અમદાવાદ / દિશમાન ગ્રુપ પર IT ના દરોડા મામલે કરોડોના વ્યવહારને લઇ થયો ચોંકાવનારો ખુલાસો

• દિશમાન ફાર્મામાં IT વિભાગની રેડનો મામલો
• સર્ચ દરમિયાન કરોડો રૂપિયાના વ્યવહાર આવ્યા સામે
• 2 હજાર કરોડના ટર્ન ઓવરનો થયો ખુલાસો

આ તપાસમાં વધુ 5 નામ સામે આવ્યા છે. અમદાવાદના ચાર્ટડ એકાઉન્ટન્ટની સંડોવણી પણ સામે આવી છે. રોકડ સહિતના રૂપિયા 1 કરોડ 39 લાખનો મુદ્દામાલ સીઝ કરવામાં આવ્યો છે. 24 લોકરોની ઇન્કમટેક્સ વિભાગ દ્વારા તપાસ ચાલુ છે. આ કંપનીના બોગસ લોન, બોગસ રસીદ સહિતના દસ્તાવેજોને જપ્ત કરવામાં આવ્યાં છે.

24 બેંક લોકર સીલ

પ્રાપ્ત થયેલ વધુ વિગત પ્રમાણે દિશમાન ફાર્માસ્યુટિકલ્સ ગ્રુપ પર થયેલ દરોડાની કામગીરીમાં કંપની પાસેથી 1.4 કરોડ રોકડ ITએ જપ્ત કરી છે. આ સાથે જ જ્વેલરી સહિત 24 બેંક લોકર સીલ કર્યા હતા. 

15 દેશની કરન્સી ઝડપાઇ 

નોંધનીય છે કે,  ITએ હાથ ધરેલ તપાસમાં જુદા જુદા 15 દેશની કરન્સી પણ હાથ લાગી હતી જેની કિંમત 75 લાખ રૂપિયા થવા જાય છે. જો કે, આ તપાસ છેલ્લા ચાર દિવસથી યથાવત છે. 

કોણ છે દિશમાન કંપનીના સંચાલકો 

દિશમાન ફાર્માસ્યુટિકલ્સ કંપનીમાં જન્મેજય વ્યાસ CMD અને ચેરમેન છે, તેમના પત્ની દેવહુતિ વ્યાસ ડાયરેક્ટર છે, આ સાથે જ તેમની દીકરી અદીતિ વ્યાસ અને પુત્ર અર્પિત વ્યાસ MD અને CFO છે. જેમાં અર્પિત વ્યાસ હાલ સ્વિટ્ઝરલેન્ડમાં છે.

પ્રિયા બ્લુ ઇન્ડસ્ટ્રીઝના માલિકને ત્યાં પણ પડ્યા દરોડા 

પ્રિયા બ્લુ ઇન્ડસ્ટ્રીઝનાં માલિકને ત્યાં IT વિભાગ દ્વારા દરોડા પાડવામાં આવ્યા હતા. આ દરોડા દરમિયાન કરોડોની કરચોરી સામે આવી છે. જેને લઈને IT વિભાગે કંપનીની રૂપિયા 10 કરોડની બેનામી સંપત્તિ જપ્ત કરી છે. રૂપિયા 4 કરોડ 40 લાખની રોકડ રકમ અને રૂપિયા 3 કરોડ 94 લાખના દાગીના સીઝ કરાયા છે. કંપનીએ રૂપિયા 100 કરોડનો નફો આવકમાં દર્શાવ્યો ન હતો. 

આથી કંપનીના માલિક સામે બ્લેકમની કાયદા હેઠળ કાર્યવાહી કરાઈ છે. ITની તપાસમાં રૂપિયા 60 કરોડના કાળાનાણાંના વ્યવહારો સામે આવ્યા છે અને હજુ 22 લોકરોની તપાસ કરવામાં આવી રહી છે. પ્રિયા બ્લ્યૂ કંપનીના માલિકો હોંગકોંગ અને ભારતમાં શીપ બ્રેકિંગના નામે વેપાર કરતા હતા. તેમજ વિદેશી ફર્મમાં કંપનીએ મોટુ રોકાણ કર્યુ હતું.