કિરણ પટેલે વિઝિટિંગ કાર્ડમાં પોતાની ઓળખ PMOના એડિશનલ ડિરેક્ટર તરીકે આપી અને મુલાકાત બાદ વિઝિટિંગ કાર્ડ પરત લઈ લેતો હતો અને ફરીથી તેનો ઉપયોગ કરતો
નકલી PMOના અધિકારી બનેલા મહાઠગ કિરણ પટેલને લઈ વધુ એક ખુલાસો
કાશ્મીરના સમગ્ર વહીવટી તંત્રને છેતરવા માટે માત્ર રુપિયા 100નો ખર્ચ કર્યો
કિરણ પટેલે મણિનગરના પ્રિન્ટિંગ પ્રેસમાંથી માત્ર 100 રુપિયામાં મેળવ્યા હતા વિઝિટિંગ કાર્ડ
જમ્મુ કાશ્મીરમાં PMOના ઉચ્ચ અધિકારી ગણાવી બુલેટપ્રૂફ વાહનમાં ફરતા અમદાવાદના મહાઠગ કિરણ પટેલની ધરપકડ કરાઈ છે. આ મહાઠગ કિરણ પટેલ મામલે એકબાદ એક અનેક ચોંકાવનારા ખુલાસા થઈ રહ્યા છે. આ તરફ વધુ એક ચોંકાવનારો ખુલાસો સામે આવ્યો છે કે, તેણે કાશ્મીરના સમગ્ર વહીવટી તંત્રને છેતરવા માટે માત્ર રુપિયા 100નો ખર્ચ કર્યો હતો. કિરણ પટેલે મણિનગરમાં આવેલી પ્રિન્ટિંગ પ્રેસમાંથી માત્ર 100 રુપિયામાં વિઝિટિંગ કાર્ડ મેળવ્યા હતા. આ વિઝિટિંગ કાર્ડમાં તેણે પોતાની ઓળખ PMOના એડિશનલ ડિરેક્ટર તરીકે આપી હતી.
PMOના ઉચ્ચ અધિકારી ગણાવી બુલેટપ્રૂફ વાહનમાં ફરતા કિરણ પટેલની ધરપકડ બાદ હવે એક બાદ એક ખુલાસા થઈ રહ્યા છે. આરોપી કિરણ પટેલ કોઈ પણ વ્યક્તિ સાથે મુલાકાત બાદ વિઝિટિંગ કાર્ડ પરત લઈ લેતો હતો અને ફરીથી તેનો ઉપયોગ કરતો હતો. આ મીડિયા રિપોર્ટ મુજબ કિરણ પટેલ અને તેના બે સાથીદારો અમિત પંડ્યા તથા જય સીતાપરાએ શ્રીનગરના એક વરિષ્ઠ પોલીસ અધિકારી સહિત વિવિધ અધિકારીઓને ફોન કર્યો હતો. પોતાના અને તેના બે સાગરીતો માટે એક હોટલ, ઝેડ પ્લસ સુરક્ષા અને બુલેટપ્રૂફ વાહનોની વ્યવસ્થા માટે તેણે આ ફોન કર્યો હતો.
મહાઠગ કિરણ પટેલનું વધુ એક કારસ્તાન સામે આવ્યું છે. PMO અધિકારીના નામે છેતરપિંડી આચરનારા કિરણ પટેલ મામલે વધુ એક ખુલાસો સામે આવ્યો છે. કિરણ પટેલે સુરતના ઉદ્યોગપતિ દિનેશ નાવડિયાનો સંપર્ક કર્યો હતો. સૂત્રોનું માનીએ તો આરોપી કિરણ પટેલે પોતાની ધરપકડ પહેલાં શ્રીનગરમાં તેના એસ્કોર્ટ સાથે મોબાઈલ સિગ્નલ જામર ન આપવા બદલ એક વરિષ્ઠ પોલીસ અધિકારીને ખખડાવ્યા હતા.
કિરણ પટેલના સંપર્ક કરવા મામલે દિનેશ નાવડિયાનું નિવેદન
મહાઠગ કિરણ પટેલના સંપર્ક કરવા મામલે દિનેશ નાવડિયાનું નિવેદન સામે આવ્યું છે. તેમણે કહ્યું કે, અમદાવાદમાં G20 સમિટ માટે કિરણ પટેલે મને આમંત્રણ આપ્યું હતું. અમદાવાદ અને જમ્મૂ-કશ્મીરની એક હોટેલમાં કિરણ પટેલ સાથે મારી મુલાકાત થઇ હતી. તેમણે ઉમેર્યું કે, હોટેલ તાજમાં કિરણ પટેલ મળવા આવ્યો હતો અને કિરણ પટેલે કોઈ પણ કામ કરી આપવા ખાતરી આપી હતી. કિરણ પટેલે કેન્દ્ર સરકારના કામ પણ કરી આપવાની ખાતરી આપી હતી તેમજ વારંવાર ફોન પર કશ્મીરની વાત કરતો હતો અને કિરણ પટેલે કશ્મીરમાં સસ્તા ભાવે જમીન અપાવવા માટે વાત કહી હતી. કશ્મીરમાં ઉદ્યોગ સ્થાપવામાં મદદ કરવાની ખાતરી આપી હતી તેમ નાવડિયાએ જણાવ્યું છે.
