ઓટો ટિપ્સ / લોકડાઉનમાં કાર અને ટૂ-વ્હીલરને નુકસાનથી બચાવવું હોય તો, આ ખાસ ટિપ્સ અપનાવી લો

• લોકડાઉનમાં વાહનોનો ઉપયોગ સાવ ઓછો થઈ ગયો છે
• વાહનો એક જ જગ્યાએ સતત ઊભા રાખી દેવાથી થાય છે નુકસાન
• સૌથી પહેલાં કાર અને બાઈકના ટાયરને પહોંચે છે નુકસાન

મૂવમેન્ટ છે જરૂરી

કોઈપણ વાહનના ટાયર સૌથી મહત્વપૂર્ણ પાર્ટ હોય છે અને ટાયરની મૂવમેન્ટ ખૂબ જ જરૂરી છે. જેથી કારને સપ્તાહમાં એકવાર તેની જગ્યાએથી 10 મીટર સુધી આગળ પાછળ અવશ્ય કરો. જ્યારે ટૂ વ્હીલર વાહનો માટે બેસ્ટ ઉપાય એ છે કે, તમે સેન્ટર સ્ટેન્ડ પર વાહન ઉભુ કરી ટાયર મૂવ કરતા રહો. 

પાર્કિંગ

હવે ગરમી ખૂબ જ વધી ગઈ છે. જેથી વાહનને હમેશા શેડવાળી અથવા કવર્ડ જગ્યાએ જ પાર્ક કરવું. શક્ય હોય તો વાહનને કવરથી ઢાંકીને રાખો. આનાથી વાહન પર ગંદુ નહીં થાય અને તેના મેકેનિકલ પાર્ટ્સમાં પણ ગંદકી ભેગી નહીં થાય. ભૂલથી પર વાહનને ડાયરેક્ટ સનલાઈટમાં મૂકવું નહીં, કારણ કે તેનાથી વાહનના પેન્ટ અને ટાયર પર ખરાબ અસર થાય છે. 

એર પ્રેશર

જો તમારા વાહનના ટાયરમાં એર પ્રેશર ઓછું છે તો, તેને તાત્કાલિક ભરાવો. જો તમે એવા ઝોનમાં છો જ્યાં વાહન ચલાવવાની છૂટ છે તો તમારા વાહનને સર્વિસ સેન્ટર લઈ જાઓ અને હવા ભરાવો. કારણ કે હવા ઓછી હોવાથી વાહનનું વજન ટાયર, રિમ અને ટ્યૂબ પર પડે છે. જેનાથી નુકસાન થઈ શકે છે. 

ટાયર થ્રેડ ચેકિંગ

તમારા વાહનનું ટાયર થ્રેડ ચેકિંગ પણ સમયાંતરે કરાવતા રહો. તેના માટે તમે કોઈન ટેસ્ટ થિયરી અપનાવી શકો છો. જેમાં એક રૂપિયાનો સિક્કો લઈ તેને કારના ટાયરના થ્રેડ (ટાયર પર બનેલી ડિઝાઈનના વચ્ચેના ગેપને થ્રેડ કહે છે) માં નાખો. જો સિક્કાનો અડધાથી વધારે ભાગ બહાર રહે છે તો તેનો મતલબ એ છે કે, તમારા ટાયર બદલવાની જરૂર છે. 

કાર વોશ

લોકડાઉનમાં સમય પસાર કરવા માટે લોકો કાર વોશ કરે છે. ઘણીવાર કાર વોશ કર્યા બાદ તેને જે-તે સ્થાને જ રહેવા દે છે.પણ આવું ન કરવું જોઈએ. વાહન વોશ કર્યા બાદ તેને થોડું મૂવ કરીને આગળ-પાછળ મૂકવું, નહીં તો વાહનમાં કાટ લાગી શકે છે.