48 વર્ષીય પુરુષનો આરટી-પીસીઆર ટેસ્ટ પોઝિટિવ આવતાં મ્યુનિ.તંત્રમાં ખળભળાટઃ લંડનથી આવેલા દર્દીએ દુબઈથી અમદાવાદની ફ્લાઈટ પકડી હતી
ગુજરાતમાં વધતો ઓમિક્રોનનો ખતરો
લંડનથી વાયા દુબઈ થઈ અમદાવાદ એરપોર્ટ પર ઉતર્યો શખ્સ
કોરોના રિપોર્ટ પોઝિટિવ, ઓમિક્રોન ટેસ્ટ માટે સેમ્પલ મોકલાયા
અમદાવાદ શહેર સહિત રાજ્યભરમાં કોરોનાએ વિદાય લઈ લીધી છે તેવું માનતા લોકોના કારણે કોરોનાના ડેલ્ટા વાઇરસના કેસ તો સતત વધી રહ્યા છે. જોકે વેક્સિનેશનના કારણે કોરોનાના દર્દીના મૃત્યુનું પ્રમાણ ઘટ્યું છે તેમજ દર્દીઓને ગંભીર હાલતમાં હોસ્પિટલમાં દાખલ કરવા નથી પડતા તેવો તંત્રનો દાવો છે. તેમ છતાં વલસાડમાં કોરોનાએ સતત બીજા દિવસે વધુ એક દર્દીનો ભોગ લીધો છે. રાજ્યમાં એક્ટિવ કેસની સંખ્યામાં પણ ચિંતાજનક રીતે ઉછાળો આવ્યો છે.
48 વર્ષીય પુરુષ પણ ઓમિક્રોનનો શંકાસ્પદ દર્દી
હવે લંડનની હિસ્ટ્રી ધરાવતો એક 48 વર્ષીય પુરુષ પણ ઓમિક્રોનનો શંકાસ્પદ દર્દી બન્યો છે. આ પુરુષ દુબઈથી ફ્લાઇટ પકડીને અમદાવાદ ઇન્ટરનેશનલ એરપોર્ટ પર ઊતર્યો હતો. દુબઈની ગણતરી ઓમિક્રોનના એર રિસ્ક દેશમાં કેન્દ્રની ગાઇડલાઇન મુજબ થતી નથી, પરંતુ આ પેસેન્જરનો કોરોનાનો આરટી-પીસીઆર ટેસ્ટ પોઝિટિવ આવતાં મ્યુનિ. તંત્રમાં ખળભળાટ મચી ગયો છે. લંડનની હિસ્ટ્રી ધરાવતા આ દર્દીએ ચિંતાનું મોજું પ્રસરાવ્યું છે.
તંત્ર તાત્કાલિક થયું એક્ટિવ
આવા માહોલમાં ડેલ્ટા કરતાં પણ વધુ ચેપી એવા ઓમિક્રોને ગુજરાતમાં પગપેસારો કર્યો છે. તેવામાં આજે સવારે દુબઈથી આવેલી ઇન્ટરનેશનલ ફ્લાઇટમાંથી અમદાવાદ એરપોર્ટ પર ઓમિક્રોનનો શંકાસ્પદ દર્દી મળી આવતાં કોરોનાની સ્થિતિ વધુ ગંભીર બની છે. હજુ ગઈ કાલે ગાંધીનગરમાં ઓમિક્રોનનો બીજો શંકાસ્પદ કેસ મળી આવ્યો હતો. પાંચ દિવસ પહેલાં લંડનથી પોતાના માતા પિતા સાથે આવેલો ૧૫ વર્ષીય કિશોર કોરોનાથી સંક્રમિત હોવાનું જાણવા મળ્યું છે. આ કિશોરનાં સેમ્પલને ઓમિક્રોનની તપાસ માટે જરૂરી જિનોમ સિકવન્સનો રિપોર્ટ મેળવવા ગાંધીનગરની ગુજરાત બાયોટેક રિસર્ચ સેન્ટર (જીબીઆરસી) મોકલાયાં છે.
