નિર્ણય / અરૂણાચલપ્રદેશ સરહદે ભારત વધારી રહ્યું છે તાકાત, M-777 અલ્ટ્રાલાઈટ હોવિત્ઝર તોપ કરાશે તૈનાત

• અમેરિકા પાસેથી ખરીદાયેલી છે હોવિત્ઝર તોપ
• ભારતીય સેના લદ્દાખ અને અરૂણાચલપ્રદેશના પૂર્વ વિસ્તારમાં તોપ તૈનાત કરશે

હોવિત્જરને હેલિકોપ્ટરમાં લોડ કરી શકાય છે, અને ઝડપથી ઉંચાઈવાળા વિસ્તારમાં પહોંચાડી શકાય છે. પાકિસ્તાન અને ચીન સાથે ઘર્ષણ વધી રહ્યું છે તેવા સમયે અલ્ટ્રાલાઈટ હોવિત્જરને પૂર્વી સીમા પર તૈનાત કરવાનો મહત્વનો નિર્ણય લેવાયો છે.

હોવિત્જર તોપને એક જગ્યાએથી બીજી જગ્યાએ લઈ જવા માટે ભારતે અમેરિકન ચિનૂક હેલિકોપ્ટર્સ પણ ખરીદ્યા છે. વર્ષ 2015માં ભારતે અમેરિકા સાથે ચિનૂક માટે કરાર કર્યો હતો જેમાંથી 6 હેલિકોપ્ટર્સની ડિલિવરી મળી ચુકી છે.

તો, સેનામાં આધૂનિકીકરણના દૌરમાં હોવિત્જર ભારત માટે ફતેહનું કારણ બની શકે છે. હોવિત્જર તોપ અમેરિકામાં બનેલી એકદમ હલકા વજનવાળી તોપ છે. અફઘાનિસ્તાન અને ઈરાકના યુદ્ધમાં અમેરિકાએ તેનો ઉપયોગ કર્યો છે, તો, હાલમાં અમેરિકા, કેનેડા અને ઓસ્ટ્રેલિયા હોવિત્જર તોપનો ઉપયોગ કરે છે. 

તેના વજનની ખાસિયતને કારણે પર્વતો પર સહેલાઈથી પહોંચાડી શકાય છે. મારક ક્ષમતાને કારણે હોવિત્જર તોપ આપણા સૈનિકોની શક્તિ અને જોશ વધારી શકે છે. જે ફોરવર્ડ પોસ્ટ પર પહોંચતા સૈનિકોને બે દિવસ લાગે છે, તેવા દુર્ગમ વિસ્તારોમાં હોવિત્જર માત્ર કલાકોમાં હેલિકોપ્ટર દ્વારા પહોંચાડી શકાય છે.