વિશ્વમાં ડંકો / માંડવીના ઇતિહાસમાં બનનારું સૌથી લાંબુ વહાણ, દુબઇના રાજવી પરિવારે આપ્યો ઓર્ડર, આટલા કરોડમાં બનશે

• કચ્છની હાથ બનાવટની કારીગરીનો ફરી એકવાર વિશ્વમાં ડંકો વાગ્યો છે
• માંડવીના ઇતિહાસમાં સૌથી લાબું 207 ફૂટના દેશી વહાણનું નિર્માણ થઈ રહ્યું છે
• જહાજના નિર્માણ કાર્યમાં 23 હજાર ક્યુબીક લાકડું વાપરવામાં આવશે

માંડવીના વહાણવટાનો વિશ્વમાં હતો દબદબો

માંડવીના વહાણવટાનો વિશ્વમાં દબદબો રહ્યો હતો પરંતુ સમય જતાં ઉદ્યોગ પણ મંદીમાં સપડાઈ જવા પામ્યો છે તે વચ્ચે કલા કારીગરીના શોખીન દુબઈના રાજ પરિવારે વિશ્વમાંથી ભારતની પસંદગી કરી. તેમાંય કચ્છનાં માંડવીના કારીગરને પોતાના હરવા ફરવા માટે ખાસ દેશી જહાજ બનાવવા માટેનો ઓર્ડર આપ્યો છે. ત્યારે આ કારીગરો પાસે ડીગ્રી નથી, માત્ર અનુભવ છે.

માંડવીના ઇતિહાસમાં પ્રથમ વખત સૌથી લાબું વહાણ

માંડવીમાં પાંચ પેઢીથી આ કામ સાથે સંકળાયેલા ઇબ્રાહિમ મિસ્ત્રીને રૂ.7 કરોડના ખર્ચે વહાણ બનાવવાનો ઓર્ડર મળ્યો છે. દેશ દુનિયામાં માંડવીના હાથ બનાવટના કારીગરોની તોલે કોઇ આવે શકે તેમ નથી. રૂ.7 કરોડના ખર્ચે બનનારું વહાણ માંડવીના ઇતિહાસમાં પ્રથમ વખત સૌથી લાબું હશે. હાલમાં માંડવીના દરિયા કાંઠે હાથ બનાવટના વહાણ તૈયાર કરવાની કામગીરી જોરશોરથી ચાલી રહી છે. અહીંથી પસાર થતા જ જહાજ બનાવવાની કામગીરી નજરે પડે છે.

વહાણને નિર્માણ પામ્યા બાદ દુબઇ લઈ જવાશે

રાજ પરિવાર માટે રૂ.7 કરોડના ખર્ચે બની રહેલું વહાણ માંડવીના ઈતિહાસમાં સર્વ પ્રથમ વખત જ 207 ફૂટની લંબાઈ ધરાવતું વહાણ નિર્માણ પામી રહ્યું છે. 18 ફૂટની ઊંચાઈ ધરાવતા વહાણને નિર્માણ પામ્યા બાદ દુબઇ લઈ જવાશે ત્યાં અંદર ઇન્ટિરિયર ફર્નિચરની કામગીરી કરાશે. આ વહાણમાં રાજ પરિવારના રહેવા માટે રૂમ, રસોડું, કોલ્ડ સ્ટોરેજ સાથે 8 ફિશિંગ બોટ રહી શકે તેવી વ્યવસ્થા ઉપલબ્ધ કરાશે. 

વહાણમાં 2000 હોર્સ પાવરનું એન્જીન

જહાજના નિર્માણ કાર્યમાં 23 હજાર ક્યુબીક લાકડું વાપરવામાં આવશે. જેમાં વિદેશી અને ઉચ્ચ ગુણવત્તાના લાકડા સાથે દેશી લાકડાનો ઉપયોગ કરાશે વહાણને મજબૂત અને ટકાઉ બનાવવા 20 એમ.એમ.ના નટ બોલ્ટનો ઉપયોગ કરવામાં આવી રહ્યો છે આ જહાજના નિર્માણમાં બે વર્ષનો સમય લાગવાનો છે. 16 માસથી તો કામગીરી ચાલી રહી છે હજી 8 માસ નીકળી જશે પછી દેશી વહાણ તૈયાર થશે પછી દુબઇ રવાના કરાશે. અહીં રોજ 36 કારીગરો કામગીરી કરી રહ્યા છે. વહાણમાં 2000 હોર્સ પાવરનું એન્જીન બેસાડવામાં આવશે.