલના ભાવમાં છેલ્લા ઘણા સમયથી વધારો થઈ રહ્યો છે. ત્યારે આજે ફરી એક વખત પેટ્રોલ અને ડીઝલના ભાવમાં વધારો થયો છે. પેટ્રોલના ભાવમાં આજે 6 પૈસા અને ડીઝલના ભાવમાં 19 પૈસાનો વધારો થયો છે.
ભાવ વધતા અમદાવાદમાં પેટ્રોલનો ભાવ 79 રૂપિયા 72 પૈસા પ્રતિલિટર પર પહોંચ્યો છે. જ્યારે અમદાવાદમાં ડીઝલનો ભાવ 78 રૂપિયા 72 પૈસા પ્રતિલિટર પર પહોંચ્યો છે. મહત્વનું છે કે કેન્દ્ર અને રાજ્યસરકાર દ્વારા મળીને પેટ્રોલના ભાવમાં 5 રૂપિયાનો ઘટાડો કરવામાં આવ્યો હતો. સરકારના ભાવ ઘટાડા બાદ સતત ભાવમાં વધારો થતા લોકોમાં રોષ જોવા મળી રહ્યો છે.
આપને જણાવી દઇએ કે કેન્દ્ર સરકારે ગુરુવારે પેટ્રોલ-ડિઝલના ભાવમાં રૂ. 1.5 એક્સાઈઝ ડ્યૂટી ઘટાડી હતી. તેલ કંપનીઓને 1 રૂપિયો અને રાજ્યોને 2.5 રૂપિયા સુધી ઘટાડવાની અપીલ કરી હતી.
ગુજરાત મહારાષ્ટ્ર સહિત ઘણાં રાજ્યોએ કેન્દ્ર સરકારની અપીલ પછી પેટ્રોલ-ડિઝલના ભાવ ઘટાડ્યા હતા.આમ શુક્રવારના દિવસે ઘણાં રાજ્યોમાં પેટ્રોલ-ડીઝલના ભાવમાં લીટર દીઠ રૂ. 5 સુધીનો ઘટાડો જોવા મળ્યો હતો. જોકે દિલ્હી સરકારે ભાવ ઘટાડવાની ના પાડી હતી. તેથી ત્યાં માત્ર રૂ. 2.5 સુધીનો ઘટાડો થયો હતો.