નવી દિલ્હીઃ રાષ્ટ્રીય સુરક્ષા સલાહકાર (એનએસએ) અજિત ડોભાલના પુત્ર શૌર્ય ડોભાલને ‘ઝેડ’ કેટગરીની સુરક્ષા આપવામાં આવી છે. અધિકારીઓએ જણાવ્યું કે શૌર્ય પરના સંભવિત ખતરાને ધ્યાનમાં રાખીને તેમને ‘ઝેડ’ કેટેગરીની સુરક્ષા આપવામાં આવી છે. શૌર્ય ડોભાલ ઉપરાંત પશ્ચિમ બંગાળમાં ચૂંટણી લડી રહેલા ભાજપનાં ૧૦ ઉમેદવારોને પણ કેન્દ્ર સરકારે સીમિત સમયમર્યાદા સુધી સુરક્ષા પૂરી પાડી છે.
અધિકારીઓનાં જણાવ્યાં અનુસાર કેન્દ્રીય એજન્સીઓ દ્વારા તૈયાર કરવામાં આવેલા સુરક્ષા આકલન રિપોર્ટ બાદ શૌર્ય ડોભાલને કેન્દ્રીય અર્ધસૈનિક દળના ‘મોબાઈલ સુરક્ષા કવર’ હેઠળ લાવવામાં આવ્યા છે. રિપોર્ટમાં દાવો કરવામાં આવ્યો છે કે શૌર્યને તેમના પિતા અજિત ડોભાલ અને અન્ય કેટલાક લોકોના વિરોધીઓથી મોટો ખતરો છે. આ રિપોર્ટ મળ્યાં બાદ કેન્દ્રીય ગૃહ મંત્રાલયે શૌર્ય ડોભાલ (૪૩ વર્ષ)ને ઝેડ કેટેગરીની સુરક્ષા પૂરી પાડવાના આદેશ જારી કર્યા હતાં.
તેમની સુરક્ષામાં સીઆઈએસએફનાં કમાન્ડો તહેનાત રહેશે. કમાન્ડો એકે-૪૭ રાઈફલ જેવાં હથિયારોથી સજ્જ હશે. તેમની સુરક્ષામાં ૧પ જેટલા કમાન્ડો તહેનાત રહેશે. શૌર્ય ડોભાલ થિંક ટેન્ક ઈન્ડિયા ફાઉન્ડેશનના પ્રમુખ છે. અજિત ડોભાલને કેન્દ્રીય ઔદ્યોગિક સુરક્ષાદળ દ્વારા ‘ઝેડ પ્લસ’ કેટેગરીની સુરક્ષા પૂરી પાડવામાં આવી છે. યાદવપુરથી લોકસભા ચૂંટણી લડી રહેલા ભાજપનાં ઉમેદવાર અનુપમ હાજરા અને બેરકપુરથી ચૂંટણી લડી રહેલાં અર્જુનસિંહને કેન્દ્રીય સશસ્ત્ર અર્ધસૈનિક કમાન્ડોની વાય કેટેગરીની સુરક્ષા આપવામાં આવી છે.
કેન્દ્રીય પ્રધાનમંડળમાં રાજ્યકક્ષાના પ્રધાન અને દુર્ગાપુરથી ઉમેદવાર એસ.એસ. અહલુવાલિયા, કૂચબિહારથી ઉમેદવાર નિશિત પ્રમાણિક, પૂર્વ આઈપીએસ અધિકારી અને ઘટાલ સીટનાં ઉમેદવાર ભારતી ઘોષને વાય પ્લસ સુરક્ષા આપવામાં આવી છે. આ તમામ નેતાઓ સાથે પાંચ સશસ્ત્ર કમાન્ડો સુરક્ષા માટે સતત તહેનાત રહેશે.