એરપોર્ટ પર ટેસ્ટિંગમાં કોરોના પોઝિટિવ મળી આવ્યો
એરપોર્ટ પરનાં કોરોનાનાં આરટી-પીસીઆર ટેસ્ટિંગમાં આ પેસેન્જરનો રિપોર્ટ પોઝિટિવ આવ્યા બાદ તંત્ર દ્વારા તેમને સારવાર માટે સિવિલ હોસ્પિટલમાં દાખલ કરાયા છે. આ ઉપરાંત ઓમિક્રોનની ગાઇડલાઇન મુજબ તેમના જિનોમ સિકવન્સને તપાસ માટે ગાંધીનગરની જીબીઆરસી લેબ ખાતે મોકલી દેવાયાં છે. જોકે ઓમિક્રોનનો વધુ એક શંકાસ્પદ કેસ આજે સવારે મળી આવતાં સત્તાવાળાઓમાં ભારે દોડધામ મચી છે. અગાઉ તા. 6 ડિસેમ્બરની મોડી રાતે લંડનથી આવેલી એક મહિલાનો આરટી-પીસીઆર ટેસ્ટ પણ પોઝિટિવ આવ્યો હતો. તે વખતે પણ તંત્ર હરકતમાં આવ્યું હતું.
જોકે કેન્દ્રની નવી ગાઇડલાઇન મુજબ કોરોનાના નવા વેરિઅન્ટ ઓમિક્રોન સામે તકેદારીનાં પગલાંરૂપે મ્યુનિ. તંત્ર દ્વારા તમામ પેસેન્જર્સના ટેસ્ટ, ટ્રેસ અને ટ્રીટમેન્ટના ટી-ક્યુબ મેડિકલ મેથડ પર ભાર મુકાઈ રહ્યો છે. તેમ છતાં ક્યાંક કોઈક જાતની કચાશ રહી જતી હોવાનું પણ ચર્ચાઈ રહ્યું છે. એટલે મ્યુનિ. સત્તાવાળાઓએ એર રિસ્ક દેશો હોય કે તે સિવાયના દેશોની ફ્લાઇટમાં આવતા પેસેન્જરોનું એરપોર્ટ પર વધુ સઘન ચેકિંગ કરવું જરૂરી બન્યું છે. જો આમાં ક્યાંક ગફલત રહી જશે તો અમદાવાદમાં કોરોનાની સંભવિત થર્ડ વેવ ઓમિક્રોનના વધુ ખતરનાક સ્વરૂપે સામે આવશે તેમાં કોઈ વાદ-વિવાદને સ્થાન રહેતું નથી.
પેસેન્જરનો જિનોમ રિપોર્ટ ચાર દિવસે આવશે
એરપોર્ટ સત્તાવાળાઓ દ્વારા લંડનની હિસ્ટ્રી ધરાવતા દુબઈની ફ્લાઇટ પકડી અમદાવાદ ઊતરેલા કોરોનાના દર્દીનાં સેમ્પલને ગાંધીનગરની જીબીઆરસી લેબમાં આજે સવારે જ મોકલી દેવાયાં છે. આ દર્દીમાં ઓમિક્રોન વાઇરસની હાજરી છે કે કેમ તેની તપાસનો રિપોર્ટ લેબમાંથી ચાર દિવસે આવશે.
આઠમા દિવસે પેસેન્જર્સનો ફરી આરટી-પીસીઆર ટેસ્ટ કરાય છે
એરપોર્ટ પરના આરટી-પીસીઆર ટેસ્ટમાં જે પેસેન્જરનો ટેસ્ટ રિપોર્ટ નેગેટિવ આવે તો તેમને મ્યુનિ. તંત્રનાં કડક ઓબ્ઝર્વેશન હેઠળ સાત દિવસ સુધી રહેવું પડે છે. ત્યાર બાદ તેમણે આઠ દિવસે ફરી આરટી-પીસીઆર ટેસ્ટ ફરજિયાતપણે કરાવવો પડે છે.
દુબઈ ઓમિક્રોનના 'એર રિસ્ક' દેશની શ્રેણીમાં આવતું નથી
કેન્દ્ર સરકાર દ્વારા બ્રિટન, દક્ષિણ આફ્રિકા, બ્રાઝિલ, બોત્સવાના, ચીન, મોરેશિયસ, ન્યૂઝીલેન્ડ, ઝિમ્બાબ્વે, સિંગાપોર, હોંગકોંગ અને ઇઝરાયેલનો ઓમિક્રોનના સંદર્ભમાં 'એર રિસ્ક' દેશોની શ્રેણીમાં સમાવેશ કરાયો છે. આ સિવાય દુબઈ સહિતના દેશોને 'એર રિસ્ક' શ્રેણીમાંથી બાકાત રખાયા છે. આવા દેશોના પેસેન્જર પૈકીના માત્ર બે ટકા પેસેન્જરના આરટી-પીસીઆર ટેસ્ટ જરૂરી છે.