નવી દિલ્હીઃ ભારતની દિગ્ગજ બોક્સર એમસી મેરીકૉમે શનિવારે ઇતિહાસ સર્જ્યો છે. 35 વર્ષની આ સ્ટારે મહિલા વિશ્વ બોક્સિંગ ચેમ્પિયન્સશિપમાં સૌથી વધુ (6) ગોલ્ડ મેડલ જીતનાર વર્લ્ડ રેકૉર્ડ પોતાના નામે કરી લીધો છે. મેરીકૉમ કુલ સાત વિશ્વ મુક્કેબાજી ચેમ્પિયનશિપમાં પદક જીતનારી પ્રથમ મહિલા બોક્સર બની ગઇ છે.
મેરીકૉમે ચેમ્પિયનશિપના 10માં સંસ્કરણમાં સ્વર્ણિમ સફળતા મેળવી છે. નવી દિલ્હી સ્થિત ઇન્દિરા ગાંધી સ્ટેડિયમના કેડી જાધવ હોલમાં 48 કિલોગ્રામ ભારવર્ગના ફાઇનલમાં તેમણે યૂક્રેનની હન્ના ઓખોટાને 5-0થી હરાવી વિશ્વ બોક્સિંગ ચેમ્પિયનશિપમાં સૌથી વધુ છ સ્વર્ણ પદકો પર કબજો મેળવવાની અભૂતપૂર્વ ઉપલબ્ધિ મેળવી છે.
તેની સાથે જ લંડન ઓલમ્પિક-2012ની બ્રોન્ઝ મેડલિસ્ટ મેગ્નીફિસેન્ટ મેરીએ 5 ગોલ્ડ મેડલ જીતનારી આયરલેન્ડની દિગ્ગજ કેટી ટેલરને પાછળ રાખી દીધી છે. કેટી હવે પ્રોફેશનલ સર્કિટમાં દાવ અજમાવી રહી છે.
મહિલા વિશ્વ બોક્સિંગ ચેમ્પિયન્સશિપમાં મેરીકૉમનો આ 7મો (છ ગોલ્ડ+એક સિલ્વર)પદક છે. સૌથી વધુ મેડલ જીતવાનો પણ રેકોર્ડ હવે મેરીકૉમના નામે છે. કેટી ટેલર(પાંચ ગોલ્ડ+એક બ્રોન્ઝ) હવે પાછળ રહી ગઇ છે.