દિલ્હીમાં મોદી સરકારની કેબિનેટ બેઠકમાં કૃષિ કાયદાને પરત લેવાના પ્રસ્તાવને મંજૂરી આપી દેવામાં આવી છે. આગામી 29 નવેમ્બરનાં રોજ શરૂ થઈ રહેલા સંસદનાં શિયાળુ સત્રમાં આ બિલને પરત કરવાનાં નિર્ણયને મૂકવામાં આવશે
દિલ્હીમાં મોદી સરકારની કેબિનેટ બેઠકમાં કૃષિ કાયદાને પરત લેવાના પ્રસ્તાવને મંજૂરી આપી દેવામાં આવી છે. સરકાર તરફથી ત્રણ વાગે આ મુદ્દે પત્રકાર પરિષદ કરવામાં આવશે. બુધવારે દિલ્હીમાં સાત લૉક કલ્યાણ માર્ગ એટલે કે પ્રધાનમંત્રી આવાસમાં થયેલ બેઠકમાં કૃષિ કાયદાને રદ્દ કરવાના નિર્ણયને મંજૂરી આપવામાં આવી છે.
શિયાળું સત્રના પહેલા દિવસે બિલ પરત કરાશે
આગામી 29 નવેમ્બરનાં રોજ શરૂ થઈ રહેલા સંસદનાં શિયાળુ સત્રમાં આ બિલને પરત કરવાનાં નિર્ણયને મૂકવામાં આવશે અને વિધેયક પાસ કરાવવામાં આવશે. ત્રણેય કૃષિ કાયદાને પરત લેવા માટે એક પ્રસ્તાવ કૃષિ મંત્રાલય દ્વારા તૈયાર કરવામાં આવશે અને તે પછી કાયદા મંત્રાલય પાસે મોકલવામાં આવશે.
રાષ્ટ્રપતિની મંજૂરી બાદ રદ ગણાશે
કૃષિ મંત્રાલયનાં ડ્રાફ્ટ અનુસાર બિલને સંસદમાં પેશ કરવામાં આવશે અને તે બાદ તેના પર ચર્ચા બાદ વોટિંગ થશે અને બહુમતથી નિર્ણયને પાસ કરવામાં આવશે. રાષ્ટ્રપતિની મંજૂરી બાદ આ ત્રણેય કૃષિ કાયદા રદ્દ ગણવામાં આવશે. નોંધનીય છે કે 19 નવેમ્બરે જ પ્રધાનમંત્રી મોદીએ ત્રણેય કૃષિ કાયદા રદ્દ કરવાને લઈને રાષ્ટ્રનાં સંબોધનમાં એલાન કર્યું હતું.
કૃષિ કાયદા પરત લીધા બાદ પણ ખેડૂકો સંતુષ્ટ નથી
વડાપ્રધાન નરેન્દ્ર મોદીએ ત્રણ વિવાદાસ્પદ કૃષિ કાયદાઓ પરત ખેંચવાની જાહેરાત કર્યા બાદ પણ ખેડૂતો સંતુષ્ટ નથી. ગયા વર્ષે ચોમાસુ સત્રમાં કેન્દ્ર સરકાર દ્વારા પસાર કરવામાં આવેલા ત્રણ કૃષિ કાયદાઓના વિરોધમાં, રાષ્ટ્રીય રાજધાની દિલ્હીની વિવિધ સરહદો પર લગભગ એક વર્ષથી વિરોધ પ્રદર્શન કરી રહેલા ખેડૂતોએ માંગ કરી છે કે સરકારે એમએસપી પર પણ વાત કરવી જોઈએ.બુધવારે, ભારતીય કિસાન યુનિયનના નેતા રાકેશ ટિકૈતે ત્રણ કાયદા પાછા ખેંચવાના સંદર્ભમાં કહ્યું - જો સરકારે જાહેરાત કરી હોય તો તેઓ પ્રસ્તાવ લાવી શકે છે, પરંતુ MSP અને 700 ખેડૂતોના મૃત્યુ પણ અમારો મુદ્દો છે. ટિકૈતે કહ્યું કે સરકારે પણ આ અંગે વાત કરવી જોઈએ. સરકારને આ મુદ્દાઓ પર વાત કરવા માટે નવી સમયમર્યાદા આપતાં તેમણે કહ્યું કે જો સરકાર 26 જાન્યુઆરી પહેલા તેની સાથે સંમત થશે તો અમે નીકળી જઈશું. તે જ સમયે, પાંચ રાજ્યોમાં આગામી વિધાનસભા ચૂંટણી વિશે, BKU નેતાએ કહ્યું કે આદર્શ આચારસંહિતા લાગુ થયા પછી અમે આ મુદ્દા પર વાત કરીશું.