મુંદ્રા પોર્ટ પરથી ડ્રગ્સ ઝડપાવાનો મામલે NIAની ચાર્જશીટ કોર્ટમાં રજૂ કરવામાં આવી. પાકિસ્તાની ટેરર ફંડિંગનો થયો ખુલાસો
મુંદ્રા પોર્ટ પરથી ડ્રગ્સ ઝડપાવાનો મામલો
NIAની ચાર્જશીટ કોર્ટમાં રજૂ કરવામાં આવી
ચાર્જશીટમાં થયા કેટલાક મહત્વના ખુલાસા
ગુજરાતના જ નહીં દેશના ઈતિહાસમાં અત્યાર સુધીનો સૌથી મોટો ડ્રગ્સનો જથ્થો મુંદ્રા પોર્ટ પરથી ઝડપી પાડતા હડકંપ મચ્યો હતો. જે મામલે NIAની ચાર્જશીટ કોર્ટમાં રજૂ કરવામાં આવી હતી. જેમાં કેટલાક મહત્વના ખુલાસા થયા છે.2 988.21 કિલોના ડ્રગ્સ મુદ્દે 16 આરોપી વિરુદ્ધ ચાર્જશીટ દાખલ કરવામાં આવી હતી. જેમાં પાકિસ્તાની ટેરર ફંડિંગનો સનસનીખેજ ખુલાસો થયો છે.
NIAની ચાર્જશીટમાં પાકિસ્તાની ટેરર ફંડિંગનો ખુલાસો
NIAની ચાર્જશીટ કોર્ટમાં રજૂ કરાતા કેટલાક ચોંકાવનારા ખુલાસા થયા છે. મહત્વનું છે કે આશી ટ્રેડિંગ કંપનીએ મંગાવેલા ટેલકમ પાઉડરમાંથી ડ્રગ્સ ઝડપાયું હતું. હસન હુસેન લિમિટેડ, કંધાર દ્વારા ડ્રગ્સ મોકલવામાં આવ્યું હતું. અફઘાનિસ્તાનમાં તૈયાર થયેલું ડ્રગ્સ ઈરાન મારફતે ભારતમાં આવ્યું હતું. પાકિસ્તાન સમર્થિત સંગઠનો દરિયાઈ માર્ગે ભારતમાં આ ડ્રગ્સનું વેચાણ કરતાહતા તેમજ ડ્રગ્સથી થયેલી આવક ભારત વિરોધી ગતિવિધિઓમાં ઉપયોગમાં લેવાતી હોવાનો પણ ચાર્જશીટમાં ઉલ્લેખ કરવામાં આવ્યો છે.
કોની સામે કેસ રજિસ્ટર્ડ કરાયો ?
એનઆઈએના સુત્રોએ જણાવ્યુ હતું કે એનઆઈએ દ્વારા ડીઆરઆઈ દ્વારા દાખલ કરાયેલા કેસની તપાસ હસ્તગત કરીને આઈપીસીની 120બી, એનડીપીએસના સેક્શન 8 (સી)ના 23, અને અનલોફુલ પ્રીવેન્શન એક્ટિવીટી એક્ટના સેક્શન 17,18 હેઠળ આ કન્સાઈમેન્ટના આયાતકાર મચવરમ સુધાકરણ, દુર્ગા પીવી ગોવીંદરાજુ, રાજકુમાર પી. અને અન્યો સામે એનઆઈએ દ્વારા કેસ રજીસ્ટર્ડ કરાયો છે.
કેવી રીતે ઝડપાયુ ડ્રગ્સ ?
મહત્વનું છે કે તા.13/09ના ડીરેક્ટરોટ ઓફ રેવન્યુ ઈન્ટેલીજન્સ, ગાંધીધામ દ્વારા મુંદ્રા પોર્ટ પર અફઘાનિસ્તાનથી આવેલા અને ઈરાનના બંદર અબ્બાસ પોર્ટ થી લોડ થયેલા બે કન્ટૅનરની તપાસ કરવામાં આવી હતી. જેમાં ટેલ્કમ પાવડર હોવાનું જાહેર કરાયું હતું. જો કે શંકાના આધારે તપાસ કરાતા બન્ને કન્ટેનરમાંથી અંદાજે 39 ટન જથ્થામાંથી કુલ ત્રણ ટન જેટલો એટલ કે 2988.21 કિલો જથ્થો હેરોઈન ડ્રગ્સનો હોવાનું સ્પષ્ટ થયું હતું. જેની એક કિલોની આંતરરાષ્ટ્રીય બજારમાં કિંમત 7કરોડ ગણતા, 21 હજાર કરોડનું ડ્રગ્સ ઝડપાયું હોવાનું સામે આવતા દેશભરમાં ચકચાર મચી હતી. ડીઆરઆઈએ આ મામલે આયાતકાર દંપતી, 5 અફઘાનિસ્તાની, એક ઉઝબેક, તેમજ અન્ય ભારતીયોને ઝડપ્યા હતા.