ચાર દિવસથી રાજ્યમાં અવિતર મેઘમહેર યથાવત છે. હવામાન વિભાગ દ્વારા હજુ 3 દિવસ કમોસમી વરસાદની આગાહી કરી છે. જેમાં સૌરાષ્ટ્રનાં અમુક વિસ્તારો, ડાંગ તેમજ સાબરકાંઠામાં મેઘ મહેર થવા પામી હતી.
હવામાન વિભાગે વધુ 3 દિવસની આગાહી કરી
સૌરાષ્ટ્ર, કચ્છ, ઉત્તર ગુજરાત અને દક્ષિણ ગુજરાતના વિસ્તારોમાં ગાજવીજ સાથે વરસાદની શકયતા
48 કલાક બાદ તાપમાન 2 થી 4 ડિગ્રી વધી જશે
રાજ્યમાં છેલ્લા ઘણા દિવસથી કમોસમી વરસાદ પડી રહ્યો છે. ત્યારે હવામાન વિભાગ દ્વારા હજુ પણ કમોસમી વરસાદની આગાહી કરવામાં આવી રહી છે. આગામી 3 દિવસ હજુ પણ કમોસમી વરસાદની આગાહી કરવામાં આવી છે. સૌરાષ્ટ્ર, કચ્છ, ઉત્તર ગુજરાત, દક્ષિણ ગુજરાતનાં વિસ્તારોમાં ગાજવીદ સાથે વરસાદ પડવાની શક્યતા છે. આગામી 48 કલાક દરમ્યાન તાપમાન યથાવત રહેશે. જ્યારે 48 કલાક બાદ તાપમાન 2 થી 4 ડિગ્રી વધી જશે.
સૌરાષ્ટ્ર તેમજ કચ્છ સહિતનાં વિસ્તારોમાં વરસાદ થવાની સંભાવનાઃ હવામાન વિભાગ
આ બાબતે હવામાન વિભાગનાં વૈજ્ઞાનિક મનોરમા મોહંતીએ જણાવ્યું હતું કે, આગામી ત્રણ દિવસ ગુજરાતનાં સૌરાષ્ટ્ર, કચ્છ સહિતનાં વિસ્તારોમાં વરસાદ થવાની સંભાવનાં છે. ઉત્તર ગુજરાતનાં કેટલાક વિસ્તારોમાં વરસાદની સંભાવના છે. જેમાં બનાસકાંઠા, સાબરકાંઠા,અરવલ્લી તેમજ મહિસાગર, દાહોદ, પંચમહાલ, છોટાઉદેપુર, તાપી, ડાંગ તેમજ વલસાડ અને નવસારીમાં પણ વરસાદની આગાહી કરવામાં આવી છે. તેમજ અમદાવાદમાં પણ વરસાદ પડવાની સંભાવના છે.
બાગાયતી પાકો અને શાકભાજી પકવતા ખેડૂતોમાં ચિંતા.
ડાંગ જીલ્લાનાં વાતાવરણમાં પણ બપોર બાદ અચાનક પલ્ટો આવ્યો હતો. જેમાં આહવા સહિત આસપાસનાં વિસ્તારોમાં વરસાદ શરૂ થયો હતો. ડાંગ જીલ્લામાં સતત પાંચ દિવસથી કમોસમી વરસાદ પડી રહ્યો છે. કમોસમી વરસાદનાં કારણે ખેડૂતોની ચિંતા વધી છે. કમોસમી પાકો અને શાકભાજી પકવતા ખેડૂતોનાં ચિંતા વ્યાપી જવા પામી છે. ત્યારે ગીરી મથક સાપુતારામાં પણ કમોસમી વરસાદ શરૂથી નયન રમ્ય વાતાવરણ સર્જાયું હતું.
અડદ, મગ,તલ,બાજરી, જુવાર સહિતના પાકને નુકસાન
રાજકોટનાં ગ્રામ્ય વિસ્તારમાં સતત બીજા દિવસે કમોસમી વરસાદ વરસ્યો હતો. જેમાં ગોંડલ પંથકમાં ભારે પવન સાથે કમોસમી વરસાદ વરસ્યો હતો. જેમાં દેવચડી ગામ સહિતનાં વિસ્તારોમાં વરસાદ પડ્યો હતો. જ્યારે ગ્રામ્ય વિસ્તારમાં ભર ઉનાળે ચોમાસા જેવો માહોલ સર્જાયો હતો. કમોસમી વરસાદનાં કારણે અડદ, મગ, તલ, બાજરી, જુવાર સહિતનાં પાકોને નુકશાન પહોંચ્યું હતું.
ભર ઉનારે ચોમાસા જેવો માહોલ સર્જાયો
અરવલ્લી જીલ્લામાં ફરી કમોસમી વરસાદ વરસ્યો હતો. જેમાં મેઘરજ અને ધનસુરામાં ભારે પવન અને ગાજવીજ સાથે વરસાદ પડ્યો હતો. ભર ઉનાળે ચોમાસા જેવો માહોલ સર્જાયો હતો. મેઘરજ તાલુકાનાં ગ્રામ્ય વિસ્તારમાં ધોધમાર વરસાદ પડ્યો હતો. જેમાં જીતપુર, રેલ્લાંવાડા, ઈસરી, તરકવાડા સહિત અનેક વિસ્તારમાં વરસાદ પડ્યો હતો.
સૌરાષ્ટ્રમાં અષાઢી માહોલ
રાજકોટ સહિત સૌરાષ્ટ્રમાં અષાઢી માહોલ જોવા મળ્યો. રાજકોટ શહેરના અલગ અલગ વિસ્તારમાં વરસાદી જોરદાર ઝાપટું પડ્યું હતું. રાજકોટના યાજ્ઞિક રોડ,કાલાવડ રોડ, યુનિવર્સિટી રોડ, સાધુવાસવાણી રોડ, ઢેબર રોડ,ગોંડલ ચોકડી સામા કાંઠા વિસ્તાર સહિતના વિસ્તારોમાં વરસાદી ઝાપટા પડ્યા હતા. આ તરફ અટીકા ફાટક અને આસપાસના વિસ્તારોમાં પણ વરસાદ પડ્યો હતો. જિલ્લા બાદ શહેરમાં પણ બપોર બાદ વાતાવરણમાં પલટો આવ્યો અને જોરદાર ઝાપટું પડ્યું હતું. રાજકોટ શહેર અને જિલ્લામાં સતત આઠ દિવસથી ચોમાસા જેવો માહોલ સર્જાયો છે.