કિરણ પટેલે ગરબા આયોજક કેતન ગાંધી સાથે પણ ઠગાઇ કરી
કિરણ પટેલે ગરબા આયોજક કેતન ગાંધી સાથે ઠગાઇ કરી છે. વર્ષ 2018ના વર્ષમાં નવરાત્રીના આયોજનમાં કિરણ ભાગીદાર હતો. કિરણ પટેલે ગોધરાના કેતન ગાંધીને ભાગીદાર બનાવ્યા હતા. મોટી રકમમાંથી 17 લાખની રકમ કિરણે ભાગીદાર કેતનને ન આપી ઠગાઈ કરી હતી. સમગ્ર મામલે કિરણ પટેલ સામે પોલીસ ફરિયાદ નોંધાઈ હતી. ફરિયાદ બાદ રૂપિયા 7.5 લાખથી વધુ રકમ મહાઠગે ચુકવી હતી. મહાઠગે બાકીના નાણા હજુ સુધી ભાગીદારને ચુકવ્યા નથી. વીટીવી સમક્ષ ગોધરાના વેપારી કેતન ગાંધીએ પોતાની વ્યથા ઠાલવી છે. મારા જેવા અનેક લોકોને કિરણ પટેલે ફસાવ્યા છે તેમ કેતન પટેલે જણાવ્યું હતું.
અનેક જગ્યાએ છેતરપિંડી આચરી ચૂક્યો છે
કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી.
G 20 અંતર્ગત યોજી હતી કોન્ફરન્સ
મહાઠગ કિરણ પટેલ અને તેની પત્ની રાષ્ટ્રપ્રથમ નામનું સંગઠન ચલાવે છે. તાજેતરમાં જ રાષ્ટ્રપ્રથમના બેનર હેઠળ કિરણ પટેલે અમદાવાદમાં G 20 અંતર્ગત કોન્ફરન્સ યોજી હતી. ગત 29 જાન્યુઆરીના હોટેલ હયાતમાં કોન્ફરન્સ યોજાયેલી G-20 કોન્ફરન્સમાં સચિવો અને રિટાયર્ડ સચિવોને આમંત્રણ અપાયુ હોવાનો ખુલાસો થયો છે.
પોતાને ગણાવતા હતો PMO ઓફિસર
જમ્મુ અને કાશ્મીર પોલીસે શ્રીનગરમાં એક મોટી કાર્યવાહી કરી છે. એક હાઈપ્રોફાઈલ કેસમાં અમદાવાદના કિરણ પટેલની ધરપકડ કરવામાં આવી છે. માહિતી મુજબ ધરપકડ કરાયેલ કિરણ પટેલ નામના વ્યક્તિએ બનાવટી દસ્તાવેજોના આધારે સત્તાવાર પ્રોટોકોલ મેળવ્યો હતો. ધરપકડ કરાયેલ વ્યક્તિ પોતાની ઓળખ વડાપ્રધાન કાર્યાલય, નવી દિલ્હીમાં એડિશનલ ડાયરેક્ટર (સ્ટ્રેટેજી એન્ડ કેમ્પેન્સ) તરીકે આપતો હતો. જમ્મુ-કાશ્મીર પોલીસને મળેલી ગુપ્ત માહિતી બાદ પોલીસે આ કાર્યવાહી કરી હતી. શ્રીનગરની એક સ્થાનિક કોર્ટે ગુરુવારે (16 માર્ચ) કિરણને ન્યાયિક કસ્ટડીમાં મોકલી દીધો. આ વ્યક્તિ પોતાને પીએમઓ ઓફિસર ગણાવતો હતો.
શું હતો સમગ્ર મામલો ?
જમ્મુ-કાશ્મીરમાં પોલીસે એક એવા ઠગની ધરપકડ કરી છે, જે પોતાને PMO ઓફિસર ગણાવતો હતો. ગુજરાતમાં રહેતા આ વ્યક્તિનું નામ કિરણ પટેલ છે. તે પોતાને PMOના એડિશનલ ડાયરેક્ટર તરીકે ઓળખાવતો હતો. આટલું જ નહીં ઠગ Z પ્લસ સિક્યોરિટી, બુલેટપ્રૂફ એસયુવીની સુવિધાઓ પણ લઈ ગયો હતો. તે હંમેશા ફાઈવ સ્ટાર હોટલમાં રહેતો હતો. પોલીસે શંકાના આધારે તપાસ કરી તો તે નકલી અધિકારી હોવાનું બહાર આવ્યું. તેની 10 દિવસ પહેલા ધરપકડ કરવામાં આવી હતી, પરંતુ તેને ગુપ્ત રાખવામાં આવી હતી. જોકે પોલીસે ગુરુવારે ધરપકડનો ખુલાસો કર્યો હતો.
4 વખત PMO અધિકારી તરીકે J&Kની યાત્રા કરી ચુક્યો છે
ઢગ કિરણ પટેલ અત્યાર સુધીમાં 4 વખત PMO અધિકારી તરીકે J&Kની યાત્રા કરી ચુક્યો છે. સૂત્ર પાપ્ત વિગતો મુજબ કિરણ પટેલ સાથે ગુજરાતના અન્ય 2 શખ્સ હોવાની માહિતી છે. કિરણ પટેલ સાથે રાજસ્થાનનો પણ એક શખ્સ હાજર હતો તેમજ રાજસ્થાનના વ્યક્તિની જમ્મુ કશ્મીર પોલીસ પૂછપરછ કરી રહીં છે. જમ્મુ કશ્મીર પોલીસની ટીમ પણ ગુજરાત પહોંચશે. 29 નવેમ્બર 2022ના કિરણ પટેલે Z+ સુરક્ષા સાથે LOC નજીક ઉરીની મુલાકાત લીધી હતી.