દેશના સૌથી ધનિક વ્યકિત મુકેશ અંબાણીની દિકરી ઇશા અંબાણી અને આનંદ પીરામલના લગ્નનું પ્રી-વેડિંગ સેલિબ્રેશન ઉદયપુરમાં શરૂ થઇ ગયુ છે. 8 ડિસેમ્બરે સેલિબ્રેશનની શરૂઆત સંધ્યા મહાઆરતી સાથે થઈ. આ સાથે જ ઈશા અંબાણીના લગ્નના ફંકશનના શ્રીગણેશ થયા. મહાઆરતી માટે 35 ફૂટ લાંબી ભગવાન શ્રીનાથજીની પ્રતિમા તૈયાર કરવામાં આવી છે.
ઉદયપુરમાં યોજાયેલી મહાઆરતીનો વીડિયો સામે આવ્યો છે. આ મહાઆરતીના સમયે હોટલ ઓબરોય ઉદયવિલાસમાં ભવ્ય સજાવટ કરવામાં આવી. આરતીની સાથે લાઈટ શો પણ થયો જેનાથી આરતી વધારે ભવ્ય લાગતી હતી.
આ આરતી દરમિયાન નીતા અંબાણીએ કહ્યું - લેટ્સ જોઈન ટુગેધર ફોર મહાઆરતી આઈ વેલકમ યુ ઓલ (આવો આપણે બધા મહાઆરતીમાં ભાગ લઈએ હું તમારા બધાનું સ્વાગત કરું છું.) ઉદ્ઘોષણાની સાથે સિટિંગ એરીયામાં હોસ્ટેસે મહેમાનોને દીપકવાળી નાની થાળીઓ આપી. અંબાણી પરિવાર અને મહેમાનોએ શ્રીનાથજીની આરતી ઉતારી. દરમિયાન અધરં મધુરમ્ વદનમ્ મધુરમ્ મધુરાધિપતે અખિલમ્ મધુરમ્... (મધુરાષ્ટકમ) કર્પૂરગૌરં કરુણાવતરામ્... વક્રતુંડ મહાકાય... અને ગણેશ સ્તુતી સુખકર્તા-દુખહર્તા વાર્તા વિઘ્નાચી... પણ ગુંજી.
આ પછી દિકરીના ફંક્શનમાં નીતા અંબાણીએ જોરદાર પરફોર્મંસ આપ્યા બાદ સમગ્ર અંબાણી પરિવાર એકસાથે સ્ટેજ પર દેખાયો. અંબાણી પરિવારે શાહરૂખની ફિલ્મના ગીત ‘માહી વે’ પર ડાન્સ કર્યો. નીતા અંબાણીએ દિકરા અનંત- આકાશ સાથે પરફોર્મંસની શરૂઆત કરી. થોડીવાર પછી પિતાનો હાથ પકડીને ઇશા પણ સ્ટેજ પર આવી. આ તમામ ફોટોઝ અને વીડિયોઝ સોશ્યલ મીડિયા પર ખૂબ જ વાયરલ થઇ રહ્યા છે.
તમને જણાવી દઇએ કે અંબાણી પરિવારના આ ફંક્શનમાં શામેલ થવા માટે બોલિવુડના દિગ્ગજ સ્ટાર્સ ઉદયપુર પહોંચ્યા છે અમેરિકાની પૂર્વ ફર્સ્ટ લેડી હિલેરી ક્લિંટન પણ આ સેરેમની માટે ઉદયપુર પહોંચ્યા હતા.