ક્રિકેટ / IND vs SL : ટીમ ઈન્ડિયાના યુવા બેટ્સમેનનો કમાલ, કરિયરની પહેલી જ વનડેમાં બનાવ્યા આ રેકોર્ડ

• પ્રથમ વન-ડે માં ભારતનો સાત વિકેટે વિજય 
• ઇશાન કિશને પોતાના 23 માં જન્મ દિવસે કર્યું ડ્રીમ ડેબ્યૂ 
• માત્ર 42 બોલમાં 59 રન ફટકાર્યા 

શિખર ધવનની આગેવાની હેઠળ યુવા ખેલાડીઓ સાથે શ્રીલંકા પહોંચેલી બ્લૂ બ્રિગેડે પ્રથમ મેચમાં જ પોતાના ઈરાદાઓ સ્પષ્ટ કરી ડેતાં શાનદાર વિજય મેળવ્યો હતો. 

બે ખેલાડીઓને મળી વન-ડે કેપ
શ્રીલંકા સામેની શ્રેણીમાં ભારત તરફથી બે ખેલાડીઓએ આંતરરાષ્ટ્રીય એક દિવસીય ક્રિકેટ કારકિર્દીની શરૂઆત કરી હતી. આ બે ખેલાડીઓમાં મુંબઈ ઈન્ડિયન્સ તરફથી રમત ઇશાન કિશન અને સૂર્યકુમાર યાદવનો સમાવેશ થાય છે. બંને ખેલાડીઓને લાંબા અરસા બાદ આંતરરાષ્ટ્રીય વન-ડે ક્રિકેટ રમવાની તક મળી હતી. ઇશાન કિશને તો પોતાને મળેલી આ તકનો ભરપૂર ફાયદો ઉઠાવતા પ્રથમ વન-ડે માં અર્ધી સદી ફટકારી દીધી હતી. 

જન્મદિવસના દિવસે જ પદાર્પણ કરનાર બીજો ભારતીય 
ઇશાન કિશન જન્મદિવસના દિવસે આંતરરાષ્ટ્રીય વન-દે ક્રિકેટમાં ડેબ્યૂ કરનાર બીજો ભારતીય ક્રિકેટર છે.  આ અગાઉ ગુરશરણ સિંહ એકમાત્ર ખેલાડી હતા જેમણે જન્મદિવસના દિવસે જ કારકિર્દીની શરૂઆત કરી હતી. તેમણે 8 માર્ચ 1990 ના દિવસે ઓસ્ટ્રેલીયા સામે પ્રથમ આતંરરાષ્ટ્રીય મેચ રમી હતી. 

પોતાની પ્રથમ મેચમાં જ અર્ધી સદી 
કિશને માત્ર 42 બોલમાં 8 ચોગ્ગા અને 2 છગ્ગાની મદદથી 59 રન બનાવ્યા હતા. પોતાની પ્રથમ વન-ડે માં સૌથી ઝડપી અર્ધી સદી ફટકારનાર ભારતીય ક્રિકેટરોની યાદીમાં  ઇશાન કિશન બજા નંબરે આવી ગયો હતો. આ યાદીમાં કૃણાલ પંડયા પ્રથમ સ્થાને છે.  કૃણાલે માત્ર 26 બોલમાં અર્ધીસદી પૂરી કરી હતી જ્યારે કિશને 33 બોલમાં આ માઈલસ્ટોન હાંસલ કર્યો હતો. 

પૃથ્વી શૉ અને ધવનની પણ તોફાની બેટિંગ 
શ્રીલંકાએ ટોસ જીતીને ભારતીય ટીમને 263  રનનું લક્ષ્યાંક આપ્યું હતું. ભારતે જવાબમાં તોફાની શરૂઆત કરતાં પોતાના ઈરાદા સ્પષ્ટ કરી દીધા હતા. ભારત તરફથી ઓપનર્સ ધવન અને પૃથ્વી શૉએ શરૂઆતથી જ ફટકાબાજી શરૂ કરી દીધી હતી. પૃથ્વી શૉએ કેટલાક ક્લાસિક શોટ્સ રમીને માત્ર 24 બોલમાં 43 રન ફટકારી દીધા હતા. આ સિવાય શિખર ધવને કેપ્ટન ઇનિંગ રમત અણનમ 86 રન ફટકાર્યા હતા. ઇશાન કિશન, પૃથ્વી શો અને ધવનની જોરદાર બેટિંગના કારણે ભારતે આ લક્ષ્ય માત્ર 36.4 ઓવર્સમાં જ હાંસલ કરી લીધું હતું.  

ભારતીય ટીમનીં શરૂઆત જોતાં આગામી દિવસોમાં ઘણા નવા રેકોર્ડ્સ તૂટતાં જોવા મળે તેવી સંભાવના છે. યંગ બ્લૂ બ્રિગેડે ચાહકોમાં ખૂબ ઉત્સાહ અને આશા જગાડી હોવાથી શ્રેણીની બાકીની મેચમાં ટીમના પ્રદર્શન પર સૌની નજર રહેશે.