મોરબી / ક્યૂટોન સિરામિકના બેનામી કરોડોના વ્યવહારોનો આંકડો જાણી ચોંકી જશો, કોંગ્રેસે કહ્યું ભાજપના સિનિયર નેતાનું નામ ખૂલ્યું ED કેમ ચૂપ

• મોરબીમાં 350 કરોડના બેનામી વ્યવહાર
• ભાજપના સિનિયર નેતાનો હવાલો ખુલ્યાની ચર્ચા 
• 200 કરોડના વ્યવહાર સામે ED કેમ ચૂપ?-વસાવડા

ઇન્કમટેક્સ વિભાગ (IT વિભાગ) દ્વારા મોરબીના અગ્રણી ક્યુટોન સિરામિક ગ્રુપ પર 9 ઓગસ્ટથી દરોડા કાર્યવાહી ચાલી રહી છે. ત્યારે આ દરોડા દરમ્યાન IT વિભાગને અંદાજે 350 કરોડના બિનહિસાબી વ્યવહારો હાથ લાગ્યા છે. તેમજ ભાજપના સિનિયર આગેવાન હવાલો ખુલ્યાની ચર્ચાએ રાજકારણ ગરમાયુ છે.

ભાજપના અગ્રણીની વાત બહાર આવે ત્યારે તપાસ કેમ અટકી જાય: કોંગ્રેસ નેતા ડૉ.હેમાંગ વસાવડા

સમગ્ર મામલે ભાજપના આગેવાનનું નામ ખૂલતાં જ કોંગ્રેસ નેતા ડૉ.હેમાંગ વસાવડાએ સરકાર પર પ્રહાર કર્યા હતા. કટાક્ષ કરી કહ્યું હતું કે 200 કરોડના વ્યવહાર સામે ED કેમ ચૂપ?, વિપક્ષની પાર્ટીઓ વિરુદ્ધ ED તપાસ કરે છે પણ જ્યારે ભાજપના અગ્રણીની વાત બહાર આવે ત્યારે તપાસ કેમ અટકી જાય છે. તટસ્થતાથી તપાસ થાય તો ભાજપ અગ્રણીની વિગતો બહાર આવશે તેવી તેમણે હામ ભરી હતી.

દરોડામાં ભાજપના સિનિયર આગેવાનના દસ્તાવેજ કબજે કરાયા
રાજકોટમાં ITની ટીમે બે ફાયનાન્સ સહિત 3 સ્થળોએ તપાસ હાથ ધરી હતી. IT વિભાગના દરોડામાં રાજકોટ ભાજપના સિનિયર આગેવાનના દસ્તાવેજ કબજે કરાયા છે. આથી, ભાજપના સિનિયર આગેવાનના કર્મચારીની પૂછપરછ કરશે તેવી શક્યતા હતી.આથી, IT વિભાગ સંભવત: ભાજપના અગ્રણીની પૂછપરછ હાથ ધરી શકે છે.

25થી વધુ સ્થળો પર ચાલી રહી છે તપાસ
મોરબીના અગ્રણી ક્યુટોન સિરામિક ગ્રુપના ઉત્પાદન અને વેચાણ મથકો ઉપર 9 ઓગસ્ટની વહેલી સવારથી ઇન્કમટેક્સના દરોડા પાડયા છે. મોરબીની સાથે–સાથે અમદાવાદ ખાતે પણ ક્યુટોન ગ્રુપના ધંધાદારી સ્થળો ઇન્કમટેક્સની રડાર હતા, આ કંપનીને સંલગ્ન કુલ મળી 25 થી વધુ સ્થળો પર તપાસ ચાલી રહી હોવાનું બહાર આવ્યું છે.

અભિનેતા અનિલ કપૂર છે કંપનીના બ્રાન્ડ એમ્બેસેડર
ઉલ્લેખનીય છે કે, આ કંપનીના બ્રાન્ડ એમ્બેસેડર અનિલ કપૂર છે. જેથી IT અનિલ કપૂરના ચોપડે બતાવેલી રકમના હિસાબોની તપાસ પણ કરી શકે છે.

મોટી રકમના ગેરકાયદે વહેવારો થયા
ક્યુટોન સિરામિક વાંકાનેર સહિતના યુનિટો અને 6 સપ્લાય સ્થળો ઉપર ઇન્કમટેક્સ વિભાગે મેગા સર્ચ ઓપરેશન શરૂ કર્યું છે 2 દિવસથી ચાલી રહેલી આ તપાસમાં રાજકોટથી 1 ડઝનથી વધુ અધિકારી તપાસમાં જોડાયા છે. મોટા પ્રમાણમાં બેનામી વ્યવહાર સામે આવે તેવી આશંકા વ્યક્ત કરવામાં આવી રહી છે. મોરબીની સાથે અમદાવાદ ખાતે ક્યુટોન ગ્રુપ સાથે જોડાયેલ વ્યાપાર સ્થળો ઉપર પણ સર્ચ ઓપરેશન ચાલી રહ્યું હોવાની વિગતો પ્રકાશમાં આવી છે. હજુ પણ થોડા દિવસો સુધી IT હિસાબો ખંગાળી શકે છે.