વિચારણા / T-20 વર્લ્ડ કપ પહેલા ભારત-પાકિસ્તાનની વચ્ચે રમાઇ શકે છે મેચ!

ક્રિકેટના મેદાન પરના બે કટ્ટર હરીફો ભારત-પાકિસ્તાન જ્યારે પણ મેદાન પર ટકરાય છે ત્યારે રોમાંચ ચરમસીમાએ હોય છે. ઈંગ્લેન્ડમાં રમાયેલા વર્લ્ડકપમાં આ બંને ટીમ વચ્ચેના મુકાબલાએ બધા રેકોર્ડ તોડી નાખ્યા હતા. હવે ICCનો પ્લાન છે કે ઓસ્ટ્રેલિયામાં રમાનાર T-2૦ વર્લ્ડકપ પહેલાં બંને ટીમ વચ્ચે એક વોર્મ-અપ મેચનું આયોજન કરવામાં આવે.

અહેવાલો અનુસાર 2020ના ICC T-2૦ વર્લ્ડકપ પહેલાં ભારત અને પાકિસ્તાન વચ્ચે મેચ યોજાઈ શકે છે. T-20 વર્લ્ડકપ નો કાર્યક્રમ જાહેર થઈ ચૂક્યો છે. ભારત અને પાકિસ્તાનની ટીમને અલગ અલગ ગ્રૂપમાં રાખવામાં આવી છે. ભારતીય ટીમ ગ્રૂપ-Bમાં છે, જ્યારે પાકિસ્તાની ટીમ ગ્રૂપ-Aમાં છે. આથી આ બંને ટીમ ગ્રૂપ રાઉન્ડમાં એકબીજા સામે ટકરાવાની નથી.

T-20 વર્લ્ડકપનું આયોજન ઓસ્ટ્રેલિયામાં 18 ઓક્ટોબરથી 15 નવેમ્બર, 2020 દરમિયાન થવાનું છે. ભારતીય ટમ પોતાના અભિયાનની શરૂઆત ૨૪ ઓક્ટોબર, 2020ના રોજથી  સાઉથ આફ્રિકા સામે કરશે, જ્યારે પાકિસ્તાની ટીમ એ જ દિવસે યજમાન ઓસ્ટ્રેલિયા સામે ટકરાશે. આથી જ ICC એવો પ્લાન બનાવી રહી છે કે વિશ્વકપ પહેલાં ભારત-પાક. વચ્ચે એક વોર્મઅપ મેચનું આયોજન કરવામાં આવે, જે દર્શકોને ઘણું પસંદ પડશે.

ઉલ્લેખનીય છે કે મહેન્દ્રસિંહ ધોનીની કેપ્ટનશિપમાં ભારતીય ટીમે T-20 વર્લ્ડકપ નો પહેલો ખિતાબ પાકિસ્તાનને હરાવીને 2007માં જીત્યો હતો, જ્યારે પાકિસ્તાની ટીમે વર્ષ 2009માં શ્રીલંકાને હરાવીને આ ટ્રોફી જીતી હતી.