એપલની સ્માર્ટવોચ દુનિયાભરમાં પોપ્યુલર છે. ખાસ કરીને તેની હાર્ટ મોનિટરિંગ ટેકનોલોજી દર્દીઓ માટે આશીર્વાદ સમાન છે. ઉપરાંત તેનો ડેટા સ્ટડી માટે પણ ઉપયોગી છે. જોકે આ ટેકનોલોજીએ અત્યારે તો એપલ કંપનીને મુસીબતમાં મુકી છે. ન્યુયોર્ક યુનિવર્સિટીના કાર્ડિયોલોડિસ્ટ ડો. જોસેફ વીસલે એપલ સામે કાનુની દાવો કર્યો છે. જેમાં આક્ષેપ કરવવામાં આવ્યો છે કે એપલની વોચમાં આર્ટિયલ ફ્રિબ્રિલેશન (હદયના અનિયમિત ધબકારા) ડિટેકટ કરવાની ટેકનોલોજીમાં પેટન્ટનો ભંગ કરવામાં આવ્યો છે.
જોસેફનો દાવો છે કે તેમણે આ પેટન્ટની માહિતી સપ્ટેમ્બર,2017માં એપલ સાથે શેર કરી હતી. પરંતુ કંપનીએ તેમને યોગ્ય રોયલ્ટી નહીં આપતા તેમને લો સુટ દાખલ કરવાની ફરજ પડી છે. ડોકટરની માગણી છે કે આર્ટિયલ ફ્રિબ્રિલેશન ડિટેકટ કરવાની ટેકનોલોજી યુઝ કરવા પર કોર્ટ એપલ પર પ્રતિબંધ મુકે. ડોકટરના દાવા સામે એપલની પ્રતિક્રિયા માટે સંપર્ક કરવામાં આવ્યો હતો. જોકે સામાન્ય રીતે આવા કોર્ટ કેસો અંગે એપલ કોઇ પ્રતિક્રિયા આપતું નથી. તે રીતે આ કેસમાં પણ હજુ સુધી કોઇ કોમેન્ટ કરી નથી. એપલ માટે જોકે પેટન્ટ સંબંધી કેસ કોઇ નવી બાબત નથી.
જાણકારોના કહેવા મુજબ આ કેસમાં ડોકટર આ ટેકનોલોજીના શોધક છે. તેમ છતાં તેમના માટે કેસ જીતવો મોટો પડકાર હશે,કેમ કે તેમને એ સાબિત કરવું પડશે કે એપલ સ્માર્ટવોચમાં તેમની જ ટેકનિકનો ઉપયોગ કરે છે. જો એપલ ડોકટરે શોધી તેના જેવી લાગતી ટેકનોલોજી યુઝ કરતું હોય તો ડોકટર માટે કેસ જીતવાનું મુશ્કેલ બનશે. ઉલ્લ્ખનીય છે કે સ્માર્ટવોચમાં એપલ વોચ ટોચ પર છે. એપલની સ્માર્ટવોચના કારણે ઇમરજન્સીમાં લોકોના જીવ બચ્યા હોવાની કે અત્યંત મુશ્કેલીમાં મદદ મળી હોવાના અનેક બનાવો નોંધાયા છે. હવે જોવાનું એ રહે છે કે ડોકટરનો દાવો સાચો છે કે કેમ અને એપલ કેસ લડવાની તૈયારી બતાવે છે કે પછી વળતર ચુકવીને ડોકટરન સાથે સમાધાન કરે છે.