ઈન્ડિયન પ્રીમિયર લીગના 15મી સિઝનના સૌથી રોમાંચક મુકાબલો આજે એટલેકે શનિવારે મુંબઈના વાનખેડે સ્ટેડિયમમાં દિલ્હી કેપિટલ્સ અને મુંબઈ ઈન્ડિયન્સની વચ્ચે રમાશે. અર્જુન તેંડુલકર મુંબઈ તરફતી ડેબ્યુ કરી શકે છે.
દિલ્હી કેપિટલ્સ અને મુંબઈ ઈન્ડિયન્સની વચ્ચે રમાશે મેચ
અર્જુન તેંડુલકર મુંબઈ તરફથી કરી શકે ડેબ્યુ
દિલ્હી માટે આ મુકાબલો ક્વાર્ટર ફાઈનલ જેવો
દિલ્હી અને રોયલ ચેલેન્જર્સ વચ્ચે કાંટાની ટક્કર
મુંબઈની પાસે આ મેચમાં ગુમાવવા માટે કશું નથી. જ્યારે દિલ્હી માટે આ મુકાબલો ક્વાર્ટર ફાઈનલ જેવો છે. દિલ્હીની ટીમ આ મુકાબલામાં જીત નોંધાવતા IPL 2022ના પ્લેઑફમાં પહોંચનારી ચોથી ટીમ બની જશે. ગુજરાત ટાઈટન્સ, લખનઉ સુપર જાયન્ટ્સ અને રાજસ્થાન રૉયલ્સ પહેલેથી જ પ્લેઑફમાં પહોંચી ગઇ છે જ્યારે હવે બાકી ફક્ત એક સ્થાન માટે દિલ્હી અને રોયલ ચેલેન્જર્સ વચ્ચે કાંટાની ટક્કર થશે. દિલ્હી જો આ મેચ હારે છે તો બેંગ્લોર પ્લેઑફમાં પહોંચનારી ચોથી ટીમ બની જશે.
બેંગ્લોરની ટીમ 16 પોઈન્ટ લઇને ચોથા નંબરે
બેંગ્લોરની ટીમ 14 મેચમાં આઠ જીત અને છ હાર્યા બાદ 16 પોઈન્ટ લઇને ચોથા નંબરે છે. જો કે, તેની નેટ રનરેટ માઈનસમાં છે, જે -0.253ની છે. તો દિલ્હી 13 મેચમાંથી સાત જીત અને છ હાર્યા બાદ 14 પોઈન્ટ લઇને પાંચમા નંબરે છે. દિલ્હી માટે સૌથી સારી વાત એ છે કે તેની નેટ રનરેટ પ્લસમાં છે, જે 0.255 છે. એવામાં દિલ્હી જો આજે મુંબઈને હરાવે છે તો તે પ્લસ નેટ રનરેટના આધારે પ્લેઑફ માટે ક્વોલિફાઈ કરી શકશે. મુંબઈએ તેની પહેલાની મેચમાં સનરાઈઝર્સ હૈદ્રાબાદ ટીમ તરફથી 3 રનથી હારનો સામનો કર્યો હતો. ટીમ પહેલાથી જ પ્લેઑફમાંથી બહાર થઇ ગઇ છે અને આ તેની લીગ સ્ટેજની અંતિમ મેચ છે અને તે જીતની સાથે આ ટુર્નામેન્ટમાંથી વિદાય લેવા માંગશે.
મુંબઈ ઈન્ડિયન્સે તેની છેલ્લી મેચમાં મહાન બેટ્સમેન સચિન તેંડુલકરના પુત્ર અર્જુન તેંડુલકરને ડેબ્યુ કરવાની તક આપી શકે છે. અર્જુન છેલ્લાં બે વર્ષથી મુંબઈ ઈન્ડિયન્સ ટીમનો ભાગ છે, પરંતુ તેને હજુ સુધી ડેબ્યુ કરવાની તક મળી નથી. મુંબઈએ ચાલુ વર્ષે અર્જુનને 30 લાખ રૂપિયાની બોલી લગાવીને ખરીદ્યો હતો. આ વાતની પૂરેપૂરી શક્યતા છે કે અર્જુન આજની મેચમાં ડેબ્યુ કરી શકે છે. રોહિતે મંગળવારે સનરાઈઝર્સ હૈદ્રાબાદ સામેની મેચમાં ટૉસ જીત્યા બાદ કહ્યું હતુ અમારી પાસે વધુ એક મેચ છે અને અમે આ મેચમાં અન્ય બેટ્સમેનોને અજમાવી શકીએ છીએ.