હોળી દરમિયાન કેટલાક યુવકો જાપાની યુવતીને ખરાબ રીતે રંગ લગાવતો વિડીયો વાયરલ થતાં પોલીસ એક્શનમાં આવી, ત્રણની ધરપકડ કરી કરી રહી છે પૂછપરછ.
જાપાની યુવતીને ખરાબ રીતે રંગ લગાવી રહ્યા લોકો વિરુદ્ધ એક્શન
મામલો વાયરલ થતાં પોલીસે ત્રણની ધરપકડ કરી
હજુ સુધી પોલીસને કોઈ ફરિયાદ મળી નથી
હાલમાં જ એક વીડિયો સોશિયલ મીડિયા પર ખૂબ વાયરલ થયો છે. આમાં હોળી દરમિયાન કેટલાક યુવકો જાપાની યુવતીને ખરાબ રીતે રંગ લગાવી રહ્યા છે. હોળીના દિવસે જાપાની યુવતી સાથે દુષ્કર્મનો મામલો સામે આવ્યો છે. યુવતીનો એક વીડિયો વાયરલ થયો છે. વીડિયોમાં જોઈ શકાય છે કે કેવી રીતે મહિલાને ભીડ દ્વારા રંગ લગાવીને પરેશાન કરવામાં આવી છે અને લોકો તેના માથા પર ઇંડા પણ ફોડી રહ્યા છે. યુવતી લોકોની હરકતોથી એકદમ અસ્વસ્થ દેખાઈ રહી છે. જો કે આ અંગે હજુ સુધી પોલીસને કોઈ ફરિયાદ મળી નથી પણ આ મામલો વાયરલ થતાં પોલીસે ત્રણની ધરપકડ કરી અને પૂછપરછ કરી છે.
નોંધનીય છે કે હવે આ મામલે પોલીસ દ્વારા નિવેદન જારી કરવામાં આવ્યું છે. આમાં પોલીસે કહ્યું છે કે આ એક વિદેશી સાથે સંબંધિત હોળીના સોશિયલ મીડિયા/ડિજિટલ મીડિયા પ્લેટફોર્મ પર ચાલી રહેલા ટ્વીટ/પોસ્ટને લઈને અપડેટ આપવામાં આવી છે. પોલીસ મુજબ વિડીયોમાં પહાડગંજ વિસ્તાર જેવો દેખાય છે જેને ધ્યાનમાં રાખવામાં અવાયું છે અને આ ઘટનાનું ચોક્કસ સ્થાન અને ક્યારે થયું તે જાણવા માટે વિશ્લેષણ કરવામાં આવી રહ્યું છે. સાથે જ જણાવી દઈએ કે પોલીસે જાપાની દૂતાવાસનો સંપર્ક કરીને યુવતીની ઓળખ અને ઘટના અંગે ઈ-મેલ દ્વારા માહિતી માંગી છે.
દિલ્હી પોલીસ દ્વારા મોકલવામાં આવેલા મેઇલના જવાબમાં દૂતાવાસના અધિકારીએ પુષ્ટિ કરી કે યુવતીએ દિલ્હી પોલીસને કે દૂતાવાસમાં આ વિશે કોઈ ફરિયાદ કરી નથી.
આ વિશે હાલ પોલીસે જણાવ્યું કે વાયરલ થયેલ એ હોળીના વિડીયોના મામલામાં એક સગીર સહિત ત્રણ છોકરાઓની ધરપકડ કરવામાં આવી છે અને એ લોકોએ ઘટના સ્વીકારી લીધી છે. બધા નજીકના પહાડગંજ વિસ્તારના રહેવાસી છે અને હોળીની મજા માણતા હતા. નોંધનીય છે કે તેમની સામે ડીપી એક્ટ હેઠળ કાર્યવાહી હાથ ધરવામાં આવી છે.
ઉલ્લેખનીય છે કે વિદેશી મહિલા સાથે દુષ્કર્મનો આ પહેલો કિસ્સો નથી, પરંતુ ભૂતકાળમાં પણ આવા કિસ્સાઓ સામે આવ્યા છે. ગયા વર્ષે ડિસેમ્બરમાં સોશિયલ મીડિયા પર એક વીડિયો વાયરલ થયો હતો, જેમાં બે લોકોએ દક્ષિણ કોરિયાના એક યુટ્યુબરની છેડતી કરી હતી જે મુંબઈના ખારમાં લાઈવ સ્ટ્રીમિંગ કરી રહી હતી. જો કે ઘટનાનો વીડિયો વાયરલ થયા બાદ જ આરોપીઓની ધરપકડ કરવામાં આવી હતી.