એક્ટ્રેસ કંગના રનૌતએ શ્રદ્ધા મર્ડર કેસ પર પોતાની પ્રતિક્રિયા આપી છે. કંગનાએ ઇન્સ્ટાગ્રામ પર એક પોસ્ટ શેર કરી છે જેને વાંચીને કોઇ પણ ઇમોશનલ થઇ શકે છે.
શ્રદ્ધા મર્ડર કેસ પર ઇમોશનલ થઇ કંગના રનૌત
શ્રદ્ધાની 2020ની ચિઠ્ઠી પોસ્ટ કરી લખ્યો સંદેશો
કહ્યું કે શ્રદ્ધા એક દેવી હતી
શ્રદ્ધા વોકર મર્ડર કેસે સમગ્ર દેશને હચમચાવી મૂક્યો છે. દરેક વ્યક્તિ આશ્ચર્યમાં છે કે એક પ્રેમી આવું કઇ રીતે કરી શકે. પોલીસને શ્રદ્ધાની 2020ની ચિઠ્ઠી પણ હાથ લાગી છે જેનો ફોટો મૂકીને બોલીવૂડની એક્ટ્રેસ કંગના રનૌત પોતાનો ગુસ્સો જાહેર કરી રહી છે. શ્રદ્ધાની ચિઠ્ઠીને જોઇને કંગના એટલી ભાવુક થઇ ગઇ કે પોતાની ઇન્સ્ટા સ્ટોરી પર એક પોસ્ટ શેર કરી છે.
કંગનાએ શેર કરી શ્રદ્ધાની સ્ટોરી
કંગનાએ પોતાની ઇન્સ્ટા સ્ટોરીમાં લખ્યું કે આ એ જ લેટર છે કે જે શ્રદ્ધાએ 2020માં પોલીસથી મદદ માંગતા લખ્યો હતો. તેણે કહ્યું હતું કે આફતાબ તેને ડરાવતો રહે છે અને તેના ટુકડાઓ કરી દેવાની ધમકી પણ આપે છે. તે તેને બ્લેકમેઇલ પણ કરે છે. આ તમામ થવા છતાં તેણે શ્રદ્ધાનું બ્રેઇન વોશ કર્યુ અને પોતાની સાથે દિલ્હી લઇ આવ્યો.
શ્રદ્ધાની કહાણી પર ભાવુક થઇ કંગના
કંગનાએ પોતાની સ્ટોરીમાં આગળ લખ્યું કે આપણને બધાને ખબર છે કે તેની સાથે લગ્નનો વાયદો કરીને આ કરવામાં આવ્યુ છે. તે કમજોર નહોતી. તે એક છોકરી હતી જેનો જન્મ આ દુનિયામાં જીવવા માટે થયો હતો. પરંતુ કમનસીબે તે એક મહિલા હતી અને તેનું દિલ પણ એક મહિલાનું હતું. જેની સ્વાભાવિક પ્રકૃતિ સુરક્ષા કરવાની અને ઘા ભરવાની હોય છે. મહિલા ધરતી જેવી હોય છે જેની અંદર કોઇ પણ માટે ભેદભાવ હોતો નથી. જેમાં પોતાપણાંની ભાવના હોય છે અને તે બધાને સ્વિકારે છે.
તે એક દેવી હતી- કંગના
કંગનાએ આગળ લખ્યું કે તે એક એવી છોકરી હતી કે જે પરીઓની કહાણીઓમાં વિશ્વાસ રાખતી હતી. તેને લાગતું હતું કે દુનિયાને તેનો પ્રેમ જોઇએ છે. તે એક દેવી હતી કે જેનામાં ઘા ભરવાની શક્તિઓ હતી. તે કમજોર નહોતી પરંતુ તે એક છોકરી હતી જે પરીઓની કહાણીઓમાં જીવતી હતી. તે પોતાનાં સપનાની કહાણીમાં પોતાના હીરોની અંદર છુપાયેલા રાક્ષસથી લડવાનો પ્રયાસ કરી રહી હતી.