પ્રેમલગ્ન કરનાર બહેનનું ભાઈએ જ મિત્ર સાથે મળી અપહરણ કર્યાનો બનાવ અમદાવાદનાં રામોલ વિસ્તારમાં બન્યો હતો. અકસ્માત કર્યો છે તેમ કહી શખ્સો બહેનને ઉઠાવી રાજસ્થાન લઈ ગયા હતા. જોકે આ મામલે પોલીસને જાણ કરતા પોલીસ યુવતીને મુક્ત કરાવી ત્રણ આરોપીઓની ધરપકડ કરી છે.
બહેને પ્રેમ લગ્ન કરતા સાળાને ન ગમ્યું અને બહેનને ઉઠાવી ગયા
બહેનના પતિનું ખોટું બહાનું કરી સાળાએ અપહરણ કર્યું
રામોલ પોલીસે ત્રણ શખ્સની ધરપકડ કરી
પ્રેમીઓને આજે પણ લોકો શાંતીથી સુવા દેતા નથી. જમાના કોઈ પણ હોય. પરંતુ પ્રેમીઓની સ્થિતી પહેલા જેવી જ છે. આ પ્રેમીઓ આજે પણ દુઃખી છે. પોતાના ઘરના લોકોના ત્રાસને કારણે આ પ્રેમીઓ દર દરની ઠોકર ખાઈ રહ્યાં છે. પહેલા લીવઈનમાં રહેતા હતા. બાદમાં પ્રેમ લગ્ન કર્યા હતા. પરંતુ શાંતી મળી નહીં.
થોડા દિવસ પહેલા રાત્રે ત્રણ શખ્સો સ્વિફ્ટ કાર લઇને પોલીસ બનીને તેમના ઘરે આવ્યા હતા. હેમેન્દ્રને તમારી એક્ટિવાથી અકસ્માત થયો છે. જેથી તમે પોલીસ સ્ટેશન ચાલો. બાદમાં આ શખ્સોએ યુવકને તેની પત્નીને અને તેના ભાણિયાને સ્વિફ્ટ ગાડીમાં બેસાડી દીધા હતા. બાદમાં એક્સપ્રેસ હાઇવેના ઓવરબ્રિજ પરથી નિશાનું અપહરણ કર્યું હતું. અપહરણ કરનાર કોઈ બીજુ ન હતું. પરંતુ હેમેન્દ્રનો સાળો અને તેનો મિત્ર હતા. આ બન્ને શખ્સોએ હેમેન્દ્રને મારમાર્યો હતો. સાળાએ ધમકી આપી હતી કે જો તું હવે અમારી બેનને તારી સાથે લઈ જવાની કોશિશ કરીશ તો તને જાનથી મારી નાખીશ.
રામોલ પોલીસે એક ટીમ રાજસ્થાન પહોંચી ત્રણેયની ઝડપી લીધા
બાદમાં હેમેન્દ્ર પાટીદારે પોલીસ ફરિયાદ કરતા સમગ્ર મામલો સામે આવ્યો હતો. રામોલ પોલીસે એક ટીમ રાજસ્થાન મોકલી હતી. ગઈકાલે ત્રણ શખ્સની રાજસ્થાનથી ધરપકડ કરી હતી. સાળો મુકેશ પાટીદાર, સસરા કચરૂ પાટીદાર અને સાળાના મિત્ર રૂપલાલને દબોચી લેવામાં આવ્યા હતા. રામોલ પોલીસે સ્થાનિક પોલીસની મદદ લીધી હતી. આ મદદને આધારે પોલીસે આ ત્રણેય શખ્સને દબોચી લીધા હતા. સાથે સાથે નિશાને પણ મુક્ત કરાવી હતી.
શા માટે બહેનનું અપહરણ કર્યું ?
આરોપી મુકેશને તેની બહેનની પ્રેમ કહાની પસંદ ન હતી. આ માટે તેણે અપહરણ કરાવ્યું હતું. નિશાએ પ્રેમ લગ્ન કર્યા હતા. બસ આ વાત મુકેશને ગમતી ન હતી. આ માટે સગી બહેનનો સંસાર તોડવાનો પ્રયાસ કર્યો હતો. જોકે નિશાના લગ્ન પહેલા અન્ય સાથે થયા હતા. પરંતુ હેમેન્દ્રના પ્રેમમાં એટલી બધી પાગલ બની ગઈ કે પહેલા લગ્ન તોડી નાખ્યા અને બાદમાં બીજા લગ્ન કરી લીધા હતા.
હાલ પોલીસે ત્રણ આરોપીની ધરપકડ કરી છે. હેમેન્દ્રને પત્ની પાછી મળી જતા તેણે રાહતનો શ્વાસ લીધો છે. તેને ચિંતા હતી કે તેની પત્નીનો જીવ જોખમમાં છે. પરંતુ પોલીસની સારી કામગીરીને કારણે નિશા પાછી ફરી છે અને આરોપીને જેલ જવાની નોબત આવી છે. અહીં એક ભાઈની જીદને કારણે બહેનના સંસારમાં તોફાન આવ્યું છે.